Jue Mun 32 - NYANMIƐN NDƐ'N 1998

Sran ng'ɔ di i sa tɛ b'ɔ yo'n i nanwlɛ'n, Nyanmiɛn yaci cɛ i

1 Jue nga ti David liɛ.

¹ Jue nga ti David liɛ. I waan: Sran nga Nyanmiɛn yaci i fɔnlɛ cɛ i'n, i liɛ su ti ye! Sran nga Nyanmiɛn yaci i wun sa'n cɛ i'n, i liɛ su ti ye!

² Sran nga b'ɔ di-man ndrunmun'n, bɔ Anannganman bo-mɛn i fɔnlɛ'n su di-man jɔlɛ kun'n, i liɛ su ti ye!

³ Kɛ m muan min nuan bɔ n kan-man sa nga n yoli'n, kpɛkuun min wunmiɛn'n ɔ kpɛ su. Yɛ kɛ aliɛ'n ko cɛn sa'n, n kplin lele lika'n jɔ .

⁴ Afin i wia nun o, i kɔnguɛ o, a fa sa mun yi min su. Kpɛkuun min wunmiɛn'n ɔ wie, yɛ n yo kɛ waka b'ɔ wu kee wawa nun'n sa.

⁵ Yɛ n seli min wun kɛ: «Man n sin n di min sa tɛ'n i nanwlɛ n kle Anannganman ke!» Yɛ n kannin min fɔnlɛ bɔ n fɔnnin'n n kleli wɔ-ɔ, m'an fia-man su. Kpɛkuun ɔ kusu, min wun sa sɔ'n b'ɔ ti kɛ trɔ sa b'ɔ jin min ti su'n, a sike jinnin.

⁶ Nga ti yɛ sɛ ɔ ju kɛ ɔ sufuɛ nanwlɛfuɛ'm be `srɛ wɔ'n, be srɛ wɔ nin-ɔn. I liɛ'n, sɛ sa kekle wie su wa nyan be b'ɔ ´yo kɛ nzue yɛ ɔ su wa mɛn be sa'n, ɔ nyan-man be le.

⁷ A ti min fiawlɛ, a sasa min, ɔ man nyrɛnnɛn tɔ-man min su. Kɛ a de min'n, n klun ti jɔwa, yɛ wɔ man jue ngunmin yɛ n sro-ɔ.

⁸ Anannganman wan yoo: «N wa kle wɔ like, yɛ n wa kle wɔ atin ng'ɔ ti bɔ a fa su'n. N wa man wɔ afɔtuɛ, n ´nian wɔ su

⁹ kɛ ɔ ´yo nan sa ɔ'a tɔ-man ɔ su'n ti. Nán yo kɛ nnɛn kpanngɔ annzɛ milɛ b'ɔ be si-man ngwlɛlɛ'n be sa. Be fa nyanman nin blalɛ wla be nuan'n nun.

¹⁰ Afɛ wafa-wafa'n kwlaa kpɛ sin yia klunwifuɛ'n pɛ, sanngɛ sran ng'ɔ fɛ i wla gua Anannganman su'n, Anannganman niɛn i lika, ɔ yo i kpa.

¹¹ Nyanmiɛn sufuɛ nanwlɛfuɛ mun, man amun klun jɔ, man amun wun kpaja amun Anannganman ti. Sran kpa mun, amun klun b'ɔ ti jɔwa'n ti, an `bo sro!»