Jue Mun 39 - NYANMIƐN NDƐ'N 1998

Sran i nguan nyanman'n i tika b'ɔ ti'n

1 Jue nga ti David liɛ. Ɔ o jue tofuɛ'm be su kpɛn'n nin Zɛditɛn be fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n nin Zɛditɛn be fluwa'm be nun wie. I waan:

² N seli min wun kɛ n ´sasa min wun kɛ ɔ ´yo nan m'an fɔn-man min ijɔlɛ bɔ n ijɔ'n nun'n ti. N waan kɛ klunwifuɛ'n wo lɛ'n, m ´muan mín nuan'n su.

³ Kannzɛ n ´di yalɛ'n, m muannin mín nuan'n su, n trannin bliin, m'an uke-man mín nuan. Sanngɛ ɔ nin i sɔ ngba'n, min afɛ'n ɔ'a kpɛ-man su, i nyrun yɛ ɔ ɔli-ɔ.

⁴ Kɛ n kplinnin lele'n, min anwlɛn ba'n beli min klun, siɛn'n, n tran-an ɔ tran-man. Yɛ mín nuan nun tɛli-ɔ, min waan:

⁵ «Anannganman, kle min blɛ nga min nguan'n ɔ ´wie'n. Kle min kɛ min nguan'n i nyanman'n ɔ ti tɛnndɛn ju'n. Man n si kɛ kannzu n sɔ-man.

⁶ Min nguan nyanman'n i tɛnndɛn'n ɔ ti kɛ bé sa klun'n i tɛtrɛ nun'n sa. Min nguan'n ti-man like fi ɔ nyrun. Man klɔ sran'n ɔ yo juejuejue sɛ, sanngɛ ɔ ti kɛ aunngban sa.

⁷ Sran'n ɔ nanti kɛ fɔnvɔ sa. Ɔ sin kɔ wa, ɔ sin kɔ wa, ɔ yo nga, ɔ yo nga, sanngɛ ɔ ti kɛ aunngban sa. Ninnge ng'ɔ nyɛn i'n ɔ si-man sran ng'ɔ wa fa-a .

⁸ ?Anannganman, nguɛ cɛ yɛ n ´lafi su siɛn nin-ɔn? Ɔ su yɛ mín wla'n ɔ wo-ɔ.

⁹ De min sa tɛtɛ nga n yoli'n i kwlaa nun. Nán yaci min sinnglinfuɛ'm bé sa nun man be yo min finfin.

¹⁰ M'an tɔ anmunle, n tike-man min nuan'n. Afin wɔ yɛ man m'an yo kɛ nga sa-a.

¹¹ Yaci min bolɛ'n. N kwla suan-man bolɛ nga a bo min'n i bo kun.

¹² Sɛ sran yo sa tɛ'n, a mɛn i i nuan like a fa tu i fɔ. A saci ninnge ng'ɔ klo i'n kwlakwla kɛ kakaa'n ɔ saci waka mma'n sa. Sran'n ti kɛ aunngban sa.

¹³ Anannganman, tie min srɛwa'n! N kpan n flɛ wɔ, sie ɔ su! N su sun, nán bu ɔ su nun waka, tie min sunlɛ'n! N ti kɛ aofuɛ sa, n wa sikeli wɔ. N ti kpe-nun-sinfuɛ kɛ min nannan mun sa.

¹⁴ Yaci min nun man n de wunmiɛn kan, man min wun kpaja min ka nan m'an wɔ. Kɛ n ko wɔ'n, be su wun-man min osu kun.»