Jue Mun 65 - NYANMIƐN NDƐ'N 1998

Nyanmiɛn nin manmanlɛ'n ɔ fata

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Ee Nyanmiɛn, wɔ bɔ a o Siɔn klɔ'n nun lɔ'n, a nin manmanlɛ fata. Sɛ be ta ɔ nda'n, ɔ nin i fata kɛ be yo i nuan like.

³ Sɛ be srɛ wɔ-ɔ, a ti. Sran'm be kwlaa be ´ba ɔ sin.

⁴ E fɔnlɛ nga e fɔn'n, e suɛn i bo-ɔ ɔ yo-man ye, sanngɛ a ´yaci be cɛ ye.

⁵ Sran nga a kpɛ i bɔ a fɛ i mantan ɔ wun nan ɔ tran ɔ sua nun'n, i liɛ su ti ye! Ɔ sua'n nun lɔ ninnge kpakpa'n bɔ be man sran muae'n, e waan e ´fa wie é ti é wun nyanman nun!

⁶ Nyanmiɛn, a de ye. A kaci-man mlɔnmlɔn. A yo abonuan sa mun fa tɛ e su. Nvle nga be fɛ i wa lele ju asiɛ'n i bue kun lɔ'n be nunfuɛ'm be kwlaa, ɔ nin mɛn nga be o jenvie nuan'n mmua lɔ'n be nunfuɛ'm be kwlaa, ɔ́ su yɛ be lafi-ɔ.

⁷ Ɔ fanngan nun yɛ man oka'm be taka lɛ-ɔ. A lɛ tinmin dan.

⁸ A kan jenvie b'ɔ bo'n i ase, a kɛn i nzue'n b'ɔ keje'n i ase. A kan ndɛnngan ng'ɔ o nvle-nvle'm be afiɛn'n i ase.

⁹ Kɛ ɔ fɛ i lele b'ɔ ´fa ju asiɛ'n i awieliɛ'n lɔ'n, kɛ sran'm be wun sa nga a yo be'n, be akunndan sanngan be klun. Wɔ man wia afiliɛ lɔfuɛ mun nin wia atɔliɛ lɔfuɛ'm be bo sro.

¹⁰ A nian asiɛ'n i lika, a tɔ su nzue kpa sakpa, wɔ man i su ninnge'm be yo kpa lele kpe nun. Ee Nyanmiɛn, ɔ nzue ba b'ɔ sonji'n, ɔ ti yiwa piɛ. A yo man e ble'n ɔ yo ye. Wafa nga a fa siesie asiɛ'n i ye'n yɛ ɔ o yɛ:

¹¹ a kɛn i lika nga b'a bo tɔlɛtɔlɛ'n be ase, a gua kofie'm be su nzue, a gua asiɛ'n su nzue ɔ kpɔtɔ lengeiin, wɔ man like nga be luali'n ɔ yo ye.

¹² A yo man afuɛ b'ɔ boli i bo kpa'n, i nuan'n ɔ'a yia klanman. Kan a sin lɛ'n, lɛ ninnge'm be yo ye lele kpe nun.

¹³ Nnɛn'm be didiwlɛ nga be o blo lɔ'n, be kusu be yo ye. Sran'm be klun b'ɔ jɔ'n ti be kpan bo sin yia kpɔlɛkpɔlɛ kanngan mun pɛ.

¹⁴ Bua mun nin boli'm be tru nnɛn'm be didiwlɛ'm be nun trutrɛɛ, lika tɔnun'm be nun'n, be di-man ble'n i yalɛ. Bo srolɛ nin jue tolɛ ngunmin yɛ be ti-ɔ.