Jue Mun 48 - NYANMIƐN NDƐ'N 1998

Famiɛn dan'n i klɔ'n

1 Jue nga ti Kɔre i sran'm be liɛ.

¹ Jue nga ti Kɔre i sran'm be liɛ. Be waan:

² Anannganman ti dan. Kɛ ɔ o i bɔbɔ i klɔ'n nun nin i oka'n su'n, ɔ nin manmanlɛ fata lele tra su.

³ Oka sɔ'n ti klanman, ɔ ti asiɛ wunmuan'n i aklunjuɛ like. Siɔn oka'n yɛ ɔ ti asiɛ'n su klɔ'm bé bo nin-ɔn, i yɛ ɔ ti famiɛn dan'n i klɔ nin-ɔn .

⁴ Nyanmiɛn wo i lika'm bɔ be sisili bé wun'n be nun. Sran'm be si kɛ ɔ ti kɛ fiawlɛ sua sa.

⁵ Afin amun `nian, famiɛn'm be yiali, bé nuan yoli kun Siɔn klɔ'n i wun.

⁶ Kɛ be wunnin Anannganman i klɔ'n cɛ'n, be boli bli, srɛ'n kunnin be dan nan b'a wanndi.

⁷ E ´ijɔ wa-a, be su usu kɛ aklunya ɔ'a to wunnzɛfuɛ b'ɔ su wu ba'n su'n sa.

⁸ E ´ijɔ wa-a, be su usu kɛ aunngban b'ɔ fin wia afiliɛ lɔ ɔ fita b'ɔ bubu mmeli dandan'm be nun'n sa.

⁹ Nga be kan kleli ye'n, e wunnin i Anannganman b'ɔ sie mɛn wunmuan'n i klɔ'n nun lɔ, e wunnin i e Nyanmiɛn'n i klɔ'n nun lɔ. Nyanmiɛn man i klɔ'n su tɔ-man le nan kɛ ɔ ´yo-ɔ ɔ'a yo.

¹⁰ Ee Nyanmiɛn, kɛ e wo ɔ sua'n nun lɔ'n, e nyin kpɛn ɔ su kɛ a ti aklunyefuɛ.

¹¹ Kɛ ɔ dunman'n fa fu ju mɛn'n i awieliɛ'n, be manman wɔ lele fa ju mɛn'n i awieliɛ kusu sɔ. Aklunye'n ti ɔ nzuɛn.

¹² Ɔ jɔlɛ nga a dili be'n ti, Siɔn oka'n su lɔfuɛ'm be klun jɔ, Zida klɔ'm be sufuɛ'm be bo sro, be wun blibli be.

¹³ Amun `bo sin yia Siɔn'n, yɛ amun `bo sin yiɛ i ekun. Amun `ka i sasawlɛ sua mun.

¹⁴ Amun `niɛn i talɛ'n siin kpa. Amun `niɛn i lika nga be sisi bé wun mun kpa nan cɛn wie amu'an kan kle amun mma nga be wa jaso su'n,

¹⁵ nan amu'an kan kle be kɛ Anannganman ti e Nyanmiɛn tititi. I yɛ ɔ dun mmua e nyrun mlɔnmlɔnmlɔn-ɔn.