Jue Mun 6 - NYANMIƐN NDƐ'N 1998

Sran ng'ɔ o awlaboɛ nun'n i srɛlɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n i wie. I waan be `fa jru ng'ɔ lɛ nyanman mɔcuɛ'n.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n i wie. I waan be `fa jru ng'ɔ lɛ nyanman mɔcuɛ'n. I waan:

² Anannganman, kannzɛ w'a fa ya'n, nán bo min. Kannzɛ bɔ ɔ ya'n ɔ'a yo dan'n, nán tu min fɔ.

³ Anannganman, si min aunnvuɛ, afin n lɛ-man wunmiɛn. Anannganman, yo min juejue! Afin n su fɛ ngboko.

⁴ Min wla'n ɔ ti bowa. ?Anannganman, blɛ onin yɛ a ´uka min-ɔn?

⁵ Anannganman, bla wa de min! Nian ɔ klun-ufue'n ti nan de min.

⁶ Kɛ sran'n ko wu'n, i wla kpɛn-man wɔ su kun. ?Blɔlɔ lɔfuɛ onin cɛ yɛ ɔ manman wɔ-ɔ?

⁷ Kɛ n kplin lele'n, kpɛkuun min wunmiɛn'n ɔ wie. Sunlɛ dunman nun ti min nyinmuɛn'n ɔ lua min bɛ'n kɔnguɛ kwlaa. Min nyinmuɛn nzue'n ɔ lua bɛ'n sa pɔtɔɔ!

⁸ Mín nyinma'm b'a yo sisraii awlaboɛ'n ti. Min kpɔfuɛ'm be ti, n nyan-man min wun kpɔciwlɛ mlɔnmlɔn.

⁹ Amun bɔ amun yo sa tɛ'n, amun `fa jaso min wun lɛ. Afin Anannganman ɔ'a ti min sunlɛ'n .

¹⁰ Anannganman tili min aunnvuɛ srɛlɛ'n, Ɔ sieli i su min srɛlɛ'n bo.

¹¹ Man nyannzuɛn'n kun min kpɔfuɛ mun. Man be akunndan'n ɔ sanngan. Man be fa be nyrun nyannzuɛn be sa be sin ndɛndɛ.