Jue Mun 71 - NYANMIƐN NDƐ'N 1998

Nyanmiɛn i sun flɛlɛ

¹ Anannganman, ɔ sin yɛ n kunndɛ n fia-a, nán man n wun nyannzuɛn ngbɛn mlɔnmlɔn.

² Wɔ bɔ a ti nanwlɛfuɛ'n, de min. Man min fiawlɛ kpa. Sie ɔ su mín nuan'n bo nan de min.

³ A ti kɛ yɛbuɛ sa min waan n ´talo wɔ, min waan n ´fia wɔ nun, i liɛ'n n ´fite nun.

⁴ Min Nyanmiɛn, de min klunwifuɛ'm bé sa nun, de mín sa tɛtɛ yofuɛ mun nin sa sakasaka yofuɛ'm bé sa nun.

⁵ Afin min Min Nyanmiɛn, min sunnzunlɛ'n kwlakwla taka ɔ́ su. Kɛ ɔ fin min kaan nun'n, ɔ́ su yɛ n lafi-ɔ.

⁶ Kɛ ɔ fin min nɔnman nun'n, ɔ́ su yɛ n kisa-a. Kɛ ɔ fin cɛn bɔ be wuli min'n, a nian yaci-man min sasalɛ le, i ti kusu n nian yaci-man ɔ manmanlɛ le.

⁷ Sran sunman be bu i kɛ a boli min sannzan, sanngɛ wuun min su nianlɛ li yɛ a niannin kpa liɛ su-ɔ.

⁸ Nán ɔ manmanlɛ jue'n jaso min nuan le. Ɔ lɛ-man cɛn bɔ n kan-man wɔ anyrunnyan'n i wun ndɛ-ɔ.

⁹ Min yɛ m'an yo oke ndɛ yɛ, nán niɛn i sɔ'n ti yi min blo. Sɛ min fanngan'n wie min nun bɔbɔ'n, nán niɛn i sɔ'n ti yi min ase.

¹⁰ Min kpɔfuɛ'm be kan min wun ndɛ. Be bɔ be sasa min cɛnjɛiin'n, be sin yia be ti bé wun aniɛn min wun.

¹¹ Be se kɛ: «Nyanmiɛn ɔ'a yi i ase, amun `su i su! Amun `trɛ i! Ɔ lɛ-man sran fi b'ɔ ´de i amún sa nun-ɔn.»

¹² Ee Nyanmiɛn, nán jran mmua lɔ nian min. Min Nyanmiɛn, kan ɔ́ wun bla wa uka min.

¹³ Man be bɔ min fɔ'n yɛ be bu'n, be wun nyannzuɛn, man be nunnun. Man be bɔ be klo kɛ n wun nyrɛnnɛn'n, be wun nyannzuɛn sa mlɔnmlɔnmlɔn!

¹⁴ N liɛ'n, n ´fa min wla'n n ´gua ɔ́ su, m ´manman wɔ lelele.

¹⁵ N ´kan ɔ́ sa nuan su bɔ a yo'n i ndɛ cɛn kwlaa. N ´kan delɛ bɔ a de sran'n i ndɛ, n su yaci-man. Afin sa kpa nga a yo be'n, be kwla ka-man.

¹⁶ Min Min Anannganman, m ´manman wɔ sa dandan nga a yo be'n ti. Ɔ sa nuan su bɔ a yo'n, wɔ kunngba cɛ wɔ liɛ'n yɛ n ´kɛn i wun ndɛ kpa n kle sran mun-ɔn.

¹⁷ Ee Nyanmiɛn, kɛ ɔ fin min kaan nun'n yɛ a boli min ngwlɛlɛ klelɛ'n i bo-ɔ. N kusu m'an kan wɔ abonuan sa'm be ndɛ lele ɔ'a fa ju ndɛ.

¹⁸ Ee Nyanmiɛn, siɛn'n bɔ m'an yo oke bɔ mín ti'n ɔ'a bo je yɛ'n, nán yi min ase. Man n kan ɔ kwlalɛ bɔ a kwla'n i nun ndɛ n kle min blɛ sufuɛ mun. Man n kan ɔ safunyrɛn sa bɔ a yo be'n n kle be kwlaa nga be ´ba bé sin lɔ'n.

¹⁹ Ee Nyanmiɛn, ɔ sa bɔ a yo i nuan su'n ti, ɔ dunman'n ɔ'a fu. Ɔ sa nga a yo be'n be ti dandan. Nyanmiɛn, a lɛ-man wunsu.

²⁰ Wɔ man n wunnin nyrɛnnɛn dan, wɔ man n wunnin min nyrun kpa. Sanngɛ a ´man min nguan ekun, yɛ a ´yi min ndia nun fite.

²¹ A ´fɔnvɔ min ekun. Wɔ man n ´nyan nyrun kpa tra laa'n.

²² Min Nyanmiɛn, n kusu m ´bo sanngo m ´manman wɔ ɔ nanwlɛ'n ti. Izraɛl Nyanmiɛn, wɔ bɔ a ti-man kɛ klɔ sran sa'n, m ´bo jru'n m ´manman wɔ.

²³ Kɛ m ´bo n ´flɛ wɔ'n, wuun n ´to jue m ´manman wɔ delɛ bɔ a deli min'n ti.

²⁴ Cɛn kwlaa n ´kan ɔ sa bɔ a yo i nuan su'n i wun ndɛ. Be bɔ be kunndɛ kɛ sa nyan min'n, bé nyin'n yɛ ɔ'a gua ase sa mlɔnmlɔnmlɔn-ɔn.