Jue Mun 31 - NYANMIƐN NDƐ'N 1998

Anannganman wɔ yɛ a sasa min-ɔn

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Anannganman, ɔ sin yɛ m ba fialɛ-ɔ. Nán man n wun nyannzuɛn le! Wɔ bɔ a di nanwlɛ'n, de min.

³ Sie ɔ́ su wa nan de min ndɛndɛ! A ti kɛ yɛbuɛ sa, min waan n ´talo wɔ. Yɛ min waan n ´fia wɔ nun. I liɛ'n, n ´fite nun!

⁴ A ti kɛ yɛbuɛ sa, wɔ yɛ n talo wɔ-ɔ. A ti kɛ min fiawlɛ sua sa. Nian ɔ dunman'n ti kle min atin'n, yɛ dun mmua min nyrun.

⁵ N si kɛ a ´yi min aya bɔ b'a suɛ i min wun'n i nun ´fite. Afin wɔ yɛ a ti min sasafuɛ-ɔ.

⁶ Anannganman, n fali min wun n wlali ɔ́ sa nun, yɛ wɔ man m'an fite nun. Wɔ Nyanmiɛn, a bua-man ato .

⁷ Mín nyin ci be bɔ be fa bé wun man ninnge finfin kɛ amuɛn sa'n mun. Anannganman su yɛ mín wla'n ɔ wo-ɔ.

⁸ Ɔ klun-ufue'n ti, n klun'n ɔ jɔ, yɛ min wun kpaja min, afin a wun afɛ ng'ɔ o min su'n, yɛ awlaboɛ ng'ɔ o min nun'n, a si.

⁹ A yi-man min a wla-man min kpɔfuɛ'm bé sa nun, wɔ man m'an di alaje.

¹⁰ Anannganman, si min aunnvuɛ, afin nyrɛnnɛn o min su! Awlaboɛ'n ɔ'a kun min kpo. I ti min nyinma'n ɔ'a ɔ min ti nun sa fofoo, min wun ɔ'a fɔ, yɛ m'an yo kokloo.

¹¹ N wun i kɛ min nguan'n ɔ kpɛ sin min akunndan b'ɔ sanngan'n ti. Afuɛ kwlakwla, fɛfɛlɛ yɛ n fɛfɛ-ɔ. Min fɔnlɛ'n ti, min fanngan'n kwlakwla su wie. Min owie'n nun yo min ya fiaan!

¹² Min kpɔfuɛ'm be dunman nun ti, be nga e nin be e lika'n mantan su'n, be yaci-man min srilɛ. Min sifuɛ'm be bɔbɔ, mín wun yo be kain. Kɛ be wun min gua su lɔ'n, be kwla-man min wun lɛ wunnge.

¹³ Bé wla fi min kɛ sran bɔ ɔ'a wu'n sa. N ti min liɛ kɛ like wie bɔ ɔ'a mlin'n sa.

¹⁴ Sran sunman be kan mín wun ndɛ tɛtɛ, n ti. Be wla min srɛ lika'n kwlakwla nun. Be cici min wun ndɛ. Min kunlɛ akunndan yɛ be bu-ɔ.

¹⁵ Sanngɛ min liɛ'n, Anannganman, n ´fa min wun n ´wla ɔ sa nun. Min liɛ'n, nga n si i'n yɛlɛ kɛ a ti min Nyanmiɛn.

¹⁶ Ɔ sa nun yɛ min nguan'n ɔ wo-ɔ. De min min kpɔfuɛ mun nin min yalɛ klefuɛ'm bé sa nun.

¹⁷ Nian min nyrun. Ɔ klun-ufue'n ti, de min.

¹⁸ Anannganman, sɛ n kpan flɛ wɔ'n, nán man mín nyin gua ase. Be nga be bu-man wɔ like fi'n bɔ be bu-man ɔ nuan ndɛ'n i like fi'n, man be yɛ bé nyin gua ase-ɔ. Man wie'n ɔ fa be, man be nuan'n ɔ kata.

¹⁹ Nán man atofuɛ'm be nyan nuan be ijɔ kun, afin be ti wun tufuɛ. Sran'm bé wun yo be tɛ, yɛ be ijɔ tɛtɛ kle sran kpa mun.

²⁰ Anannganman, ɔ klun-ufue'n ɔ cɛnnin o! Be bɔ bé nyin yi wɔ'n bɔ be talo wɔ'n, ɔ klun-ufue sɔ'n ti a yo be ye. Kɛ a ´yo be ye sɔ'n, sran kwlaa nyin ta nun.

²¹ A fɛ i sɔfuɛ mun fia kan ɔ bɔbɔ ɔ́ nyin ta lɛ'n. Bé wun sa wla bɔ sran'm be cici'n, wie fi nyan-man be. A fa be sie, ɔ man sran'm be nuan tɛ kwla to-man be.

²² N ´la Anannganman i ase. N yoli kɛ klɔ wie bɔ alɛ kunfuɛ'm b'a sin b'a yiɛ i'n sa. Anannganman yoli min ye, ɔ deli min.

²³ Kɛ min akunndan'n sanngannin'n, n kannin kɛ: «Anannganman ɔ'a kan min bo.» Sanngɛ kɛ n kpan flɛli wɔ'n, a tili min aunnvuɛ srɛlɛ'n.

²⁴ Nyanmiɛn sufuɛ nanwlɛfuɛ mun, amun `klo Anannganman! Afin Anannganman nian be bɔ be lafi i su'n be su, sanngɛ tutrefuɛ mun'n, ɔ man be tutre i nuan akatua lele kpe nun.

²⁵ Amun bɔ amún wla'n wo Anannganman su'n, amun `jran kekle, yɛ amun `tra amun anwlɛn!