Jue Mun 50 - NYANMIƐN NDƐ'N 1998

Nyanmiɛn ba kɛ ɔ wa di jɔlɛ

1 Jue nga ti Azaf liɛ.

¹ Jue nga ti Azaf liɛ. I waan: Nyanmiɛn'n, Nyanmiɛn'n, Anannganman'n su kan ndɛ. Kɛ ɔ fɛ i wia afiliɛ lɔ lele b'ɔ fa ju wia atɔliɛ lɔ'n, ɔ flɛ asiɛ wunmuan'n i sufuɛ mun.

² Siɔn b'ɔ ti klanman dan'n, i nun lɔ yɛ Nyanmiɛn'n ɔ fin-ɔn. Ɔ kpaja weiin yɛ ɔ ba-a.

³ E Nyanmiɛn'n su ba, ɔ muɛn-mɛn i nuan. Sin kun b'ɔ yra like kɔlikɔli'n dun mmua i nyrun, aunngban dan kun fita bo sin yiɛ i.

⁴ Ɔ flɛ nyanmiɛn b'ɔ la nglo lɔ plaii'n su lɔfuɛ mun nin asiɛ'n su wafuɛ mun. Ɔ flɛ be kɛ be wa trɛn i nvle'n i jɔlɛ b'ɔ wa di'n i bo.

⁵ I waan: «Amun `yia min sufuɛ nanwlɛfuɛ mun bɔ be yi sraka be fa tali min nda kɛ be nin min ´tra aenguɛ'n.»

⁶ Kpɛkuun nyanmiɛn su lɔfuɛ'm be wa kpan be ´se kɛ: «Nyanmiɛn'n di nanwlɛ, i yɛ ɔ ti jɔlɛ difuɛ nin-ɔn.»

⁷ Min sran mun, min bɔ n ti Nyanmiɛn'n, min bɔ n ti amun Nyanmiɛn'n, amun `sie amún su man n kan ndɛ n kle amun. Izraɛlfuɛ mun, amún wun ndɛ ng'ɔ o min klun'n, n wa kan kle amun.

⁸ Nán sraka nga amun yi be'n be ti yɛ n ijɔ amun-ɔn. I kpa'n bɔ, tɛ nga be yrɛ i nnɛn'n kɔlikɔli'n, ɔ lɛ-man cɛn kun bɔ amun yi-man-an.

⁹ M'an se-man kɛ n ´kɔ amun awlo n ´ko fa nannin tola bɔ kun, annzɛ kusu m'an se-man kɛ n ´kɔ amun tuin'n nun lɔ n ´ko fa amun boli kpakpuɛ'n wie.

¹⁰ Bo nun nnɛn'm be kwlaa be ti min liɛ. Kpɔlɛ akpi-akpi bé su nnɛn'm be ti min liɛ ekun.

¹¹ N si anunman nga be tu sin'n be ngba. Nnɛn nga be nanti sin lika'm be nun'n, be kwlaa be ti min liɛ.

¹² Sɛ bɔ awe kun min'n, n su kan kle-man amun, afin asiɛ'n nin i su ninnge'n kwlaa ti min liɛ .

¹³ ?Be waan n di nannin'm be nnɛn? ?Be waan n nɔn boli'm be mmoja?

¹⁴ Yi min asenna tɛ'n man min, yɛ fualɛ nga a fua kleli min bɔ like fi nun-man n sin'n kɛ a ´yo like wie man min'n, yiɛ i nuan.

¹⁵ Sɛ nyrɛnnɛn tɔ wɔ su'n, kpan flɛ min, n ´de wɔ kɛ ɔ ´yo nan ɔ kusu w'a yi min ayɛ'n ti.

^16-17 Nyanmiɛn usa klunwifuɛ'n kɛ: «?Ɔ bɔ be ijɔ wɔ-ɔ ɔ yo-man wɔ fɛ'n, bɔ a yi min ndɛ'n i ase'n, wan li yɛ i waan a kan min mmla nin-ɔn? ?Wan li yɛ i waan a bo aenguɛ'n bɔ e nin wɔ trali'n su di jɔlɛ-ɔ?

¹⁸ Kɛ a wun awiefuɛ'n, a nin i-ɔ, sran ng'ɔ kunndɛ bla i yi bo annzɛ bian i wun bo'n, a nin i bé bo ti kun.

¹⁹ Sran'm bé wun ndɛ tɛtɛ kanlɛ'n, ɔ mian-man wɔ nuan nun kaan sa. Ato bualɛ'n yɛ ɔ ti wɔ junman bɔ a di-ɔ.

²⁰ Kɛ a tran ase sa'n, ɔ niaan'n i wun ndɛ cɛ yɛ a kan-an. A saci ɔ́ nin i ku sɛ'n nun ba'n i wun.

²¹ Sa nga a yoli'n yɛ ɔ o lɛ-ɔ, sanngɛ m'an kan-man ndɛ. A bu i kɛ wuun n ti kɛ wɔ sa. N wa ijɔ wɔ yɛ sa nga a yoli'n b'ɔ ti-man kpa'n, n wa tutu nun weiin-weiin n kle wɔ.

²² Amun bɔ amún wla nun-man min su kun'n, amun `bu ndɛ nga n kannin'n i akunndan. Ɔ'a yo-man sɔ-ɔ, cɛn nga n ´jɔjɔ amun nun'n, sran fi su de-man amun.

²³ Sran ng'ɔ manman min'n yɛlɛ sran ng'ɔ si min wun ye'n, yɛ i yɛ ɔ ti min ayɛ yifuɛ-ɔ. Sran ng'ɔ nian i nantilɛ'n su'n, n wa yi min wun nglo n kle i kɛ min yɛ n de sran mun-ɔn.»