Jue Mun 49 - NYANMIƐN NDƐ'N 1998

Kɛ sran'n ɔ ´wu kɔ'n, ɔ nin like fi kɔ-man

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Be waan:

² Sran'm be kwlakwla, amun `tie ndɛ nga e wa kan'n. Amun kwlakwla bɔ amun o mɛn'n nun'n, amun `sie amún su.

³ Be nga be lɛ nyrun nin be nga be lɛ-man nyrun'n, yalɛfuɛ mun nin anyanbeunfuɛ mun, amun kwlakwla amun `sie amún su tie.

⁴ N su wa kan ngwlɛlɛ ndɛ wie mun. Min klun lɔ akunndan'm be ti ngwlɛlɛ akunndan.

⁵ N ´fa mín su n sie i nyanndra nun ndɛ'm be su. Sɛ m ´bo jru'n yɛ n wa yiyi min nyanndra'm be nun-ɔn.

⁶ ?Sɛ nyrɛnnɛn blɛ'n ju'n, sɛ min kpɔfuɛ'm be cɛncɛn min'n, nguɛ ti yɛ man srɛ ko kun min-ɔn?

⁷ Ninnge kpanngban bɔ min kpɔfuɛ sɔ'm be lɛ i'n i su yɛ be lafi-ɔ, be fa be anyanbeun'n be fa di bé nuan.

⁸ Sanngɛ sran kun sa de i niaan uflɛ-ɔ, ɔ yo-man ye. Sran fi kusu kwla man-man Nyanmiɛn i sika kɛ ɔ ´fa to i bɔbɔ i ti.

⁹ Sran kun i nguan'n i gua'n cɛnnin lele tra su, be kwla nyɛn-mɛn i nuan sika nan b'a to.

¹⁰ ?Be kwla ka lɛ sa mlɔnmlɔn bɔ be su wlu-man ndia nun le-ɔ?

¹¹ E wun kɛ ngwlɛlɛfuɛ'm be wu kɛ sinnglinfuɛ tɛ kpa'm be sa. Be wu be yaci bé bo ninnge'n i lɛ be man sran uflɛ.

¹² Be dunman nga be fa sie i lika'm bé su'n, kannzɛ ɔ yo sɛ san ndia'n yɛ ɔ ´kaci bé sua bɔ be ´tran nun mlɔnmlɔn-ɔn.

¹³ Sran'n, kannzɛ ɔ ´nyan nyrun sɛ, nán kɛ ɔ ´ka lɛ ti-ɔ, ɔ ´wu kɛ nnɛn'm be sa.

¹⁴ Be bɔ be lafi be bɔbɔ be wun su'n, sa ng'ɔ ´ju bé su'n yɛ ɔ o yɛ:

¹⁵ be ´su bé bo guɛ i blɔlɔ lɔ kɛ bua mun sa, wie'n yɛ ɔ ´kankan be-ɔ. Be ´kɔ blɔlɔ lɔ trelele. Be su wun-man be osu kun, sran kpa'm be wa kwla be. Blɔlɔ lɔ yɛ be ´tran siɛn nin-ɔn. Be ´tran be sua nglanman-nglanman'm be wun mmua.

¹⁶ Nyanmiɛn ´de min, ɔ ´yi min wie'n i nuan nun fite.

¹⁷ Sɛ sran kun nyɛn i wun'n, yɛ sɛ i anyanbeun'n trɛ'n, nán ɔ klun ti wɔ.

¹⁸ Afin cɛn ng'ɔ ´wu kɔ'n, ɔ su fa-man like fi kɔ-man, i ninnge'n wie fi su jrɛ-mɛn i sin blɔlɔ lɔ.

¹⁹ Kɛ i nyin tɛ o su'n, ye nga i waan ɔ su di'n, yɛ i klun b'ɔ ti jɔwa i sa nun ninnge'm bɔ be yo ye'n ti'n,

²⁰ kannzɛ ɔ yo sɛ san ɔ ´to be nga be dunnin mmua i nyrun bɔ be su wun-man wia'n i wun mlɔnmlɔn kun le'n be lɔ.

²¹ Sanngɛ klɔ sran'n, kɛ o ko nyan nyrun'n, ɔ wun-mɛn i wlɛ kɛ ɔ su kɔ agualiɛ kɛ nnɛn wie sa.