Jue Mun 38 - NYANMIƐN NDƐ'N 1998

Fɔ tulɛ b'ɔ man be kaci be nzuɛn'n

1 Jue nga ti David liɛ. I waan be `to be fa kpɛn bé wun wla.

¹ Jue nga ti David liɛ. I waan be `to be fa kpɛn bé wun wla. I waan:

² Anannganman, kannzɛ w'a fa ya'n, nán bo min. Kannzɛ bɔ ɔ ya'n ɔ'a yo dan'n, nán tu min fɔ.

³ Afin sɛ ɔ ti ta yɛ a toli i min wun'n, wuun i kwlaa nyannin min, ɔ sa ɔ'a kan min.

⁴ Ɔ ya dan'n i su like bɔ a yoli min'n ti, min wunnɛn'n i lika fi ti-man klonglo. Sɛ n ´kwla se'n, min sa tɛ bɔ n yoli'n ti, min owie'n kwlaa ti bubuwa.

⁵ Sɛ n ´kwla se'n, sa tɛtɛ nga n yoli'n, b'a kata min su kɛ nzue sa. B'a ti min kɛ trɔ b'ɔ yo nɔnnin kpa'n sa. N kwla-man nun.

⁶ Min sinnzin bɔ n yoli'n ti, mín wun kannin'm b'a kplɔ, be bɔn tɛ kpa.

⁷ Min wi'n ɔ'a bu, m'an fɛ lele ɔ'a tra fɛlɛ su. Awlaboɛ'n ɔ'a kun min kpo, n ti nvuɛn-nvuɛn tititi.

⁸ Min wunnɛn'n ɔ lo fiaan! Min wunnɛn'n i lika fi ti-man klonglo.

⁹ Min wunmiɛn'n kwlakwla ɔ'a wie, m'an bubu mlɔnmlɔnmlɔn. Min anwlɛn'n ɔ si kpukpukpu, wuun n ´kplin.

¹⁰ Anannganman, a si like nga n kunndɛ'n. Yɛ a ti kplinlɛ bɔ n kplin'n.

¹¹ Min anwlɛn'n ɔ kpli n klun lɔ, min wunmiɛn'n kwlaa ɔ'a wie. N wun-man ase ndɛnman su kun.

¹² Sa yaya nga be tɔ min su'n ti min janvuɛ mun nin min wiengu'm be mantan-man min kun, yɛ min osufuɛ'm be nin min a ti nun .

¹³ Be bɔ be kunndɛ kɛ be ´kun min'n, be sua mín wun aya. Be bɔ be kunndɛ kɛ nyrɛnnɛn tɔ mín su'n, nzowa yɛ be sua gua min wun-ɔn, kpɛkuun be saci min wun.

¹⁴ N kusu m bu min sukpɔ nun waka, n yo kɛ n ti-man sa. N yo kɛ bobofuɛ sa n uke-man min nuan.

¹⁵ N yo kɛ sutrefuɛ sa n tɛ-man ndɛ fi su.

¹⁶ Anannganman, ɔ kunngba cɛ ɔ́ su yɛ mín wla'n ɔ wo-ɔ. Anannganman, min Nyanmiɛn, tɛ min su!

¹⁷ N seli wɔ kɛ sɛ sa nyan min'n, nán be klun jɔ min ti, yɛ nán be yo min finfin n ja b'ɔ kpla'n ti.

¹⁸ M'an tɔ, nyrɛnnɛn'n ɔ tɛ o min su.

¹⁹ Fɔnlɛ nga n fɔnnin'n, n fia-man su, n kan. Sa tɛ nga n yoli'n, i ti n koko.

²⁰ Min kpɔfuɛ'm be ti juejuejue, be lɛ wunmiɛn. Be nga be kpɔ min ngbɛn'n, be sɔnnin.

²¹ Sa kpa bɔ n kunndɛ kɛ n ´yo'n ti, be nga be fa tɛ fa su sa kpa'n i bo'n, be nin min lɛ i.

²² Anannganman, nán yi min ase! Min Nyanmiɛn, nán wanndi min!

²³ Anannganman, min defuɛ, bla ndɛndɛ wa uka min.