Jue Mun 55 - NYANMIƐN NDƐ'N 1998

Sran bɔ be yi i mannin'n i srɛlɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n i wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n i wie. I waan:

² Ee Nyanmiɛn, sie wɔ su, tie min srɛwa'n, n jran su kekle kpa, nán jaso mín bo.

³ Tie min ndɛ'n nan tɛ min su. N wlan n sin sa ngbɛn, n kwla n tran-man diin.

⁴ Ndɛ nga min kpɔfuɛ'n kan'n nin yalɛ nga klunwifuɛ'm be kle min'n ti-ɔ. Afin be fa nyrɛnnɛn yi min su, b'a fa ya dan kpa, be su min su.

⁵ Srɛ kun-man min ngowa, wie'n i wun srɛ kun min kpa sakpa.

⁶ Srɛ'n ɔ'a kun min kpo! N usu sa tututu.

⁷ Min waan: ?Ee, sɛ n lɛ ndɛwa kɛ auble sa'n, wuun n tu n ko tran-man lika wie bɔ cɛ?

⁸ Wuun n ´wanndi n ´kɔ mmua, wuun n ´ko tran aawlɛ flɛnnɛn'n nun lɔ,

⁹ wuun n ´nyan aunngban dan b'ɔ ´fita'n i wun fiawlɛ kun icra'n.

¹⁰ Min Min, sanngan be aniɛn'n nun. Like nga n wun i klɔ'n nun'n yɛlɛ sa kekleekle nga be yo be'n nin ngondin nga be tu'n.

¹¹ Wia nun o, kɔnguɛ o, be wun ninnge sɔ'n klɔ'n i wun talɛ'n su. Klɔ'n nun ti nyrɛnnɛn nin afɛ,

¹² ɔ nin sa tɛtɛ ngunmin. Ndrunmun dilɛ'n nin gblɛ kpɛlɛ'n be jaso-man klɔ'n nun.

¹³ Sɛ sran ng'ɔ kpɛ min nzowa'n ɔ ti min kpɔfuɛ titi'n, wuun ɔ yo-man min ya sɔ. Sɛ sran ng'ɔ jaso min wun'n i nyin ci min titi'n, wuun n sasali mín wun i lika.

¹⁴ Kpɛkuun wɔ bɔ a nin min ti kun bɔ a ti min janvuɛ'n, bɔ e nin wɔ e san nun'n,

¹⁵ bɔ laa e nin wɔ e ti koko nnya nun-ɔn, ɔ ti-man'n, wɔ yɛ a yo sa nin-ɔn. Wɔ bɔ e nin wɔ nin sran mun e kɔ Nyanmiɛn i sua'n nun lɔ'n, wɔ yɛ a yo sa nin-ɔn.

¹⁶ Man wie'n fu min kpɔfuɛ'm be nun o! Nán be wu nan b'a ɔ blɔlɔ o! Afin be ti tɛ ngboko, klunwi'n yɛ be yo be sin-ɔn!

¹⁷ N liɛ'n, n kpan n flɛ Nyanmiɛn, kpɛkuun ɔ'a de min.

¹⁸ Nglɛmun o, wia jran o, kɔnguɛ o, n kplin, n fɛfɛ n sun n flɛ i, kpɛkuun ɔ ti min aniɛn'n.

¹⁹ Ɔ de min sa blɛlɛlɛ min kpɔfuɛ kpanngban bɔ be nin min kun'n bé sa nun.

²⁰ Kɛ ɔ fin adudua'n, i yɛ ɔ ti Nyanmiɛn-ɔn. Nyanmiɛn ´ti min aniɛn, ɔ ´gua bé nyin ase man min. Afin be kaci-man le. Be sro-man Nyanmiɛn.

²¹ Nian, gblɛfuɛ'n, ɔ nin i janvuɛ mun b'a nyɛn i. Nda ng'ɔ tali'n, ɔ'a di-man su kun.

²² I nuan nun ndɛ'n ti sa wɛtɛɛ, ɔ ti sa fɛfɛfɛ! Sanngɛ i like b'ɔ klo i'n yɛlɛ alɛ. I nuan nun ndɛ'm be ti kɛ ngo mɔntɔɔn wie sa, kusu wuun be la kpa kɛ kue sa.

²³ Fa sa ng'ɔ o ɔ́ su'n kwlaa wlɛ i Anannganman sa nun, ɔ ´suan ɔ bo. Ɔ su yaci-mɛn i sufuɛ kpa'n lɛ man srɛ kun-mɛn i nan i wun usu-mɛn i .

²⁴ Nyanmiɛn, wɔ man sran sɔ'm be ´wu be ´sie be. Sran kunfuɛ nin gblɛfuɛ sɔ'm be ju-man be nguan nyanman'n i afiɛn. N liɛ'n, ɔ su yɛ mín wla'n wo-ɔ.