Jue Mun 68 - NYANMIƐN NDƐ'N 1998

Nyanmiɛn b'ɔ kwla'n i manmanlɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Man Nyanmiɛn mɛn i wun su nan i kpɔfuɛ'm be bo be sanndi. Man be nga be klo-mɛn i sa'n be wanndi i nyrun.

³ Man klunwifuɛ'm be tu Nyanmiɛn i wun lɛ kɛ sin wɛnsrɛn b'ɔ wie'n sa. Man be tu lɛ kɛ wɛma'm be sua bɔ sin'n ɔ'a kɛn i'n sa.

⁴ Sanngɛ sran nga Nyanmiɛn bu be sran kpa'n, man be klun jɔ, man be tu be kpɛn Nyanmiɛn nyrun, man be bo sro.

⁵ An `to jue manman Nyanmiɛn, amun `bo flɛ i! Amun `trɛ atin'n nun be `man sran b'ɔ fa nyanmiɛn ble'n yo i nnɛn kpanngɔ fu su'n. Ɔ suan Anannganman. Amun `tu kpɛn si able i nyrun.

⁶ Nyanmiɛn o i tranwlɛ'n nun lɔ, ɔ ti aika'm bé si, ɔ ti angboti bla'm bé sin jranfuɛ.

⁷ Nyanmiɛn man be bɔ be lɛ-man sran'n be awlo. Ɔ yo man be bɔ be ti bisuafuɛ'n be nyan fɔundi. Nyin keklefuɛ'm be kunngba yɛ be ka asiɛ kee'n su-ɔ.

⁸ Nyanmiɛn, kɛ a dunnin mmua ɔ sran'm be nyrun'n, kɛ a nantili aawlɛ flɛnnɛn'n nun lɔ'n,

⁹ asiɛ'n kejeli. Wɔ bɔ a ti Nyanmiɛn'n, bɔ a ti Izraɛlfuɛ'm be Nyanmiɛn'n, nyanmiɛn'n b'ɔ la nglo lɔ plaii'n, ɔ kloli ɔ nyrun Sinai lɔ.

¹⁰ Ee Nyanmiɛn, wɔ man nzue'n tɔli kpa piɔɔ ɔ mɛn'n b'ɔ wuli kee'n su.

¹¹ Ee Nyanmiɛn, ɔ klun-ufue'n ti ɔ sran'm be wa trannin mɛn sɔ'n b'ɔ a siesieli i kɛ a ´fa man be bɔ be ti nyrɛnnɛnfuɛ'n i nun.

¹² Kɛ e Min'n kan ndɛ kunngba sa cɛ'n, kpɛkuun bla nga be bo jasin kpa be sin'n b'a ba kpanngban kɛ sonja mun sa.

¹³ E kpɔfuɛ'm be sonja mun be nin be famiɛn mun be wanndi-man ngowa. Bla nga be kali awlo wa'n, be cɛcɛ ninnge nga sonja sɔ'm be nyɛnnin i laa'n be nun.

¹⁴ Ninnge sɔ'n wie'm be ti jɛtɛ ufue, yɛ wie'm be ti sika ɔkwlɛ, kusu wuun amun o nanmue nun lɔ amun ´lafi.

¹⁵ Kɛ Nyanmiɛn'n b'ɔ kwla like kwlaa yo'n ɔ ´sanngan famiɛn'm be nun'n, wuun like wie su fin nyanmiɛn'n su lɔ gua Salmɔn oka'n su minndi-minndi-minndi fuai kɛ nyanmiɛn ufue fitafita'n sa.

¹⁶ Be sɔ ninnge Bazan oka'n su. Oka sɔ'n i ti'm be sɔnnin.

¹⁷ ?Amun bɔ amun sɔ ninnge mun oka bɔ i ti'm be sɔnnin'n su'n, onin yɛlɛ amun nyin bɔ amun fa blo be nga be sɔ Anannganman i oka b'ɔ kloli i'n b'ɔ fɛli i kɛ ɔ ´fa yo i tranwlɛ'n i wun'n? Anannganman ´tran lɛ titi.

¹⁸ Nyanmiɛn i kakaklolo'm be ti akpi-akpi, be sɔnnin sɔnlɛ kpa. Ɔ fali be Sinai oka'n su lɔ yɛ ɔ bali i lika kpa nun wa-a.

¹⁹ Anannganman Nyanmiɛn, kɛ a fuli nglo lɔ'n a fali be bɔ a trali be lomuɛn mun ɔli. A ko trannin lɔ. A deli sran mun be lapo, a deli nyin keklefuɛ mun be wie bɔbɔ .

²⁰ Man be la e Min'n i ase cɛn kwlakwla. Nyanmiɛn b'ɔ de ye'n, ɔ nian e lika.

²¹ Nyanmiɛn'n yɛ man e nyan e ti-ɔ. Anannganman Nyanmiɛn'n ɔ si kɛ ɔ ko yo nan y'a fin wie'n i nuan nun y'a fite'n.

²² Nanwlɛ, Nyanmiɛn ´bo i kpɔfuɛ'm bé ti awa'n, ɔ ´bo be bɔ be yo sa tɛ'n bé ti bɔ ndrɛ kpanngban o su'n.

²³ E Min'n waan: «N ´fa be Bazan lɔ m ´ba. N ´fa be jenvie'n bo lɔ m ´ba

²⁴ nan a `tiatia ɔ kpɔfuɛ sɔ'm be mmoja'n nun, nan wɔ alua'm b'a nyan be nnɛn'n wie b'a di.»

²⁵ Ee Nyanmiɛn, wɔ bɔ a ti min Nyanmiɛn'n, wɔ bɔ a ti min famiɛn'n, be wunnin kɛ ɔ sran'm be suli wɔ su woo be ɔli ɔ́ sua saun'n nun lɔ.

²⁶ Jue tofuɛ mun yɛ be dun mmua-a, be nga be bo ngowa kanlɛ ninnge fanunfanun'm be o siɛn, yɛ talua'm be o afiɛn. Kɛ be ´kɔ'n, wuun talua'n be ´bo klɛn kanngan mun.

²⁷ Amun `la Nyanmiɛn ase anyia'm be nun, amun bɔ amun ti Izraɛlfuɛ'n, amun `la e Min'n i ase.

²⁸ Bɛnzamɛn b'ɔ ti be nun kaan'n yɛ ɔ sie be-ɔ: i Zida kpɛnngbɛn mun nin be sonja mun o, i Zabilɔn kpɛnngbɛn mun o, i Nɛftali liɛ mun o, i yɛ ɔ sie be-ɔ.

²⁹ Min Nyanmiɛn, yi ɔ kwlalɛ bɔ a kwla'n i nglo kle ye. Ɔ kwlalɛ bɔ a kwla'n ti a yoli wie mannin ye o!

³⁰ A o ɔ sua'n nun lɔ yɛ a sie Zerizalɛm nin-ɔn. Famiɛn'm be ´fa be lapo mun be blɛ wɔ.

³¹ Ijɔ Eziptfuɛ mun bɔ be ti kɛ ndɛma wie nun nnɛn mun sa. Ijɔ be, afin be ti kɛ nannin tola akpasua kun nin bé bo mma mun sa'n. Man be koto tra ɔ ja nan be fa sika be su lapo be man wɔ. Sanngan nvle nga be klo alɛ'n be nun.

³² Be nga be jran Ezipt mɛn'n i nuan'n be fin lɔ be ba, Etiopifuɛ'm be wanndi ndɛndɛ be ba, be yi bé sa'n be kle Nyanmiɛn.

³³ Asiɛ'n su mɛnmɛnfuɛ mun, amun `to jue manman Nyanmiɛn. Amun `bo flɛ e Min'n

³⁴ b'ɔ fu i nnɛn kpanngɔ'n su nyanmiɛn b'ɔ la nglo lɔ plaii'n b'ɔ o lɛ titi'n su lɔ'n. Ɔ'a mɛn i nɛn'n su, ɔ kpan sa fiaan fiaan.

³⁵ Amun `kɛn i kpa man be ti i kɛ Nyanmiɛn'n ɔ kwla. I dunman dan'n wo Izraɛl su. I kwlalɛ b'ɔ kwla'n ɔ fu lele ju nyanmiɛn ble'n nun lɔ.

³⁶ Kɛ Nyanmiɛn'n wo i sua nun lɔ'n, ɔ yo sro. Izraɛl Nyanmiɛn'n yɛ ɔ man i fuɛ'm be fanngan, i yɛ ɔ yo man be kwla-a. E `la Nyanmiɛn'n i ase!