Jue Mun 42 - NYANMIƐN NDƐ'N 1998

FLUWA'N I BUE NNYƆN SU ( Jue 42—72 ) Sran ng'ɔ fɛ i wun mantan Nyanmiɛn'n i srɛlɛ

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Be waan:

² Kɛ flete'n ɔ fɛfɛ kunndɛ nzue ba mun'n, min Nyanmiɛn, i kunngba nin-ɔn, n fɛfɛ n kunndɛ kɛ n ´fa min wun m mantan wɔ.

³ N konvi sɔ Nyanmiɛn b'ɔ lafi-man'n i mantanlɛ'n kɛ nzue we kun sran b'ɔ kunndɛ nzue nɔn'n sa. ?Cɛn onin nan m'an ɔ Nyanmiɛn i sua'n nun lɔ nan m'an ju i nyrun ?

⁴ Min nyinmuɛn'n yɛ ɔ'a kaci min aliɛ yɛ n di i nglɛmun nin nnɔsua-a, yɛlɛ kɛ sran'm be usa min kɛ: «?Ɔ Nyanmiɛn'n wo nin?»

⁵ Kɛ mín nyin kpɛnkpɛn min laa nun'n, ɔ kle min sunlɛ. Laa sɔ'n, n dun sran'm be nyrun mmua e nanti e kɔ Nyanmiɛn sua'n nun, wuun be ´kpan be ´bo be sro, e klun jɔ, Nyanmiɛn i ye b'ɔ yoli ye'n ti.

⁶ ?Nguɛ ti yɛ man n wla ko bo min wun-ɔn? ?Nguɛ ti yɛ man n ko fɛfɛ-ɔ? Ɔ fata kɛ n fa mín wla'n n guɛ i Nyanmiɛn su yɛ m mɛnmɛn i, afin ɔ ti min defuɛ, i kunngba'n ɔ ti min Nyanmiɛn.

⁷ Kɛ n wo Zurdɛn lika'n nun Ɛrmɔn oka'm bé su nin Mizear oka'n su, min wla'n ɔ bo min wun, i sɔ'n ti yɛ min wla kpɛn wɔ su nin-ɔn.

⁸ Wɔ man nzue'n ɔ bo, kpɛkuun ɔ bo ekun flan nun. Nzue ng'ɔ ´bo lɛ'n, i kwlakwla'n sin min su kpan! Ɔ kata min su kplu!

⁹ Anannganman yo min ye wia nun. Kɔnguɛ'n, n to jue m mɛnmɛn i yɛ n srɛ i afin ɔ man min nguan.

¹⁰ N usa Nyanmiɛn b'ɔ ti kɛ yɛbuɛ sa bɔ n talo i'n kɛ: «?Ɔ yo sɛ ti yɛ ɔ wla ɔ'a fi min-ɔn? ?Ɔ yo sɛ ti yɛ a yo man min kpɔfuɛ'm be mianmian min bɔ mín wla'n ɔ bo min wun-ɔn?»

¹¹ Kɛ min kpɔfuɛ'm be ´yo min fiaan bɔ be ´usa min kɛ: «?Ɔ Nyanmiɛn'n wo nin'n?» Ɔ yo min ya lelee, kpɛkuun min owie nun yra min fiaan.

¹² ?Nguɛ ti yɛ man n wla'n ɔ ko bo min wun-ɔn? ?Nguɛ ti yɛ man n ko fɛfɛ-ɔ? Ɔ fata kɛ n fa mín wla'n n guɛ i Nyanmiɛn su, yɛ m ´mɛnmɛn i, afin ɔ ti min defuɛ, i kunngba'n ɔ ti min Nyanmiɛn.