Jue Mun 78 - NYANMIƐN NDƐ'N 1998

Sa ng'ɔ tɔli Izraɛlfuɛ'm bé su'n b'ɔ ti afɔtuɛ like'n

1 Jue nga ti Azaf liɛ.

¹ Jue nga ti Azaf liɛ. I waan: Min nvle'n nunfuɛ mun, amun `sie amun su be tie min mmla'n. Amun `sie amún su kpa be tie ndɛ nga n kan'n.

² N wa kan ndɛ nyanndra nun. N ´kan ninnge nga be fiali su laa'n be ndɛ .

³ Laa ndɛ sɔ mun'n, e ti be titi, e si be, é si'm be kan kleli ye.

⁴ E su fa fia-man e mma'm bé wun. E ´kan e kle be nga be ´ba bé sin'n mun ekun, kɛ ɔ ´yo nan b'a si sa ti b'ɔ fata kɛ be manman Anannganman'n, yɛ kɛ ɔ ´yo nan b'a si kɛ ɔ kwla, nan b'a ti abonuan sa ng'ɔ yoli be'n ti.

⁵ Ɔ kleli Zakɔb osu nunfuɛ'm be nantilɛ ng'ɔ fata'n, ɔ kpɛli mmla kun Izraɛl mɛn'n nun. Ɔ fa mmla sɔ'n sieli e nannan'm be nyrun kɛ be `kan be kle be mma mun

⁶ nan be mma'm b'a kan kle be mma liɛ mun nan b'a si i, nan be kusu b'a kan kle be klun ba liɛ mun,

⁷ nan b'a fa bé wla'n b'a guɛ i Nyanmiɛn su, nan bé wla ɔ'a fi-man ng'ɔ yoli'n, nan b'a fɛ i mmla'm be su.

⁸ I liɛ'n, be su yo-man kɛ be nannan'm, bɔ be yoli nyin kekle dan'n, bɔ be anwlɛn'n yoli nnyɔn-nnyɔn'n, bɔ be akunndan'n ɔ'a tran-man Nyanmiɛn su'n sa.

⁹ Efraimfuɛ mun bɔ be ti ta tofuɛ kpakpa'n be wanndili alɛ kunlɛ cɛn'n nun,

¹⁰ afin aenguɛ nga be nin Nyanmiɛn be trali'n b'a yo-mɛn i su sa'n. B'a kpli-man su kɛ be ´fɛ i mmla'n su.

¹¹ Bé wla fili sa dandan ng'ɔ yoli'n mun, ɔ nin abonuan sa ng'ɔ yoli kleli be'n mun.

¹² Ezipt lɔ Zɔan lika'n nun lɔ'n, ɔ yili atrɛ be nannan'm be nyrun.

¹³ Ɔ kpɛli jenvie'n nun nan b'a sin nun. Ɔ jrannin nzue'n kɛ b'a fa talɛ b'a si i nyrun ce sa .

¹⁴ Wia nun'n, ɔ man wɛnsrɛn tiaan kun dun be nyrun mmua yɛ ɔ kle be atin nin-ɔn .

¹⁵ Ɔ kpacili yɛbuɛ wie'm be nun aawlɛ flɛnnɛn'n nun lɔ, nzue kpanngban kpa fin be nun fiteli yɛ be nɔnnin.

¹⁶ Nzue sɔ'n sonjili kɛ nzue ba dandan'm be nun nzue'n sa .

¹⁷ Sanngɛ i sin'n, be wa fɔnnin Anannganman wun ekun, be wa jasoli i bɔ like fi nun-mɛn i sin'n i wun ekun lika kee sɔ'n nun lɔ.

¹⁸ Be kan Nyanmiɛn niannin, be waan ɔ `man be be klun klo like liɛ nga be waan be ´di'n.

¹⁹ Be kannin Nyanmiɛn i ndɛ tɛtɛ, be seli kɛ: «?Nyanmiɛn bɔbɔ kpa'n ɔ kwla man ye aliɛ aawlɛ flɛnnɛn nga nun wa?

²⁰ Ɔ'a yo man nzue'n ɔ'a fin yɛbuɛ'n nun ɔ'a fite ɔ'a sonji, y'a wun i lili. ?Sanngɛ ɔ ´kwla man ye aliɛ nin nnɛn?»

²¹ Kɛ Anannganman tili ndɛ sɔ'n, ɔ fali ya. Ya ng'ɔ fɛli i Izraɛlfuɛ'm bɔ be ti i nvle nunfuɛ'm bé wun'n ti wluwlu kɛ sin yɛ ɔ'a trɔ i bé wun sa,

²² afin b'a lafi-mɛn i su, b'a bu-mɛn i kɛ ɔ kwla be de.

²³ Sɛ n ´kwla se'n, ɔ kan ndɛ kleli nyanmiɛn ble'n, yɛ ɔ tikeli nyanmiɛn'n b'ɔ la nglo lɔ plaii'n i anuan'n.

²⁴ Yɛ ɔ man aliɛ guali bé su kɛ nzue'n b'ɔ tɔ'n sa, ɔ mannin be mani be dili .

²⁵ Klɔ sran'n dili anz'm be aliɛ'n wie. Ɔ mannin be ng'ɔ ko ju be'n.

²⁶ I sin'n, Nyanmiɛn suli aunngban ng'ɔ fin wia afiliɛ'n i bo, ɔ man ɔ fitali nglo lɔ. I fanngan nun'n, ɔ suli mɛn'n i ja ngua lɔ aunngban'n i bo kɛ ɔ fita.

²⁷ Yɛ ɔ yoli man nnɛn fin nglo lɔ guali be su kɛ ndutre sa. Ɔ yoli man anunman wie'm be bali kpanngban kpa, be sɔnnin kɛ jenvie nuan aunnyan'n sa .

²⁸ Ɔ yoli man anunman sɔ'm be guali Izraɛlfuɛ'm be nanmue'n nun trutrɛɛ, be gua sin yiali bé tannin sua mun.

²⁹ Nyanmiɛn fali nga be waan be ´di'n mannin be. Be dili nga be ko di'n, be ku'n yili kpa.

³⁰ Be flɛ i kɛ kɛ be tɛ o like'n sin bɔ be tɛ di'n, kɛ bɔ be aliɛ'n tɛ o be nuan'n nun'n ,

³¹ kpɛkuun Nyanmiɛn i ya'n ɔ jueli be su, nan ɔ'a kun be nun wunmiɛnfuɛ mun, nan ɔ'a nunnun be gbanflɛn mun.

³² Sanngɛ ɔ nin i sɔ ngba'n, b'a yaci-man sa tɛ'n i yolɛ, b'a lafi-man Nyanmiɛn i abonuan sa ng'ɔ yoli be'n be su.

³³ Ɔ man ɔ fita be guali. Kɛ ɔ kunnin be kɛ nga sa. Ɔ yoli nyrɛnnɛn sɔ ngbɛn.

³⁴ Kɛ wie'n tɔ bé su'n, bé nyin kpɛn Nyanmiɛn su, be sa bé sin be bɛ i sin kɛ ɔ de be.

³⁵ Kɛ ɔ ko yo sɔ'n, bé wla kpɛn su kɛ Nyanmiɛn ti kɛ yɛbuɛ sa. Be talo i. Bé wla kpɛn su kɛ Nyanmiɛn b'ɔ like fi nun-mɛn i sin'n yɛ ɔ ti bé ti kpɔfuɛ-ɔ.

³⁶ Sanngɛ be di-man nanwlɛ, ndɛ nga be kan kle i'n, ɔ ti-man su.

³⁷ Be fa-man bé wun cici-mɛn i. Aenguɛ nga ɔ nin be trali'n, be yo-mɛn i su sa'n.

³⁸ Sanngɛ i liɛ'n, ɔ si be aunnvuɛ, ɔ yaci be fɔnlɛ'n cɛ be, ɔ se-man kɛ ɔ ´nunnun be kun. Kpalɛ sunman ɔ trɛli i anwlɛn, ɔ guɛli i ya'n i ase, ɔ yacili ya'n.

³⁹ Be si kɛ be ti klɔ sran nan kɛ be nguan'n ko wie'n, wuun ɔ'a wie.

⁴⁰ I wun nga be jasoli aawlɛ flɛnnɛn'n nun lɔ'n ɔ sɔnnin. Be klɔklɔli i lika kee sɔ'n nun lɔ kpa.

⁴¹ Be kɛnnin i be niannin ekun. Be klɔklɔli i b'ɔ ti Izraɛl Nyanmiɛn'n.

⁴² Bé wla fili sa nga b'ɔ yoli mannin be'n nin delɛ nga b'ɔ deli be be kpɔfuɛ'm be sa nun'n.

⁴³ Sa kekle ng'ɔ fa yili i Eziptfuɛ'm be su'n, yɛ atrɛ ng'ɔ yili i Zɔan asa'n su'n, bé wla fili.

⁴⁴ Nil nzue ba'n i sama'm be kacili mmoja, i ti Eziptfuɛ'm b'a kwla nɔn-man nzue'n.

⁴⁵ Ɔ yoli man ngɔnsiɛn'm be nɔnnin be, yɛ klɛ'm be sacili be mɛn'n.

⁴⁶ Ɔ fali be fie'm bé su aliɛ'n mannin lalo mun. Ɔ fali be junman bɔ be dili i be fie'm bé su'n i nun ninnge mun mannin aɛcɛ mun.

⁴⁷ Ɔ yoli man nzraama bɔ kɛ nzue tɔ-ɔ ɔ gua'n, ɔ sacili be vinyi mun. Yɛ ɔ yoli man nzue dandan b'ɔ tɔ'n ɔ sacili be sikomɔr waka mun.

⁴⁸ Nzraama guali be nnɛn'm be su, ɔ kunnin be. Ngblannan'n kpɛnnin nnɛn sɔ'm be su ekun, ɔ kunnin be wie .

⁴⁹ I agualiɛ su'n, Nyanmiɛn fali ya dan kpa Eziptfuɛ'm bé wun, i ya sɔ'n ɔ'a yo-man blɛblɛ. Ɔ fali nyrɛnnɛn yili bé su. Ɔ yoli man anz wlɛfuɛ kpanngban kpa be wa wluli be nun.

⁵⁰ Ɔ yili i ya'n i nglo kekle kpa, ɔ yoli man wie'n kunnin be dan, ɔ fali tukpacɛ b'ɔ sa ndɛndɛ yili bé su.

⁵¹ Ɔ kunnin Ezipt lɔ ba klikli'm be kwlaa, yɛ ɔ kunnin Kam i awlo nun talua ba'm be kwlaa.

⁵² Ɔ fɛli i nvle'n i nunfuɛ mun ɔli kɛ bua mun sa. Ɔ kankannin be aawlɛ flɛnnɛn'n nun kɛ bua mun sa.

⁵³ Ɔ fali be ɔli diin, srɛ ɔ'a kun-man be, jenvie'n katali be kpɔfuɛ'm be su.

⁵⁴ Ɔ fali be ɔli i asiɛ'n su ɔliɛ oka nga b'ɔ fɛli i sa sieli su'n i su.

⁵⁵ Ɔ kannin nvle wie'm bé bo be nyrun nan ɔ'a cɛ lika'n ɔ'a man be kɛ ɔ `yo be liɛ titi. Ɔ fali Izraɛl nvle mun sieli i Kanaanfuɛ'm be lika'n nun.

⁵⁶ Kpɛkuun be kannin Nyanmiɛn b'ɔ like fi nun-mɛn i sin'n be niannin. Be jasoli i wun. B'a niɛn-mɛn i mmla'm be su.

⁵⁷ Be ɔli i wun mmua, be jasoli i sin kɛ be nannan'm be sa. Be yoli kɛ ta bɔ be lafi su kpɛkuun be ´to-ɔ i nyanman'n ɔ'a glɔ'n sa.

⁵⁸ Be klɔklɔli Nyanmiɛn, yɛlɛ kɛ be fali be bɔ be si-man Nyanmiɛn'n be amuɛn sɔwlɛ mun yɛ be yili be sraka'm be nun-ɔn. Be sɔli waka sran mun be fa fɔkɔli i anwlɛn.

⁵⁹ Kɛ Nyanmiɛn wunnin i sɔ'n, ɔ fali ya, Izraɛlfuɛ'm bé wun yoli i tɛ.

⁶⁰ Ɔ jasoli Silo lɔ i tannin sua bɔ i nun yɛ ɔ tran sran'm be afiɛn'n nun.

⁶¹ Ɔ mannin atin kɛ i kpɔfuɛ'm be kuku i alaka b'ɔ ti i kwlalɛ b'ɔ kwla'n i nzɔliɛ'n be wɔ. Be fɛli i anyrunnyan'n i nzɔliɛ sɔ'n be ɔli be mɛn nun .

⁶² Ɔ fali ya i nvle'n b'ɔ ti i aja like'n i wun, ɔ man nvle uflɛ wie'm be kunnin i nvle sɔ'n i nunfuɛ mun.

⁶³ Sin kunnin be gbanflɛn mun, be talua'm b'a nyan-man yasua bɔ be ´bo flɛ be kun-ɔn .

⁶⁴ Alɛ'n dili be Nyanmiɛn nyrun jranfuɛ mun, be angboti'm b'a kwla sun-man be .

⁶⁵ Kpɛkuun e min'n wa jasoli kɛ sran b'ɔ su lafi yɛ ɔ'a jaso sa, ɔ jasoli kɛ safunyrɛn wie bɔ ɔ'a nɔn nzan ɔ'a bo yɛ ɔ'a titi i nyin su sa.

⁶⁶ Ɔ boli i kpɔfuɛ nga be su wanndi'n mun, ɔ guali bé nyin ase mlɔnmlɔnmlɔn.

⁶⁷ Ɔ'a bu-man Zozɛf i osu nun ba'm be like fi kun. Ɔ'a kpa-man Efraimfuɛ mun.

⁶⁸ Zida akpasua'n yɛ ɔ kpali-ɔ, Siɔn oka'n yɛ ɔ kloli i-ɔ.

⁶⁹ Lɔ yɛ ɔ kplannin i sua nin-ɔn, ɔ kplɛnnin i kekleke kpa kɛ nyanmiɛn'n b'ɔ la nglo lɔ plaii'n sa. Ɔ kplɛnnin i cinnjin kɛ asiɛ'n bɔ kɛ ɔ o lɛ'n yɛ ɔ wo'n sa.

⁷⁰ Ɔ fali David yoli i sufuɛ, ɔ ko fɛli i bua'm be tuin'n nun lɔ .

⁷¹ I waan David `yaci bua'm be lɛ nan ɔ wa nian Izraɛl'n b'ɔ ti i bɔbɔ Nyanmiɛn i nvle'n nin i aja like'n i su.

⁷² David kusu ngasi ɔ'a nyɛn-mɛn, ɔ tuli i klun dili junman sɔ'n kpa kɛ ɔ fata'n sa. Ngwlɛlɛ kanngan kwlaa ng'ɔ si i'n, ɔ fa tinngɛli nvle sɔ'n.