Jue Mun 51 - NYANMIƐN NDƐ'N 1998

Sa tɛ'n i yaci cɛlɛ i srɛlɛ

1-2 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ David nin Bat-Seba be sili sua bɔ Natan b'ɔ ti Nyanmiɛn nuan ijɔfuɛ'n ko wunnin i wun'n, i sin yɛ ɔ kpɛli jue sɔ nin-ɔn .

^1-2 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ David nin Bat-Seba be sili sua bɔ Natan b'ɔ ti Nyanmiɛn nuan ijɔfuɛ'n ko wunnin i wun'n, i sin yɛ ɔ kpɛli jue sɔ nin-ɔn . I waan:

³ Ee Nyanmiɛn klun ufuefuɛ, yo n ye. Nian wɔ aunnvuɛ bɔ a si klɔ sran'n ti, nunnun min sa tɛ mun.

⁴ Wunnzin min weiin kpa, man fɔnlɛ bɔ n fɔnnin'n ɔ wie. Yo min saun kpa man min wun sa'n kwlaa wie weiin.

⁵ Afin n wun sa tɛtɛ nga n yo be'n. Sa tɛtɛ sɔ'm be sinsin min nyin su.

⁶ Ɔ kunngba yɛ n yoli wɔ sa nin-ɔn. N yoli sa nga a klo-mɛn i'n. Ɔ man kɛ a ´di min jɔlɛ'n, ndɛ nga a ´kan gua su'n, i kanwlɛ su-ɔ, yɛ n fɔ nga a ´bu, i buwlɛ su-ɔ .

⁷ Nian, sa tɛ nun yɛ be wuli min-ɔn, afin sa tɛ nun yɛ min nin wunnzɛli min-ɔn .

⁸ Kusu like bɔ a klo kɛ ɔ tran klɔ sran nun'n yɛlɛ nanwlɛ'n, ɔ man yo man n si ngwlɛlɛ kpa sakpa.

⁹ Yo man min wun sa'n wie nan man n yo saun, wunnzin min nan n fɛn fitafita.

¹⁰ Kan ndɛ fɛ kle min man min wun kpaja min nan n klun jɔ. Sɛ a yo sɔ'n, min bɔ a kleli min nun'n, min wun ɔ ´sanndi min.

¹¹ Yi ɔ nyin mín sa tɛ'n su, nunnun sa nga n yoli'n kwlaa.

¹² Ee Nyanmiɛn, man min anwlɛn kun bɔ i nun ti weiin, yo man n sin min osu nun n `fa akunndan kpa nan ɔ ka min nun.

¹³ Nán fuan min man n jaso ɔ nyrun lɛ, nán yi ɔ Wawɛ b'ɔ o min nun'n.

¹⁴ Aklunjuɛ nga i nun bɔ a de min a fa mannin min'n, fa man min ekun, yɛ man ɔ Wawɛ klun ufuefuɛ'n ɔ suan min bo.

¹⁵ N ´fa wɔ atin'n n ´kle be nga be jaso ɔ́ wun'n, kpɛkuun be nga b'a fɔn'n be ´sa be sin be ba ɔ sin.

¹⁶ Ee Nyanmiɛn, Nyanmiɛn, wɔ yɛ a ti min defuɛ nin-ɔn! De min wie'n i nuan nun. Man m bo delɛ bɔ a deli min'n i jɔ n sin.

¹⁷ Min Min, uke mín nuan'n man m manman wɔ.

¹⁸ A kunndɛ-man sraka fi, sɛ ɔ ti-mɛn i ti'n, wuun n ´yi wie m ´man wɔ. A kunndɛ-man tɛ nga be yrɛ i nnɛn'n kɔlikɔli'n bɔbɔ .

¹⁹ Sraka nga Nyanmiɛn kunndɛ'n yɛlɛ bé wun ase kanlɛ b'ɔ man be di sa nga be yoli'n i nanwlɛ'n. Ee Nyanmiɛn, sran ng'ɔ yo sɔ'n, i wun yo wɔ fɛ.

²⁰ Man Siɔn klɔ'n i ndɛ lo wɔ, yo i kpa. Kplan Zerizalɛm klɔ'n i wun talɛ'n uflɛ!

²¹ I liɛ'n, sraka nga be ti su'n ɔ nin tɛ nga be yra be nnɛn'n kɔlikɔli'n, sɛ be yi be man wɔ'n, a ´sɔ nun. I liɛ'n, be ´kun nannin tola wie mun ɔ sɔwlɛ'n su.