Jue Mun 72 - NYANMIƐN NDƐ'N 1998

Nyanmiɛn nga be srɛ be man famiɛn'n

1 Jue nga ti Salomɔn liɛ.

¹ Jue nga ti Salomɔn liɛ. I waan: Ee Nyanmiɛn, yo man famiɛn'n si ndɛ bu kɛ wɔ sa. Kle famiɛn'n i wa'n i nanwlɛ dilɛ.

² Man ɔ di ɔ sran'm be jɔlɛ nin nanwlɛ. Man ɔ bu yalɛfuɛ'm be ndɛ mun i atin su kɛ ɔ fata'n sa.

³ Man oka'm be yo man sran'm be di alaje, man kpɔlɛ'm be man sran'm be ng'ɔ nin be fata'n.

⁴ Man famiɛn'n bu yalɛfuɛ'm be ndɛ mun i atin su kɛ ɔ fata'n sa. Man ɔ de nyrɛnnɛnfuɛ mun. Man ɔ nunkun be bɔ be kle sran'm be yalɛ'n.

⁵ Sɛ wia'n nian sin-man'n, sɛ anglo'n nian sin-man'n, man ɔ tran lɛ titi nan kɛ ɔ ´yo-ɔ ɔ'a yo.

⁶ Man ɔ yo kɛ nzue b'ɔ tɔ ijre bɔ b'a kpɛkpɛ'n su'n su sa. Man ɔ yo kɛ nzue dan b'ɔ lualua asiɛ'n sa.

⁷ Man i blɛ su'n, nanwlɛ dilɛ'n trɛ sran'm be nun. Man be nyan fɔundi lele san anglo'n ɔ'a jaso lɛ .

⁸ Man i yɛ ɔ sie mɛn nin-ɔn . Ɔ `sie i kɛ ɔ fɛ i asiɛ'n i bue kun su b'ɔ ´fa ju i bue kun lɔ'n su'n, yɛ kɛ ɔ fɛ i Efrat'n nuan b'ɔ ´fa ju asiɛ'n i awieliɛ lɔ'n.

⁹ Man aawlɛ flɛnnɛn'n nunfuɛ'm be koto be trɛ i ja'n, yɛ man i kpɔfuɛ'm be la ndutre'n nun.

¹⁰ Tarsis nin asiɛ bɔ nzue sin yia be'n, bɔ be o mmua-mmua lɔ'n be famiɛn'm be wa mɛn i like. Saba nin Seba famiɛn'm be ´fa be ninnge liɛ'm be ´blɛ i.

¹¹ Famiɛn'm be kwlaa be ´koto i bo, mɛnmɛn nunfuɛ'm be kwlakwla be ´su i.

¹² Afin sɛ nyrɛnnɛnfuɛ'n kpan flɛ i'n, ɔ ´de i. Ɔ de yalɛfuɛ b'ɔ lɛ-man wie'n.

¹³ Sran b'ɔ kwla-man nun'n ɔ nin nyrɛnnɛnfuɛ'n be ´yo i annvɔ. Ɔ ´de be.

¹⁴ Ɔ ´de be mianmianlɛ nin yalɛ klelɛ nun, afin sɛ be wu'n ɔ yo i ya.

¹⁵ Man ɔ cɛ cɛcɛcɛ! Man be mɛn i Seba lɔ sika ɔkwlɛ'n wie, be `srɛ Nyanmiɛn be `mɛn i titi, be `yrɛ i nguan cɛn kwlaa.

¹⁶ Man ble'n ɔ su lele ɔ bu mɛn'n nun. Man kpɔlɛ'm be su'n, be `wun kɛ aunngban'n ɔ keje ble ja kpanngban. Man ble sɔ'n i mma'm be sɔn kɛ Liban lɔ kpɔlɛ'm be su liɛ'n sa. Man klɔ'n su sran'm be trɛ kɛ fie'm be su waka'm be sa.

¹⁷ Nán famiɛn'n i dunman'n nunnun le. Man ɔ cɛ kɛ wia'n sa. Man sran'm be fɛ i dunman'n be yra be wiengu nguan. Man mɛnmɛn'm be nunfuɛ'm be kwlaa be se i kɛ: «Nja ɔ liɛ su ti ye!»

¹⁸ Man e la Anannganman Nyanmiɛn b'ɔ ti Izraɛl Nyanmiɛn'n i ase. I kunngba cɛ yɛ ɔ yo abonuan sa mun-ɔn.

¹⁹ Man e la Nyanmiɛn b'ɔ i dunman'n fu'n i ase tititi. Man i nyrun nyannyan'n yi asiɛ wunmuan'n. Man ɔ yo sɔ!

²⁰ David Izai wa'n i srɛwa'n i awieliɛ'n yɛlɛ nga.