Jue Mun 46 - NYANMIƐN NDƐ'N 1998

Anannganman b'ɔ sie mɛn wunmuan'n nin ye o nun

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i'n fluwa'm be nun wie. Kɛ be ´to'n, be man be aniɛn'n su.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i'n fluwa'm be nun wie. Kɛ be ´to'n, be man be aniɛn'n su. Be waan:

² Nyanmiɛn ti é fiawlɛ nin e bo suanfuɛ. Blɛ kekle nun'n ɔ uka e tititi.

^3-4 Ɔ man kannzɛ asiɛ'n ´keje bɔbɔ o, kannzɛ oka'm bé bo ´tu be ´tɔ jenvie'n i bo lɔ o, kannzɛ jenvie nzue'n ɔ ´bo o, kannzɛ nzue sɔ'n ɔ ´tu kpuyɔ-kpuyɔ o, kannzɛ ɔ keje oka mun yɛ ɔ tu bé bo o, srɛ kun-man ye.

⁵ Nzue ba kun wo lɛ bɔ kɛ ɔ ´sonji'n, ɔ man aklunjuɛ Nyanmiɛn i klɔ'n nun. Ɔ yo man aklunjuɛ o Nyanmiɛn b'ɔ like fi nun-mɛn i sin'n i tranwlɛ'm be nun lika kpa i nun.

⁶ Nyanmiɛn'n wo klɔ sɔ'n nun, ɔ man klɔ sɔ'n, kɛ ɔ taka lɛ'n yɛ ɔ taka-a. Kɛ lika'n ´ti muaan'n, Nyanmiɛn niɛn i lika.

⁷ Nvle'm be nunfuɛ'm be kplin, famiɛn diwlɛ'm be su keje. Kɛ Nyanmiɛn'n kpan sa fiaan'n, kpɛkuun asiɛ'n su keje.

⁸ Anannganman b'ɔ sie mɛn wunmuan'n ɔ nin ye o nun, Zakɔb i Nyanmiɛn'n ti kɛ e fiawlɛ klɔ sa.

⁹ Amun `bla be wa nian sa nga Anannganman yo'n, amun `nian sa sroesroe ng'ɔ yo i asiɛ'n su'n.

¹⁰ Kɛ ɔ fɛ i lele b'ɔ ´fa ju mɛn'n i awieliɛ lɔ'n, ɔ'a yo man alɛ kunlɛ'n ɔ'a wie, ɔ'a bubu ta'm be nun, ɔ'a bubu cua'm be nun, ɔ'a wɔ nyrɛn'm be nun.

¹¹ I waan: «Amun `jran, man amun si kɛ n ti Nyanmiɛn. Min yɛ n sie nvle'm be nunfuɛ mun-ɔn. Min yɛ n sie asiɛ wunmuan nin-ɔn.»

¹² Anannganman b'ɔ sie mɛn wunmuan'n ɔ nin ye o nun, Zakɔb i Nyanmiɛn'n ti kɛ e fiawlɛ klɔ sa.