Jue Mun 33 - NYANMIƐN NDƐ'N 1998

Nyanmiɛn b'ɔ yili like kwlakwla'n i manmanlɛ

¹ Nyanmiɛn sufuɛ nanwlɛfuɛ mun, amun `bo sro. Amun `manman Anannganman. Anannganman i manmanlɛ'n ɔ ti sran kpa'm be liɛ.

² Amun `bo jru be fa manman Anannganman. Amun `bo sanngo b'ɔ lɛ nyanman blu'n be manman Anannganman .

³ Amun `to jue uflɛ-uflɛ kun be fa mɛnmɛn i. Amun `bo ngowa kanlɛ ninnge mun, man ɔ kpi kpa. Amun `bo ndɛ be fa mɛnmɛn i, man ɔ tɛ kpa.

⁴ Afin Anannganman i nuan ndɛ'n wie fi kaci-man. Yɛ like ng'ɔ yi be'n, be kwlakwla be ti kpa.

⁵ Ɔ klo sa nga be yo i i nuan su'n, ɔ klo sa ng'ɔ ti nanwlɛ'n. Anannganman i klun-ufue'n, ɔ yi i nglo asiɛ'n sufuɛ'm be kwlaa be wun i.

⁶ Anannganman i nuan nun ndɛ'n yɛ ɔ fa yili nyanmiɛn b'ɔ la nglo lɔ plaii nin-ɔn. I nuan b'ɔ ukeli i sa'n, kpɛkuun nzraama'm be fiteli .

⁷ Ɔ tian jenvie'n i nzue'n i nuan kwle kun. Ɔ fa nzue dandan mun gua bunman'n nun.

⁸ Man asiɛ'n sufuɛ'm be kwlaa be sro Anannganman. Mɛn'n nun sran'm be kwlaa, kɛ amun wo i nyrun lɛ'n, amun `usu.

⁹ Afin ndɛ kwlaa ng'ɔ kan'n, san i su sa'n ɔ ´yo. Kɛ ɔ ko fin i nuan ko se kɛ man like sa yo'n, kpɛkuun like sɔ'n ɔ ka lɛ yo.

¹⁰ Anannganman saci nvle-nvlefuɛ'm bé sa nga be jaja mun. Be ninnge nga be bu be akunndan sie kɛ be ´yo'n, ɔ bu i bue.

¹¹ Sanngɛ sa nga i bɔbɔ yɛ ɔ jajali'n, kɛ ɔ o lɛ'n yɛ ɔ wo-ɔ. Yɛ like ng'ɔ bu i akunndan b'ɔ yo'n, ɔ ka lɛ tititi.

¹² Be nga Anannganman ti be Nyanmiɛn'n, be liɛ su ti ye! Sran nga Anannganman ko fa be kɛ ɔ ´fa be yo i liɛ'n, be liɛ su ti ye!

¹³ Kɛ Anannganman o nglo lɔ'n, ɔ nian wa ɔ wun sran'm be kwlaa.

¹⁴ Kɛ ɔ ti i bia'n su lɔ'n, ɔ nian asiɛ'n su sran'm be nantilɛ'n su.

¹⁵ I b'ɔ man be kwlaa be ngwlɛlɛ'n, ɔ si like nga be yo'n i kwlaa.

¹⁶ Kɛ famiɛn kun ɔ ´kun alɛ b'ɔ ´fite nun'n, nán sonja kpanngban b'ɔ lɛ i'n be fanngan nun ti-ɔ. Kɛ safunyrɛn'n ɔ ´nyɛn i ti lɛ'n, nán fanngan dan b'ɔ lɛ i'n ti-ɔ.

¹⁷ Nnɛn kpanngɔ'n ɔ uka sran ngbɛn, nán fanngan dan b'ɔ wo i nun'n ti yɛ man be fite nun-ɔn.

¹⁸ Be bɔ bé nyin yi Anannganman'n, bɔ be fa bé wla guɛ i ukalɛ b'ɔ uka sran'n su'n, i nyin o be su.

¹⁹ Ɔ de be wie'n i sa nun, ɔ yo man kannzɛ awe'n kpɛn sɛ, sanngɛ be ka nguan nun.

²⁰ E liɛ'n, Anannganman yɛ e fa e wla'n e guɛ i su-ɔ. I yɛ ɔ ti e wun nyanman nun-ɔn. Ɔ ti kɛ e nyrɛn sa.

²¹ I ti yɛ man e klun jɔ-ɔ. I su yɛ e lafi-ɔ.

²² Anannganman, ye nga e sunnzun kɛ a `yo ye'n, fa yo ye.