Jue Mun 45 - NYANMIƐN NDƐ'N 1998

Famiɛn'n i bla aja i su jue

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Yasua nin bla bé wun klolɛ jue-ɔ. Kɛ be ´to'n, be bo gitar.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Yasua nin bla bé wun klolɛ jue-ɔ. Kɛ be ´to'n, be bo gitar. Be waan:

² Ndɛ fɛfɛ kpa'n be kpɛn mín klun kɛ n `kpɛ jue nga m man famiɛn'n. N klo kɛ n ´kɛn i fɛfɛ kpa nan ɔ yo klanman kɛ be bɔ be si fluwa klɛ kpa'n be liɛ'n sa.

³ Ɔ klanman liɛ'n tra sran'm be kwlaa be liɛ'n. A si ijɔ man o yo klanman. Nyanmiɛn'n man ɔ ninnge'm be yoli ye, be yo sɔ tititi.

⁴ Safunyrɛn, fa ɔ tokofi'n san ɔ nvɛn wun. Ɔ tokofi sɔ'n ti yɛ man be wun kɛ a lɛ nyrun nan a ti gbanflɛn nin-ɔn.

⁵ Cuɛn ɔ ta'n nun, a wa yo kwlafuɛ. Fu ɔ kakaklolo'n nun nan ko kun sa kpa'n i ti alɛ. Ko kun be bɔ be ti yalɛfuɛ bɔ be bu be lufle'n bé ti alɛ. Yo man sran'm be yo sa mun be nuan su. Yo sa dandan mun man be wun i.

⁶ Ɔ cua'm be ti piembie, sɛ a ´to be'n, be ´sran famiɛn'n i kpɔfuɛ'm be anwlɛn ba'n sɛsɛsɛ. Nvle wie'm be nunfuɛ wie'm be ´tɔ ɔ ja bo lɛ.

⁷ Ee Nyanmiɛn, ɔ famiɛn bia'n wo lɛ tititi. Sielɛ nga a sie sran mun'n, a sie be kpa.

⁸ A klo sa ng'ɔ ti kpa'n, a klo-man sa tɛ'n mlɔnmlɔn. I sɔ'n ti yɛ man Nyanmiɛn b'ɔ ti ɔ Nyanmiɛn'n ɔ fali wɔ b'ɔ guali ɔ su be klun jɔlɛ ngo nin-ɔn. Ɔ yacili ɔ wiengu'm be lɛ ɔ fali wɔ .

⁹ Mir, nin aloɛs, ɔ nin kanɛl bɔ be bɔn fannin'n, be bɔn ɔ tralɛ'm bé nun. Famiɛn sua bɔ sui je o nun sɛsɛsɛ'n, sran'm be bo ngowa kanlɛ like mun i nun lɔ, ɔ klun jɔ.

¹⁰ Famiɛn'm be mma bla wie mun bɔ a klo be kpa'n, be o wɔ awlo'n nun. Bla kun wo ɔ sa fama su, i wun ninnge'm be ti kɛ Ɔfir lɔ sika ɔkwlɛ wie sa biouun.

¹¹ Min wa talua, nian, sie ɔ su tie. Man ɔ wla fi ɔ nvle nunfuɛ mun nin ɔ si i awlo'n nunfuɛ'm bé su.

¹² Ɔ klanman'n ti, famiɛn'n klo wɔ. Kɛ bɔ i yɛ ɔ sie wɔ siɛn'n ti'n, koto i bo.

¹³ Tirfuɛ mun nin mɛn'n nun anyanbeunfuɛ'm be wa cɛ ɔ like nan a `nian be nyrun.

¹⁴ Kɛ famiɛn'n i wa bla'n ti famiɛn sua'n nun sa'n, ɔ yo nyɛnmɛn dan o! Tralɛ ng'ɔ wlɛ i wun'n, sika ɔkwlɛ o nun sɛsɛsɛ.

¹⁵ I tralɛ nglanman'm be wlɛ i wun yɛ be fɛ i kɔ famiɛn'n wun lɔ-ɔ. I talua'm be su i su. I sunmanfuɛ mun-ɔn, be nin i yɛ be kɔ-ɔ.

¹⁶ Kɛ be ´fa be kɔ famiɛn sua'n nun lɔ'n, wuun be ´bo be ´sro. Bé wun kpaja be.

¹⁷ Famiɛn, ɔ mma yasua'm be wa sin ɔ́ si'm be osu. A ´sie be mɛn wunmuan'n i su kpɛnngbɛn.

¹⁸ M ´bo ɔ dunman'n tititi, n su yaci-mɛn i le. M ´bo n kle be nga be ´jaso su uflɛ mun. I liɛ'n, sran'm be kwlaa be ´manman wɔ adudua-adudua.