Jue Mun 40 - NYANMIƐN NDƐ'N 1998

Min delɛ nga a de min'n, n ´kan kle sran mun

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² N fali mín wla'n n guɛli i Anannganman su. I kusu ɔ wunngeli mín wun, ɔ tili min flɛlɛ'n.

³ Sɛ n ´kwla se'n, ɔ yili min bunman sroesroe'n i nun fiteli, ɔ yili min nnɔtiɛ b'ɔ lɛ-man bo'n i nun fiteli. Ɔ'a fa min ɔ'a sie yɛbuɛ su. N ja'n kwla asiɛ.

⁴ Ɔ'a fa jue uflɛ-uflɛ kun ɔ'a wla min nuan kɛ n `sro. Ɔ ti i manmanlɛ jue. Sran sunman be ´wun sa sɔ'n nun, yɛ be nyin ´yi Anannganman. Be ´fa be wla'n guɛ i su.

⁵ Sran ng'ɔ fɛ i wla'n gua Anannganman su'n, b'ɔ fɛ-mɛn i wun mantan-man wun tufuɛ mun nin ato buafuɛ mun'n, i sɔ sran'n i liɛ su ti ye!

⁶ Anannganman min Nyanmiɛn, abonuan sa nga a yoli'n, be sɔnnin. Yɛ akunndan kpakpa nga a bu i e wun'n, be sɔnnin. Like fi nin wɔ sɛ-man. Min waan n ´di sa sɔ'm be wun lalo n ´sin. Be sɔnnin dan, n kwla ka-man be ngba.

⁷ W'a usa-man kɛ n yi tɛ annzɛ sraka. Wɔ man n wunnin sa sɔ'n i wlɛ. W'a usa-man kɛ n yi tɛ bɔ be yrɛ i nnɛn'n kɔlikɔli'n annzɛ ɔ kpatalɛ tɛ.

⁸ I ti min waan: «Sɛ ɔ ti sɔ'n, m bɔbɔ m ba. Min wun ndɛ nga be kannin'n, ɔ o mmla fluwa'n nun.

⁹ Min Nyanmiɛn, min waan n ´yo ɔ klun sa. Ɔ mmla'n ɔ o min klun .»

¹⁰ Anannganman, a de sran. M bo jasin fɛ sɔ'n anyia dan'n nun. M muan-man min nuan. Ɔ bɔbɔ a si sɔ.

¹¹ Delɛ nga a deli min'n, n fia-man su. N kan ɔ klun-ufue'n i wun ndɛ anyia dan'n nun. Yɛ n kɛn i ekun kɛ a ti nanwlɛfuɛ.

¹² Anannganman, ɔ liɛ'n, n si kɛ a ´si min aunnvuɛ titi. A ti nanwlɛfuɛ. Ye nga a yo min titi'n, i ti n si kɛ sa fi su nyan-man min.

*

¹³ Sa nga be tɔ min su'n be sɔnnin. Be sin yia min pɛ. Sa tɛ nga n yoli be'n be ti n kpɔci mín wun-ɔn ɔ yo-man ye. N nian be-ɔ ɔ nian-man. Be sɔnnin tra be ti ndrɛ'n. I ti n sa sin bubu min.

¹⁴ Anannganman, yaci, de min! Anannganman, bla ndɛndɛ wa uka min!

¹⁵ Man be bɔ be kunndɛ kɛ be ´kun min'n, bé nyin gua ase, man be wun nyannzuɛn! Man be bɔ be kunndɛ kɛ sa nyan min'n be fa be nyrun nyannzuɛn'n be cuɛn wɔ siɛn!

¹⁶ Be nga be sri min'n, nán be kwla bé wun kan kun nyannzuɛn'n dunman nun.

¹⁷ Ɔ sufuɛ nanwlɛfuɛ'm be liɛ'n, man be sri, man be klun jɔ ɔ dunman nun. Be nga be klo wɔ bɔ a de sran mun'n, man be kɛn i titi kɛ: «Anannganman ti dan o!»

¹⁸ N ti aunnvuɛfuɛ yɛ n ti nyrɛnnɛnfuɛ. Sanngɛ Anannganman bu min akunndan. Wɔ yɛ a ti min ukafuɛ-ɔ, wɔ yɛ a ti min sasafuɛ-ɔ. Min Nyanmiɛn, nán sisi ɔ́ bo .