Jue Mun 37 - NYANMIƐN NDƐ'N 1998

Bé wla bɔ be fa gua Anannganman su'n

1 Jue nga ti David liɛ.

¹ Jue nga ti David liɛ. I waan: Nán fa ya be nga be yo sa tɛ'n bé wun. Nán ɔ́ nyin blo be nga be fɔn mmla'n bé wun.

² Afin be ti flɛkpɛɛ kɛ ijre bɔ be kpɛ'n sa. Be wu kee ndɛndɛ kɛ ijre nɔnman sa.

³ Fa ɔ́ wla'n guɛ i Anannganman su, yo sa i nuan su. Tran mɛn nga nun wa. Fa nanwlɛ'n yo kɛ wɔ aliɛ sa, di.

⁴ Fa Anannganman yo wɔ anwlɛn su like, yɛ like kwlaa nga ɔ́ nyin o i sin'n, ɔ ´fa man wɔ.

⁵ Fa ɔ wun sa'n kwlaa wla Anannganman sa nun. Fa ɔ́ wla'n guɛ i su, yɛ ɔ ´yo ng'ɔ nin wɔ fata'n ɔ ´man wɔ.

⁶ Ɔ wa yo man ɔ nzuɛn kpa'n ɔ ´fite nglo wein kɛ like bɔ b'a fa sie i lika ng'ɔ kpaja'n nun'n sa. Yɛ ɔ ndɛ fɛ'n kusu ɔ ´fite nglo weiin kɛ like bɔ b'a yi nglo wia kpa'n nun'n sa.

⁷ Fa ɔ́ wla'n guɛ i Anannganman su! Tran diin, yɛ minndɛ. Sɛ sran wie i ninnge'm be yo ye i sa nun'n, nán man ɔ yo wɔ ya. Nán fa ya sran nga i klun akunndan'm be ti-man kpa'n i wun.

⁸ Gua ya ble'n i ase, yaci ya'n mlɔnmlɔn. Sɛ a fa ya'n, wuun w'a yo sa tɛ.

⁹ Be nga be yo sa tɛ'n, be ´kan bé bo. Yɛ be nga be fa bé wla gua Anannganman su'n, mɛn'n ɔ ´yo be liɛ.

¹⁰ Ɔ ka kaan sa, be su wun-man klunwifuɛ'n kun. Sɛ a nian kan ɔ tran lɛ'n, a su wun-man sran .

¹¹ Yalɛfuɛ mun yɛ mɛn'n ɔ wa yo be liɛ-ɔ. Bé wun ´jɔ be kpa fɔuun !

¹² Klunwifuɛ'n ɔ bu sran kpa'n i wun akunndan tɛ. Ɔ yi i je'n kle i, ɔ waan nnɛn wlɛfuɛ wie-ɔ.

¹³ Srilɛ yɛ Anannganman sri i-ɔ. Afin ɔ si kɛ sran sɔ'n i fɔ bulɛ cɛn'n ɔ'a mantan.

¹⁴ Klunwifuɛ'm be cuɛn be tokofi'n, yɛ be to be ta'n yalɛfuɛ'n nin nyrɛnnɛnfuɛ'm bé wun. Be waan be ´kun be nga be ti sran kpa'n mun.

¹⁵ Be tokofi'n ɔ ´wɔ be bɔbɔ be anwlɛn ba'n. Be ta'm be ´bubu.

¹⁶ Sran kpa'n i like kan ng'ɔ lɛ i'n, i kpa tra klunwifuɛ'n i bo ninnge kpanngban'n .

¹⁷ Afin klunwifuɛ'm be kwlalɛ'n ɔ wa wie. Sran kpa'm be liɛ'n, Anannganman suan be bo.

¹⁸ Be nga be yo-man sa tɛ'n, be nguan'n ɔ lo Anannganman. Mɛn ng'ɔ fa mannin be'n, ɔ ti bé aja like tititi.

¹⁹ Nyrɛnnɛn blɛ nun'n, bé nyin gua-man ase. Yɛ awe blɛ nun'n, be ku yi.

²⁰ Klunwifuɛ'm be ´wu. Be bɔ be klo-man Anannganman sa'n, be wa nunnun kɛ ijre nyrɛ sa. Be ´nunnun. Be ´nunnun kɛ sin wɛnsrɛn sa.

²¹ Klunwifuɛ'n ɔ usa afɛ-ɔ, ɔ yi-man. Sran kpafuɛ'n ɔ si aunnvuɛ ti sɛ be usɛ i afɛ-ɔ, ɔ man.

²² Be nga Anannganman yra be nguan'n, mɛn'n ɔ ´yo be liɛ. Be nga kusu bɔ be bo sannzan'n, be ´jaso lɛ.

²³ Sran nga Anannganman klo i nantilɛ'n, ɔ yo man i sɔfuɛ'n nyan jranwlɛ.

²⁴ Sɛ ɔ tɔ'n, ɔ ka-man asiɛ wun lɛ, afin Anannganman suɛn i bo.

²⁵ Kɛ ɔ fɛ i min bakan nun lele bɔ m'an fa yo oke yɛ'n, n nian wun-man kɛ Nyanmiɛn ɔ'a yi i sran kpa'n i ase le. N nian wun-man kɛ i mma mun annzɛ i anunman'm be su srɛsrɛ aliɛ be sin le.

²⁶ Be usɛ i afɛ-ɔ, ɔ mɛn i klun-ufue su titi. I mma mun nin i anunman'm be di ye.

²⁷ Sɛ a kaci ɔ́ sin si sa tɛ'n nan a yo sa kpa'n, a ´ka ɔ mɛn'n nun titi.

²⁸ Afin Anannganman klo kɛ be yo like mun sɛsɛsɛ. Ɔ yi-mɛn i sufuɛ bɔ be ti nanwlɛfuɛ'm be ase. Ɔ nian be su tititi. Sanngɛ sa tɛ yofuɛ'm be mma mun nin be anunman mun be ´nunnun mlɔnmlɔnmlɔn.

²⁹ Mɛn'n ɔ ´yo sran kpa'm be liɛ. Be ´tran nun tititi.

³⁰ Sran kpa'n ɔ kan ngwlɛlɛ ndɛ. Sɛ ɔ ´kan ndɛ-ɔ, ɔ kɛn i nuan su sɛsɛ,

³¹ yɛlɛ kɛ ɔ fɛ i Nyanmiɛn'n i mmla mun sie, ɔ man ɔ tɔ-man.

³² Klunwifuɛ'n ɔ di sran kpa'n i sasa bu. Ɔ kunndɛ kɛ ɔ ´kun i.

³³ Sanngɛ Anannganman yaci-man sran kpa'n i sa nun. Sɛ be ´di sran kpa'n i jɔlɛ-ɔ ɔ yaci-mɛn i lɛ man be bu-mɛn i fɔ ngbɛn.

³⁴ Fa ɔ wla gua Anannganman su, fɛ i atin'n su. Yɛ ɔ ´di wɔ nɛnnɛn, mɛn'n ɔ ´yo ɔ liɛ. Klunwifuɛ'm be nunnunlɛ'n ɔ ´yo ɔ nyrun.

³⁵ Klunwifuɛ nga i sielɛ'n ɔ taka zia kɛ waka dan wie sa'n, m'an wun wie le.

³⁶ Sanngɛ kɛ n wa sinnin kan ɔ o lɛ'n ekun'n, m'an wun-man sran fi lɛ. N kunndɛli i lele ngbɛn.

³⁷ Nian sran ng'ɔ nanti sein'n i kpa nian. Nian sran ng'ɔ ti sɛsɛ'n i kpa nian. I sɔfuɛ'n, i nzuɛn'n ti flɔlɔlɔ, ɔ man i ti, san ɔ ´di ye le.

³⁸ Sanngɛ sa tɛ yofuɛ'm be kwlaa be ´nunnun. Klunwifuɛ'm be su wun-man ye le.

³⁹ Anannganman yɛ man sran kpa'm be nyan bé ti-ɔ. Kɛ nyrɛnnɛn tɔ be su'n, i yɛ be talo i-ɔ.

⁴⁰ Anannganman uka be, ɔ de be. Ɔ de be klunwifuɛ'm bé sa nun, ɔ man be fite nun, afin be fia i nun.