Jue Mun 76 - NYANMIƐN NDƐ'N 1998

Alɛ bɔ Nyanmiɛn buli i bue Siɔn lɔ'n

1 Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie.

¹ Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie. I waan:

² Nyanmiɛn fɛli i wun kleli Zida lɔ, Izraɛl lɔ'n, i dunman'n ɔ fu.

³ I tranwlɛ'n wo Salɛm, i awlo'n wo Siɔn.

⁴ Lɔ yɛ ɔ bubuli alɛ ninnge'm be nun-ɔn. Ta mun o, nyrɛn mun o, tokofi mun o, ɔ bubuli be nun.

⁵ Nyanmiɛn, kɛ a fin oka nga be ti adudua'n be su lɔ ´ba'n, a yo nyɛnmɛn o, a yo sro o.

⁶ Safunyrɛn'm bɔ be lɛ-man anwlɛn ngowa'n, be lafili sa pɔɔ. Ɔ man be trali be. Sran waka-waka sɔ'm b'a kwla kpli-man bé ti.

⁷ Zakɔb Nyanmiɛn, kɛ a kannin ndɛ kekle kleli nnɛn kpanngɔ mun nin bé su fufuɛ mun'n, be wuli be klun sa kuɛɛn .

⁸ Ee! A yo sro o! ?Kɛ a ko fa ya'n, wan cɛ yɛ ɔ kwla ɔ nyrun jran-an?

^9-10 Kɛ a o nyanmiɛn su lɔ bɔ a ko bu ndɛ'n, kɛ a jaso bɔ a ko de be bɔ be wla'n ti bowa asiɛ'n su'n, srɛ kun sran'm be ngba, be gua sɔ bliin!

¹¹ Sɛ sran'm be fa ya sɛ, i agualiɛ su'n, wɔ yɛ a nyan nyrun be ya falɛ sɔ'n nun-ɔn. Be nga be ko nyan bé ti ɔ́ ya liɛ bɔ a fa nun'n, be ´di cɛn be man wɔ.

¹² Amun `ta Anannganman amun Nyanmiɛn'n i nda kɛ amun ´yo like be mɛn i, yɛ amun `yia nda sɔ'n i nuan. Amun kwlaa nga amun ´wunnge Nyanmiɛn b'ɔ yo sro'n i wun'n, amun `fa ninnge be wa cɛ i.

¹³ Ɔ kan sran'm be su kpɛnngbɛn'm be ase. Asiɛ'n su famiɛn'm be sɛ i nyan.