Jue Mun 63 - NYANMIƐN NDƐ'N 1998

Nyanmiɛn i klun-ufue bɔ i kpa tra nguan'n

1 Jue nga ti David liɛ. Ɔ kan blɛ nga David o Zida aawlɛ flɛnnɛn'n nun lɔ'n i ndɛ .

¹ Jue nga ti David liɛ. Ɔ kan blɛ nga David o Zida aawlɛ flɛnnɛn'n nun lɔ'n i ndɛ . I waan:

² Ee Nyanmiɛn, a ti min Nyanmiɛn, n kunndɛ kɛ m ´mantan wɔ. Mín wla lo wɔ. N ti kɛ asiɛ bɔ nzue tɔ-man su, bɔ ɔ'a wu kee, bɔ ɔ'a tɛtɛ ɔ su srɛ nzue'n sa.

³ N kunndɛ kɛ n ´wun wɔ ɔ sua b'ɔ ti saun'n nun lɔ nan n ´wun ɔ fanngan nin wɔ anyrunnyan'n bɔ be fite nglo'n.

⁴ Afin ɔ klun-ufue'n i kpa tra nguan'n. N ´fa mín nuan'n n ´yi wɔ ayɛ.

⁵ Kɛ min nyin tɛ o su'n, wɔ asenna'n su wie-man n sa nun le. M ´man n sa'm be su m ´manman wɔ.

⁶ N klun ɔ ´jɔ dan kɛ m'an nyan like kpakpa m'an di sa. M muan mín nuan-an ɔ yo-man ye, san manmanlɛ cɛ yɛ m ´manman wɔ-ɔ.

⁷ Kɛ n la min bɛ'n su'n, mín nyin kpɛn ɔ su. M bu wɔ akunndan kɔnguɛ dɔ kwlaa su.

⁸ Afin a ti min ukafuɛ, kɛ n wo ɔ ndɛwa'n bo'n, min klun'n ti jɔwa ti n kpan kpan.

⁹ Ɔ su yɛ n fa min wla'n kwlaa n gua-a, ɔ sa fama'n yɛ ɔ suan min bo-ɔ.

¹⁰ Be bɔ be kunndɛ kɛ be ´kun min'n, man be bɔbɔ yɛ be wu be wɔ blɔlɔ-ɔ.

¹¹ Man be wɔ sran sɔ'm be kue sa bi! Man nsoso'm be di be fuɛn'n.

¹² Kpɛkuun ɔ fanngan nun man famiɛn'n i klun jɔ. Sran kwlaa ng'ɔ ta nda ɔ dunman nun'n, san ɔ ´fa nda sɔ b'ɔ tali'n di i nuan. Ato buafuɛ'm be liɛ'n, be nuan'n ´muan.