Jue Mun 80 - NYANMIƐN NDƐ'N 1998

Nyanmiɛn yɛ ɔ nian Izraɛl nvle'n i lika-a

1 Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie.

¹ Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie. I waan:

² Wɔ bɔ a ti Izraɛlfuɛ'm be sunianfuɛ, sie ɔ su. Wɔ bɔ a tinngɛ Zozɛf osu'n nunfuɛ mun kɛ bua kankanfuɛ'n ɔ fa kankan i bua mun sa'n, wɔ bɔ ɔ famiɛn bia'n wo anz'm bé ti su nglo'n, yi ɔ́ wun nglo.

³ Yi ɔ wunmiɛn'n i nglo Efraim osu nunfuɛ mun nin Bɛnzamɛn osu nunfuɛ mun, ɔ nin Manase osu nunfuɛ'm be nyrun, bla wa de ye.

⁴ Ee Nyanmiɛn, man e su ekun! Nian e nyrun klanman, i liɛ'n e ´nyan é ti.

⁵ ?Anannganman, wɔ bɔ a ti mɛn wunmuan'n i Nyanmiɛn'n, cɛn onin ko yɛ e bɔ e ti ɔ nvle'n i nunfuɛ'n e srɛlɛ'n ɔ ´yaci wɔ ya kunlɛ-ɔ?

⁶ Awlaboɛ'n ɔ ti ɔ sran'm be aliɛ yɛ a fa ta be-ɔ. A yo man be nyinmuɛn'n ɔ bu sa puu.

⁷ Wɔ man be nga be mɛn'n mantan e liɛ'n be kpɛ ndɛ e mɛn'n i falɛ ti. E kpɔfuɛ'm be yo e finfin.

⁸ Nyanmiɛn wɔ bɔ a sie mɛn wunmuan'n, man e su ekun! Nian e nyrun klanman, i liɛ'n e ´nyan é ti.

⁹ A tuli vinyi fie kun bo Ezipt lɔ, kpɛkuun a ko fuannin nvle wie mun, yɛ a tali fie sɔ'n be mɛn'n nun.

¹⁰ A dun mmua yoli lika'n i wein fie sɔ'n ti. I nun waka'm be fifili, be trali ndin, yɛ be trɛli mɛn wunmuan sɔ'n nun.

¹¹ Fie sɔ'n i fɔnvɔ'n katali oka'm be su. Yɛ i nun waka'm be sama'm be trɛli, be katali sɛdri waka'm be su.

¹² Waka'm bé sama sɔ'm be trɛli lele be juli jenvie'n nuan. Bé bo'm be fɛfɛli lele juli nzue ba'n i nuan .

¹³ ?Ɔ yo sɛ ti yɛ a kpɛli fie sɔ'n i wun awa nun toklo nin-ɔn? Ɔ man sran'm be kwlaa bɔ be sin'n be saci i.

¹⁴ Blo kɔkɔti'm be wa didi i nun ninnge mun, yɛ blo nnɛn'm be ´ko didi lɔ.

¹⁵ Nyanmiɛn, wɔ bɔ a sie mɛn wunmuan'n, sa ɔ sin bla. Kɛ bɔ a o nyanmiɛn su lɔ'n, kpɛ ɔ nyin nian wa, yɛ bu vinyi fie sɔ'n i akunndan.

¹⁶ Sasa fie sɔ'n bɔ ɔ bɔbɔ a fali ɔ́ sa tali'n. Sɛ n ´kwla se'n, ɔ ti ɔ wa yasua, yɛ a tɛli i ɔ nyinnin.

¹⁷ Sin'n ɔ'a di, b'a kpɛkpɛ i nun waka mun. Man be nga be yrɛli i'n, bɔ be kpɛkpɛli i nun waka mun'n, be `wu ijɔlɛ bɔ a ´ijɔ be'n ti.

¹⁸ Man ɔ́ sa kpa'n tran famiɛn ng'ɔ o ɔ́ sa fama su'n i su. Man ɔ tran sran sɔ bɔ a yoli man ɔ nyinnin'n i su.

¹⁹ Yɛ e su kpɔci-man wɔ kun. Man e nguan, wɔ yɛ e ´su wɔ-ɔ.

²⁰ Anannganman, wɔ bɔ a ti mɛn wunmuan'n i Nyanmiɛn'n, man e su ekun! Nian e nyrun klanman, i liɛ e ´nyan é ti.