Jue Mun 7 - NYANMIƐN NDƐ'N 1998

Be ti nyanlɛ srɛlɛ

1 Jue nga ti David liɛ.

¹ Jue nga ti David liɛ. Kis b'ɔ ti Bɛnzamɛn akpasua sufuɛ'n i ti yɛ ɔ kpɛli-ɔ. Ɔ to kleli Anannganman. I waan:

² Anannganman min Nyanmiɛn, min waan n ´talo wɔ. De min be kwlaa bɔ be kle min yalɛ'n bé sa nun, yo man n nyan n ti.

³ Sɛ ɔ'a yo-man sɔ-ɔ, be ´titi min nun kɛ asɔmɔli'n b'ɔ tra nnɛn di'n sa. N su nyan-man sran fi b'ɔ ´de min-ɔn.

⁴ Anannganman min Nyanmiɛn, sɛ n yoli sa sakpa'n, sɛ n yoli sa tɛ'n,

⁵ sɛ n yoli min sran kpa wie i sa'n, sɛ n fɛnnin sran ng'ɔ kpɔ min ngbɛn'n i bo ninnge'n,

⁶ man min kpɔfuɛ wie fuan min tra min, man ɔ yi min ase tiatia min su, ɔ kun min nan n dunman saci asiɛ'n su.

⁷ Anannganman, jaso ya su! A nin min kpɔfuɛ mun be `kun! Min Nyanmiɛn, kan min ti ndɛ man min.

⁸ Man nvle-nvle'm be trantran sin yia wɔ. Tran ɔ famiɛn bia'n su nglo lɔ sie be.

⁹ Anannganman, wɔ bɔ a di nvle-nvlefuɛ'm be jɔlɛ'n, kan min ti ndɛ man min, afin m'an yo-man sa.

¹⁰ Yo man klunwifuɛ'm bé sa tɛtɛ bɔ be yo be'n ɔ wie. Yo man sran kpa'm be nyan takawlɛ. A si sran'm be akunndan'n nin sa ng'ɔ o be klun lɔ'n. Nyanmiɛn, a ti kpa.

¹¹ Nyanmiɛn ɔ sasa min kɛ nyrɛn sa, ɔ de sran kpa mun.

¹² Nyanmiɛn ti jɔlɛ difuɛ kun b'ɔ di nanwlɛ. Sanngɛ ɔ nin sa tɛ yofuɛ'n ɔ jranjran-man.

¹³ Sɛ sa tɛ yofuɛ'n ɔ yaci-man atin tɛ'n falɛ mlɔnmlɔn'n, Nyanmiɛn si i tokofi'n, ɔ cuɛn i ta'n nun sie.

¹⁴ Ɔ siesie sran sɔ'n i kunlɛ like'n, ɔ fa sin wlawla i ta mma'm bé nuan, be yo kɛ tɛ sa, ɔ sɔ bé nuan sie.

¹⁵ Klunwifuɛ'n ɔ'a bu abɔlɛ ninnge'm be yolɛ akunndan ɔ'a sie. Ɔ bu sa tɛtɛ'm be yolɛ akunndan sie, kpɛkuun i bo'n ɔ gua-man kɛ ɔ sunnzunnin'n sa.

¹⁶ Ɔ'a kpɛ kunman kploun kpa kun, kpɛkuun i bɔbɔ ɔ'a kaci ɔ'a tɔ nun.

¹⁷ Sa tɛtɛ ng'ɔ yo be'n, be ´tɔ i bɔbɔ i ti su. I klunwi sa sɔ'm be ´kaci tɔ i bɔbɔ su.

¹⁸ M ´manman Anannganman, afin ɔ yo sa i nuan su. N ´to jue m ´bo flɛ Anannganman bɔ like fi nun-mɛn i sin'n.