Jue Mun 36 - NYANMIƐN NDƐ'N 1998

Sran tɛ mun nin sran kpa mun be ngbaciɛ

1 Jue nga ti David b'ɔ ti Anannganman i sufuɛ'n, i liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David b'ɔ ti Anannganman i sufuɛ'n, i liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Klunwifuɛ'n i nyin kekle ndɛ'n b'ɔ kan'n, ɔ o min klun. Ɔ se kɛ sa kpa nga ti bɔ be sro Nyanmiɛn'n ɔ wun-mɛn i .

³ Ɔ bu i wun sran dan ti ɔ kwla wun-man sa tɛ ng'ɔ yo be mun nan se kɛ ɔ ´kpɔ be.

⁴ Ato bualɛ'n nin sran'm be lakalɛ'n yɛ ɔ wo i nuan'n nun-ɔn. Ɔ bu-man sa kpa yolɛ'n i akunndan bɔ kaan sa.

⁵ Kɛ ɔ la kɔnguɛ'n, wafa ng'ɔ ko yo nan ɔ'a yo i sa tɛtɛ mun'n i akunndan yɛ ɔ bu-ɔ. Atin ng'ɔ ti-man kpa'n i nun cɛ yɛ ɔ sin-ɔn. Ɔ lɛ-man kɛ like nga ti-man kpa i ti n yo-man.

⁶ Anannganman, ɔ klun-ufue'n ti dan lele kpe nun. I kunngba'n, a ti nanwlɛfuɛ dan.

⁷ A di nanwlɛ, a kaci-man aniɛn. Sɛ a kan ndɛ'n, ɔ ka lɛ titi, ɔ ti kɛ oka sa. Sɛ a bu ndɛ'n, sran fi wun-mɛn i sin, afin i bo'n ti kploun kɛ jenvie dan'n sa. Anannganman, a sasa sran nin nnɛn mun.

⁸ Nyanmiɛn, nanwlɛ, ɔ klun-ufue'n lɛ-man wunsu. Sɛ e ´kwla se'n, sran'm be kwlaa be fia ɔ ndɛwa'n bo.

⁹ Wɔ awlo'n nun ninnge kpakpa'n i wie yɛ be di-ɔ. Ɔ klun-ufue'n ti a man be nzue kpa be nɔn.

¹⁰ Afin nguan'n i bo'n, ɔ́ wun lɔ yɛ ɔ wɔ-ɔ. Ɔ kpajalɛ'n yɛ man e wun ase-ɔ .

¹¹ Yo be nga be si wɔ'n be kpa titi. Be bɔ be ti sɛsɛ'n, man be wun kɛ ɔ kusu a ti nanwlɛfuɛ.

¹² Nán man wun tufuɛ'n ɔ bla min wun wa! Nán man klunwifuɛ'm be kankan min bo!

¹³ Kɛ sa tɛ yofuɛ'm be ba ɔ nyrun'n, be tɔ. Kpɛkuun be langa be nyin aanga lɛ. Be jaso-ɔ, ɔ yo-man ye kun.