Jue Mun 35 - NYANMIƐN NDƐ'N 1998

Sran bɔ ɔ'a yo-man sa bɔ sanngɛ b'a ko sɛnmɛn i'n, i Nyanmiɛn srɛlɛ

1 Jue nga ti David liɛ.

¹ Jue nga ti David liɛ. I waan: Anannganman, be nga be kle min yalɛ'n, kle be yalɛ wie. A nin be nga be nin min kun'n, amun `kun.

² Fa nyrɛn kaan nin nyrɛn dan'n, nan bla wa de min.

³ Fa cua'n sunnzun min yalɛ klefuɛ'm bé wun. Yɛ cuɛn cua tika'n bé wun. Kpɛn min wla kɛ min defuɛ'n yɛlɛ wɔ.

⁴ Be nga be kunndɛ kɛ be ´kun min'n, man bé nyin gua ase, man be wun nyannzuɛn. Be nga be gugu kɛ be ´yo min sa'n, man nyannzuɛn kun be, nan be bli be sa bé sin be wɔ.

⁵ Man be yo kɛ ijre bɔ aunngban'n fitɛ i kɔ'n sa. Man Anannganman i anz'n ɔ fuan be.

⁶ Kɛ Anannganman i anz'n ´su be su'n, man aosin'n dun be atin'n su, yɛ man atin sɔ'n ɔ yo ndrɔn bé bo.

⁷ Afin m'an yo-man be sa, kpɛkuun b'a kpɛ mín bo kunman b'a kata su kɛ aya sa. B'a kpɛ min bo kunman kɛ n `tɔ nun.

⁸ Man nyrɛnnɛn'n fu be nun tɔ be su. Man aya nga be suali'n, ɔ yaci tra be bɔbɔ. Man be tɔ kunman nga be kpɛli'n nun nan be wun nyrɛnnɛn.

⁹ I liɛ'n, n klun ´jɔ Anannganman i dunman nun, n ´tu kpɛn i ukalɛ b'ɔ uka min'n ti.

¹⁰ N ´tu n klun, n ´se kɛ: «Ee! Anannganman, a lɛ-man wunsu mlɔnmlɔn. Wɔ man nyrɛnnɛnfuɛ'n ɔ nyɛn i ti sran ng'ɔ kwlɛ i'n i sa nun. Wɔ man nyrɛnnɛnfuɛ'n nin yalɛfuɛ'n, be nyan bé ti sran ng'ɔ fɛn bé bo ninnge kanngan'n bé sa nun'n i sa nun.»

¹¹ Sran suɛn tɔnfuɛ wie'm be ba, be wa usa min sa nga n si-man nun'n i nun ndɛ.

¹² Sɛ n yo sa kpa'n, be fa tɛ'n be su i bo. Mín wla'n ɔ'a bo mín wun.

¹³ Sanngɛ kɛ be tɔli tukpacɛ'n, n wlali bajɛ tralɛ, n di-man like, min akunndan'n sanngannin, m'an yaci-man srɛlɛ le.

¹⁴ N nanti zuɛɛn-zuɛɛn kɛ min janvuɛ, annzɛ min niaan wie yɛ ɔ'a wu sa! N ti nvuɛn-nvuɛn kɛ mín nin yɛ ɔ'a wu sa.

¹⁵ Be liɛ su'n, kɛ n ko tɔ'n, be yia kpɛkuun be sri min. Be yia be kputu min n si-man nun. M'an kaci kɛ tannin tafuɛn sa bé sa nun.

¹⁶ Be nin e wafuɛ nga be nzuɛn ti tɛ'n, bɔ be yo sran'm be fiaan'n, bé bo ti kun. Be yi bé je'n be kle min, ɔ waan nnɛn wlɛfuɛ mun-ɔn.

¹⁷ ?Anannganman, a ´tran lɛ a ´nian be sa tititi? Sasa min kɛ ɔ ´yo nan b'a kle-man min yalɛ'n ti. De min asɔmɔli sɔ'm bé sa nun. Nán man be nyan min be kun min.

¹⁸ M ´manman wɔ anyia dan'n nun. M ´manman wɔ nzrafuɛ'm be nyrun.

¹⁹ Nán be bɔ be kpɔ min ngbɛn sɔ'n be klun jɔ min ti. Be bɔ b'a fua min ti ngbɛn sɔ'n, nán man be kpɛ min kannglɛ tɛ .

²⁰ Be si-man ndɛ wɛtɛɛ kan. Mɛn nga nun wa'n, sran nga be ti lɛ fɔun'n, be suɛn tɔnlɛ akunndan yɛ ɔ o bé ti nun-ɔn.

²¹ Be trɛ bé nuan nun be se kɛ yoo: «E! Ɔ ´yo sa wie yɛ e ko fiteli i su-ɔ!»

²² Anannganman, ɔ́ nyin ta nun, nán tran lɛ sa! Mantan min koko.

²³ Min Min, min Nyanmiɛn, jaso! Di min jɔlɛ'n i klanman man min! Jaso nan kun min ti alɛ man min!

²⁴ Anannganman min Nyanmiɛn, wɔ bɔ a ti sɛsɛ'n, di min jɔlɛ'n i nanwlɛ. Nán be klun jɔ min ti.

²⁵ Nán be se bé wun kɛ: «Ɛn Ɛɛn! Y'a nyɛn! Ɔ'a kwla kpinndin-mɛn i wun bɔ ngbɛn.»

²⁶ Be kwlakwla nga kɛ sa'n ju mín su'n ɔ yo be fɛ'n, man bé nyin gua ase, man be wun nyannzuɛn! Be nga be tu bé wun gua min su'n, nán be kwla bé ti su man, man nyannzuɛn'n yɛ ɔ kun be-ɔ!

²⁷ Sanngɛ be bɔ be yra be nuan kɛ min ndɛ `yo fɛ'n, man be bo sro, yɛ man be klun jɔ. Yɛ man blɛ'n kwlakwla be kan kɛ: «Anannganman ti dan, ɔ klo kɛ i sufuɛ'n i wun jɔ i.»

²⁸ Min kusu n ´kan ɔ sɛsɛ bɔ a ti'n i wun ndɛ n ´flan nun. M ´manman wɔ titi.