Jue Mun 69 - NYANMIƐN NDƐ'N 1998

Klolɛ nga David fa klo Nyanmiɛn i sua'n

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru. I waan:

² Ee Nyanmiɛn, de min, nzue'n ɔ'a yi lele ɔ'a ju min kɔmin nun.

³ Nnɔtiɛ wie bɔ m'an tɔ nun'n, i bo'n ti kploun kpa. Mín ja'n nyan-man takawlɛ, m'an tɔ nzue'n i kploun kpa'n nun, ɔ su kpalo min kɔ.

⁴ N kpan lele n fɛ ngbɛn, min alowa'n yo min ya siɛn'n. Min Nyanmiɛn, n nian wɔ atin lele ngbɛn.

⁵ Be bɔ m'an yo-man be sa bɔ sanngɛ bé nyin ci min'n, be sɔnnin tra mín ti ndrɛ'n. Be kpɔ min ngbɛn. Be bɔ be kunndɛ kɛ be ´kun min'n be kwla. Like nga m'an wua-man'n, kɛ e sɔ su lele'n, san n ´yi n sie i osu .

⁶ Ee Nyanmiɛn, sinnzin nga m boli'n, a si. Sa tɛ nga n yoli'n, be ti-man fiawa ɔ nyrun.

⁷ Min Min Anannganman b'ɔ sie mɛn'n wunmuan'n, nán n gua be bɔ be lafi ɔ su'n bé nyin ase. Izraɛl Nyanmiɛn, nán be bɔ be fa be wun mantan wɔ'n be wun nyannzuɛn min dunman nun.

⁸ Ɔ dunman nun ti yɛ man be kpɛ min nzowa nin-ɔn. Ɔ dunman nun ti yɛ man n kwla-man mín ti'n su man nin-ɔn.

⁹ Ɔ man m'an kaci sran ngbɛn min niaan'm be nyrun. M'an kaci aofuɛ mín nin mma'm be nyrun .

¹⁰ Ɔ sua'n i klolɛ'n ɔ'a kun n kpo. Nzowa nga be ko kpɛ wɔ'n, min yɛ be fa kpɛ min-ɔn .

¹¹ N waan man n yo mín wun aunnvuɛfuɛ nan n `ci nglɛmun! Sanngɛ wuun blɛ li yɛ be ´kpɛ min nzowa-a.

¹² N waan man n wla bajɛ tralɛ, sanngɛ ɔ nin i sɔ ngba'n be ´fa min kpɛ flɛn.

¹³ Be bɔ be tian klɔ'n i anuan'n nun'n be fa min kan be ndɛ su. Nzan kekleekle nɔnfuɛ'm be fa min to jue.

¹⁴ Ee Anannganman, n liɛ bɔ n si i'n yɛlɛ wɔ srɛlɛ kunngba. Ee Nyanmiɛn, klun-ufuefuɛ dan, blɛ ng'ɔ ti bɔ a tɛ n su'n yɛ. Wɔ bɔ a yaci-man sran delɛ le'n, tɛ mín su.

¹⁵ Yi min nnɔtiɛ'n nun, nán man m mlɔn. De min min kpɔfuɛ'm bé sa nun, yi min nzue kploun'n nun fite.

¹⁶ Nán nzue'n ɔ kpalo min wɔ, nán man bunman'n mɛn min, nán man ndia'n i anuan'n nyin min su.

¹⁷ Anannganman, tɛ mín su, afin a ti kpa, ɔ klun ti ufue. Aunnvuɛ dan bɔ a si'n ti, nian min nyrun.

¹⁸ Nán ɔ nyin kpɛ min bɔ n ti ɔ sufuɛ'n min wun. N wo nyrɛnnɛn nun. Kan ɔ wun tɛ mín su.

¹⁹ Wunnge min wun wa nan nian min lika. Min kpɔfuɛ'm be ti, de min.

²⁰ A si nzowa nga be kpɛ min'n. A si nyannzuɛn nga n wo nun'n nin sokpalɛ bɔ m'an sokpa'n. Min kpɔfuɛ mun yɛ ɔ́ nyin ta be lɛ-ɔ.

²¹ Min anwlɛn'n kpɛ min klun nzowa'n dunman nun. N kwla sin-man min osu kun. M'an minndɛ kɛ sran wie si min aunnvuɛ lele ngbɛn. N nyan-man sran fi b'ɔ ´fɔnvɔ min-ɔn.

²² Be gua min aliɛ'n nun duwlɛ. Sɛ nzue we kun min'n, vinɛgri yɛ be fa man min-ɔn .

²³ Man bé cɛn dilɛ aliɛ'n nin sraka nga be kun nnɛn be yia be di'n, ɔ tra be kɛ aya sa.

²⁴ Man be nyinma su dun be, nán be wun ase kun. Yo man be wi'n sata be wun titi.

²⁵ Yi ɔ ya ble'n i nglo kle be titi. Fa ya dan kpa nan a nin be `yia nun.

²⁶ Man be nanmue'n nunnun . Nán sran fi ka bé tannin sua'm be nun,

²⁷ afin sran nga a tu i fɔ'n, be yaci-mɛn i ndɛnngan. Be uka be bɔ a yo be like'n be afɛ'n su.

²⁸ Ka sa tɛ nga be yoli'n be kwlakwla. Nán bé wun yo ɔ fɛ le.

²⁹ Nunnun be dunman nguan fluwa'n nun. Nán klɛ be dunman sran nga a bu be kpa'n be fluwa'n nun .

³⁰ N ti min liɛ nyrɛnnɛnfuɛ, n wo afɛ nun. Ee Nyanmiɛn, de min, man n jaso ekun.

³¹ N ´to jue m ´bo gua ɔ wun. M ´manman wɔ, m ´bo gua ɔ wun.

³² Anannganman, a klo i sɔ'n tra kɛ m'an kun nannin m'an man wɔ'n. A klo i sɔ'n tra nannin tola b'ɔ lɛ wunmiɛn kpa'n bɔ be kun i be man wɔ'n.

³³ Be bɔ be lɛ-man nyrun'n, be wun i-ɔ, bé wun sanndi be. Amun bɔ amun mantan Nyanmiɛn'n, man amun cɛ cɛcɛcɛ o!

³⁴ Anannganman ti yalɛfuɛ'm be aniɛn. I fuɛ nga be o kanga nun'n, be ndɛ lo i.

³⁵ Man nglo lɔfuɛ mun nin asiɛ'n sufuɛ mun, ɔ nin jenvie'n nin i nun ninnge'n kwlaa be mɛnmɛn i.

³⁶ Afin ɔ ´de Siɔn. Ɔ ´kplan Zida klɔ mun. I sran'm be wa tran lɛ, be ´fa yo be liɛ.

³⁷ I sufuɛ'm bé bo mma'm be wa fa yo be aja like. Be bɔ be klo i'n be wa tran lɛ.