Jue Mun 34 - NYANMIƐN NDƐ'N 1998

Anannganman man srɛ b'ɔ kun min'n ɔ'a wie

1 Jue nga ti David liɛ. David yoli i wun kɛ fiaunfuɛ sa Abimelɛk nyrun . Kɛ bian sɔ'n ɔ fuɛnnin i'n, yɛ ɔ kannin ndɛ nga mun-ɔn.

¹ Jue nga ti David liɛ. David yoli i wun kɛ fiaunfuɛ sa Abimelɛk nyrun . Kɛ bian sɔ'n ɔ fuɛnnin i'n, yɛ ɔ kannin ndɛ nga mun-ɔn. I waan:

² N ´la Anannganman i ase blɛ'n kwlaa nun. N ´fa mín nuan'n m ´mɛnmɛn i tititi.

³ Anannganman yɛ n fa di min nuan-an. Awlaboɛfuɛ mun, amun `tie nan amun klun jɔ!

⁴ Amun `uka min man e manman Anannganman. Amun man é bo yo kun nan e yi i ayɛ.

⁵ N flɛli Anannganman, ɔ tɛli min su. Anannganman man srɛ b'ɔ kun min'n ɔ'a wie .

⁶ Be nga be fa be wla guɛ i su'n, bé wun kpaja be, yɛ nyannzuɛn kun-man be.

⁷ Sɛ yalɛfuɛ wie kpan flɛ Anannganman'n, ɔ ti, yɛ ɔ man nyrɛnnɛn ng'ɔ o i su'n ɔ wie.

⁸ Anannganman i anz'n ɔ bo sin yia be nga bé nyin yi i'n, yɛ ɔ yi be sa kekle'm be nun fite.

⁹ Amun `sie amun nyin ase be `nian. Amun wa wun kɛ Anannganman ti kpa dan! Sran ng'ɔ fiɛ i nun'n, i liɛ su ti ye !

¹⁰ Amun bɔ amun ti Anannganman i sran mun'n, man amun nyin yi i. Afin be bɔ bé nyin yi i'n, bé sa mian-man like fi wun.

¹¹ Asɔmɔli'n i mma mun bɔbɔ, awe kwla kun be. Sanngɛ be bɔ be mantan Anannganman'n, be mian-man like fi wun.

¹² Min mma mun, amun `bla man n kan ndɛ n kle amun. N ´kle amun kɛ bé nyin fa yi Anannganman'n.

¹³ Sran ng'ɔ klo kɛ ɔ ´di alaje'n nan i klun jɔ titi'n

¹⁴ nán man ɔ ijɔ tɛtɛ kun. Man ɔ yaci ato bualɛ'n.

¹⁵ Ɔ wla sa tɛtɛ'n i ase, ɔ yo sa kpa. Man ɔ nin sran kwlaa be nuan sɛ. Man sran'm be afiɛn siesielɛ'n ɔ kaci i junman.

¹⁶ Afin Anannganman i nyin wo i sufuɛ nanwlɛfuɛ'm be su, i su o yalɛ nga be koko kle i'n su.

¹⁷ Anannganman nin be bɔ be yo sa tɛ'n be kun, afin i waan ɔ ´nunnun be dunman'n mɛn'n nun .

¹⁸ Kɛ Anannganman i sufuɛ nanwlɛfuɛ'm be flɛ i'n, ɔ sie i su tie. Yɛ ɔ man nyrɛnnɛn ng'ɔ o be su'n i kwlaa wie.

¹⁹ Anannganman mantan be nga be akunndan'n ɔ'a sanngan'n. Yɛ ɔ de be nga bé wla'n ɔ'a bo'n.

²⁰ Sa kekle ng'ɔ ju Anannganman i sufuɛ nanwlɛfuɛ'n i su'n ɔ sɔnnin, sanngɛ Anannganman de i sa sɔ'm be kwlaa be nun kpan.

²¹ Ɔ niɛn i wunnɛn'n i akpɔlɛ'm be ngba su, i owie kun sa bu-man.

²² Klunwifuɛ'n i klunwi'n ɔ kun i bɔbɔ. Be nga be kpɔ Anannganman i sufuɛ kpa'n, Anannganman ɔ ´bu be fɔ.

²³ Anannganman sasa i sufuɛ'm be nguan'n. Be bɔ be talo i'n, bé wun sa'n ɔ wie.