Jue Mun 41 - NYANMIƐN NDƐ'N 1998

Anannganman yaci, jaso min man min liɛ ka be liɛ su

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Sran ng'ɔ bu yalɛfuɛ'n i akunndan'n, i liɛ su ti ye! Sɛ sa wie ´ba'n, Anannganman man ɔ to fuɛn i.

³ Anannganman niɛn i su, ɔ man i wun jɔ i fɔuun asiɛ'n su wa. Ɔ fɛ-mɛn i wla-man i kpɔfuɛ'm bé sa nun.

⁴ Sɛ tukpacɛ kle i yalɛ'n, nan ɔ kwla-man jaso'n, Anannganman suɛn i bo, ɔ niɛn i lika.

⁵ N seli Anannganman kɛ: «Anannganman, n fɔnnin ɔ wun, sanngɛ si min aunnvuɛ, yo min juejue.»

⁶ Min kpɔfuɛ'm be kan mín wun ndɛ tɛtɛ. Be usa kɛ: «?Cɛn onin ko yɛ ɔ ´wu-ɔ? ?Cɛn onin yɛ i dunman'n ɔ ´nunnun-ɔn?»

⁷ Sɛ be nun wie ba min nianlɛ'n, gblɛ ndɛ mun yɛ ɔ kan be-ɔ. Ɔ kunndɛ mín wun ndɛ sie. Kɛ ɔ fite gua su lɔ cɛ'n, wuun ɔ su saci min wun sin.

⁸ Be nga be kpɔ min'n, be wɔ be nuan ase be didi min wun. Kpɛkuun be bu min wun akunndan tɛ.

⁹ Be se kɛ: «Like tɛ kpa bɔ yɛ ɔ'a tɔ i su lɛ-ɔ! Nga, lalɛ ng'ɔ la lɛ'n, nán kɛ ɔ ´jaso ekun ti-ɔ!»

¹⁰ Min janvuɛ kpa bɔbɔ nga e nin i e ti koko nnya nun-ɔn ɔ ti-man, bɔ n fa min wla'n n guɛ i su'n, bɔ e nin i e wla asa'n, ɔ'a kaci min kpɔfuɛ .

¹¹ Anannganman, si min aunnvuɛ, yo min juejue, man n tu n klunngbɔ min kpɔfuɛ'm be su.

¹² Sɛ a yo nan min kpɔfuɛ'm b'a nyan-man min b'a kwla-man min'n, i liɛ'n, n ´wun kɛ a klo mín sa sakpa.

¹³ Min liɛ'n, kɛ bɔ m'an yo-man sa'n, i ti a suannin min bo. A fali min sieli ɔ wun lɛ tititi.

*

¹⁴ Anannganman, wɔ bɔ a ti Izraɛl Nyanmiɛn'n, wɔ asenna'n ɔ su wie-man mín nuan'n nun nan kɛ ɔ ´yo-ɔ ɔ'a yo. Man ɔ yo sɔ!