Jue Mun 73 - NYANMIƐN NDƐ'N 1998

FLUWA I BUE NSAN SU ( Jue 73—89 ) Klunwifuɛ'n i ye b'ɔ nyɛn i'n ti kaan sa

1 Jue nga ti Azaf liɛ.

¹ Jue nga ti Azaf liɛ. I waan: Nanwlɛ, Anannganman yo Izraɛl i kpa. Ɔ yo be nga be anwlɛn'n nun ti weiin'n be kpa kusu.

² Ɔ ka kaan nan m'an tu ajalɛ tɛ, ɔ ka kaan nan m'an tɔ.

³ Afin n wunnin i kɛ be nga be yi Nyanmiɛn'n blo'n, be ninnge'm be yo ye bé sa nun, kpɛkuun min nyin bloli nyin keklefuɛ sɔ'm bé wun.

⁴ Sran sɔ mun'n, sa kekle tɔ-man be su. Be wunnɛn'n ɔ wo bé wun.

⁵ Afɛ nga sran'm be ´fɛ i yɛ'n, be fɛ-man wie. Sa kekle ng'ɔ ´tɔ be nga'm be su'n, ɔ tɔ-man be su wie.

⁶ Wun tulɛ'n ti kɛ be njuaba sa yɛ be wla-a. Sran'm bé sa kekleekle yolɛ'n yɛ ɔ ti be kondro yɛ be kla-a.

⁷ Be anyanbeun'n ti be bu-man sran nga'm be sran. Be klun akunndan be ti-man fiawa.

⁸ Be yo sran'm be finfin. Sran'm be nyrɛnnɛn klelɛ akunndan yɛ be bu-ɔ. Be ijɔ dandan.

⁹ Kɛ be uke bé nuan sa'n, ndɛ tɛ'n yɛ be kan man Nyanmiɛn-ɔn. Ɔ lɛ-man sran kun bɔ bé nuan to-mɛn i asiɛ nga su wa-a .

¹⁰ I ti yɛ man sran'm be kaci bé nyin be wun lɔ bɔ be ndɛ b'ɔ fin bé nuan fite'n, ɔ yo sran sɔ'm be fɛ kɛ nzue bɔ be nɔn'n sa nin-ɔn.

¹¹ Be se kɛ: «Nyanmiɛn wun-man sa wlɛ. ?Ɔ yo sɛ yɛ ɔ kwla si sa ng'ɔ o wa nun-ɔn?»

¹² Amun `nian, be nga be bu-man Nyanmiɛn nin i nuan ndɛ'n be like fi'n, sa kekle tɔ-man be su, yɛ be aunnyan'n yo dan kɔ i nyrun titi.

¹³ Yoo! Min waan n ´tran sein nan n yo-man sa tɛ'n, kannzu n yoli sɔ ngbɛn!

¹⁴ Cɛn kwlakwla n wo afɛ nun. Aliɛ ba'n kwlaa be kle min nyrɛnnɛn.

¹⁵ Kusu sɛ n waan n ´ijɔ kɛ be liɛ'n sa-a, i sɔ'n ti ɔ mma'm be tɛ klelɛ.

¹⁶ Kɛ n tran m buli i wun akunndan lele'n yɛ n wunnin i wlɛ-ɔ. Nanwlɛ, ɔ'a yo-man pɔpɔ.

¹⁷ San cɛn bɔ n wluli Nyanmiɛn i lika'n nun'n yɛ n wunnin i wlɛ weiin kɛ kannzu sa su be su-ɔ.

¹⁸ Kannzu a fa be sie i atin b'ɔ yo ndrɔn'n nun, kpɛkuun a yo man be tɔ sa kekle nun.

¹⁹ Ɔo, srɛ dan b'ɔ kun be'n ti, be nunnun aliɛ ba kunngba nun weiin, nyrɛnnɛn wie yɛ ɔ kun be-ɔ, kpɛkuun be liɛ'n ɔ'a wie.

²⁰ Min Min, a ka lɛ nunnun be man be wun-man be osu kun kɛ laliɛ nun like b'ɔ ka lɛ mlin be klun'n sa.

²¹ I nun bɔ sa sɔ'm be ´yo min ya fiaan'n, bɔ min anwlɛn'n ´be min klun'n,

²² bɔ n wun-man be wlɛ mlɔnmlɔn'n, kannzu n yoli kɛ nnɛn bɔ be lɛ-man akunndan'n sa ɔ nyrun.

²³ Sanngɛ e nin wɔ yɛ e o nun titi-ɔ. A trali mín sa'n, yɛ e nin wɔ e nanti titi-ɔ.

²⁴ Ɔ bɔbɔ wɔ akunndan liɛ'n yɛ a fa tinngɛ min-ɔn, yɛ cɛn kun a ´fa min kɔ wɔ anyrunnyan dan'n i lika'n nun lɔ.

²⁵ ?Nyanmiɛn su lɔ'n, min ukafuɛ yɛlɛ wan, sɛ nán wɔ'n? ?Asiɛ'n su wa'n, nguɛ yɛ n kunndɛ i ekun-ɔn? Afin sɛ n klun ´jɔ-ɔ ɔ fin wɔ, a fa ɔ wun a man min.

²⁶ Nyanmiɛn, kannzɛ min wunnɛn'n ´wiewie o, kannzɛ mín wla'n ´bo mín wun o, sran nga n kisɛ i su b'ɔ ti min liɛ mlɔnmlɔn titi'n yɛlɛ wɔ.

²⁷ Be nga be jaso ɔ wun lɛ be kɔ mmua'n, san be ´tɔ. Yɛ be nga be kaci be sin si wɔ'n, a yi be sran nun mlɔnmlɔnmlɔn.

²⁸ Sanngɛ Nyanmiɛn i tranlɛ bɔ e nin wɔ tran'n ɔ ti min anyanbeun like. Min min Anannganman, n ´fa mín wla'n n gua ɔ su. N ´kan sa kpakpa nga a yoli be'n mun n ´kle sran'm be kwlaa.