Jue Mun 4 - NYANMIƐN NDƐ'N 1998

Nnɔsua nun jue

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n. I waan:

² Nyanmiɛn, wɔ bɔ a bu-man min ndɛ kwlɛ'n, sɛ n flɛ wɔ-ɔ, tɛ min su. Sɛ n wo nyrɛnnɛn nun'n, de min. Si min aunnvuɛ, tie min srɛlɛ'n.

³ ?Amun klɔ sran mun, amun ´saci min dunman lele ju cɛn onin? ?Amun ´tɔn min suɛn ngbɛn'n lele ju cɛn onin? ?Like nga bɔ m'an yo-man'n bɔ amun fa sie mín su'n, amun ´yo i sɔ lele ju cɛn onin?

⁴ Man amun si kɛ Anannganman fali min, afin min nyin yi i. Kɛ n flɛ i'n, ɔ ti.

⁵ Sɛ amun fa ya'n, nán amun yo sa tɛ. Kɛ amun la amun bɛ'n su kɔnguɛ'n, amun `bu akunndan. Kpɛkuun amun `tran diin .

⁶ Amun `yi sraka ng'ɔ fata'n. Yɛ amun `fa amun wun wla Anannganman i sa nun.

⁷ Sran sunman be se kɛ: «Ee! ?Wan yɛ man e ´nyan ye-ɔ?» Ee! Anannganman, titi ɔ́ nyin nun wein, nan yo e ye!

⁸ Aklunjuɛ nga wɔ man n nyɛn i'n, ɔ tra aklunjuɛ nga kɛ sran'm be ´kpɛ be ble kpanngban'n be nyɛn i'n, yɛ ɔ tra aklunjuɛ nga kɛ be ´yi be nzan kpanngban'n be nyɛn i'n.

⁹ Kɛ n la'n, kpɛkuun n ka lɛ n lafi diin bɔ cɛ. Afin Anannganman, wɔ man sa tɛ fi nyan-man min.