Jue Mun 44 - NYANMIƐN NDƐ'N 1998

Be nga be akunndan'n ɔ'a sanngan'n be Nyanmiɛn srɛlɛ

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Be waan:

² Ee Nyanmiɛn, sa dandan nga a yoli be e nannan'm be blɛ su lalafuɛ nun'n, e si'm be kan kleli ye, e tili.

³ Be kan kleli ye kɛ a deli nvle wie'm be lika'n a fa mannin be kɛ be `tran nun. A kleli nvle sɔ'm be nyrɛnnɛn nan ɔ nvlefuɛ'm b'a nyan tranwlɛ.

⁴ Nán be bɔbɔ be tokofi'n yɛ man be fali lika nin-ɔn, nán be wue kekle yɛ man be fiteli nun-ɔn. Ɔ fanngan nun-ɔn, ɔ kwlalɛ'n ti-ɔ, wɔ aunnvuɛ silɛ'n ti-ɔ, afin a klo be sa.

⁵ Min Min, min famiɛn, sɛ ɔ sran'm be ´kwla'n, ɔ fin wɔ.

⁶ Sɛ e ´fuan e kpɔfuɛ mun'n, ɔ fin wɔ. Sɛ e ´tia be nga be kunndɛ e utre'n be su'n, ɔ fin wɔ.

⁷ Afin nán min ta'n su yɛ n lafi-ɔ, nán min tokofi'n yɛ man n kwla-a.

⁸ Wɔ yɛ a de ye be nga be nin ye kun'n bé sa nun-ɔn. Wɔ yɛ a gua be nga be kpɔ ye'n bé nyin ase-ɔ.

⁹ Nyanmiɛn, e fa ɔ e di e nuan cɛn kwlaa, e yaci-man wɔ bo flɛlɛ'n le nan kɛ ɔ ´yo-ɔ ɔ'a yo.

¹⁰ Sanngɛ kpɛkuun, a yi e ase, a gua e nyin ase, kɛ ye alɛ kunfuɛ'm be ´kɔ alɛ kunlɛ'n, a nun-man bé sin kun.

¹¹ Ɔ man e wanndi be nga be nin e kun'n be nyrun, é bo ninnge'n yɛ be bɔ be kpɔ ye'n be fɛn-ɔn.

¹² A fa e man be kɛ be di ye kɛ bua nin boli sa, wɔ man y'a bo y'a sanndi nvle-nvle'm be nun.

¹³ A yo ɔ nvle'n i atɛ gua fɛ, a ukɛ-mɛn i gua'n su bɔ kan.

¹⁴ Wɔ man e lɛ-man nyrun nvle nga be mantan ye'n bé sa nun, be srisri ye, be yo e finfin.

¹⁵ Wɔ man nvle nga be si-man wɔ'n be fa e kpɛ jue. Be keje be ti'n be yo e finfin.

^16-17 Kɛ be ´kpɛ min nzowa bɔ be ´yo min finfin'n, kɛ mín nyin gua min kpɔfuɛ'n i wun'n, kɛ n wun sran ng'ɔ ba i klunngbɔ tulɛ min su'n, nyannzuɛn yɛ n wun i titi-ɔ, n kwla-man mín ti'n su man.

¹⁸ Sa sɔ b'ɔ ju e su'n, i kwlakwla nun'n, nán kɛ e wla fili wɔ ti-ɔ, nán kɛ y'a nian-man aenguɛ bɔ a nin ye trali'n i mmla'n su ti-ɔ,

¹⁹ nán kɛ e nin wɔ e nun-man nun kun ti-ɔ, nán kɛ e yacili wɔ atin'n ti-ɔ.

²⁰ Sanngɛ kpɛkuun a tia e su, yɛ a su e bo ko yi e blo nsoso'm be lika'n nun, wɔ man aosin'n dun ye su tritritri.

²¹ ?Sɛ e wla fili wɔ'n, sɛ e fali like uflɛ e suli i'n,

²² ɔ lɛ kɛ a su si-man nun? Afin a si be klun lɔ sa'n kwlaa.

²³ Wɔ ti yɛ be fa e jran wie'n nuan cɛn kwlaa-a. Wɔ ti yɛ be bu e kɛ bua bɔ be su ko kun i nnɛn kunwlɛ lɔ'n sa nin-ɔn .

²⁴ Min Min, jaso. ?Nguɛ ti yɛ a lafi-ɔ? Tinnge, nán yi ye ase mlɔnmlɔn sa!

²⁵ ?Ɔ yo sɛ ti yɛ e wun-man ɔ nyrun nin-ɔn? ?Ɔ wla li yɛ ɔ'a fi kɛ e o nyrɛnnɛn nin mian-mianlɛ nun nin-ɔn?

²⁶ E yɛ e o ndutre nun yɛ. E nannan asiɛ wun.

²⁷ Jaso, bla wa uka ye, ɔ klun-ufue'n ti, de ye.