Jue Mun 29 - NYANMIƐN NDƐ'N 1998

Anannganman i aniɛn'n

1 Jue nga ti David liɛ.

¹ Jue nga ti David liɛ. I waan: Nyanmiɛn su lɔfuɛ mun, amun `manman Anannganman, amun `mɛn i kɔmin su!

² Amun `manman Anannganman. Amun `mɛnmɛn i i dunman b'ɔ ti dan'n ti. Kɛ ɔ yi i nyannyan ng'ɔ ti'n nin i tinmin'n be nglo'n, amun `koto i bo.

³ Anannganman i nɛn'n ɔ tɛ nzue'm be su. Nyanmiɛn bɔ i nyrun'n yo sro'n, i yɛ man nyanmiɛn'n ɔ kpla-a. Anannganman yɛ ɔ sie nzue mun-ɔn, be wo i bo.

⁴ Anannganman i nɛn'n ɔ yo sro. I nɛn'n i wafa b'ɔ tɛ'n, ɔ kle kɛ ɔ ti famiɛn.

⁵ Anannganman i nɛn'n ɔ bubu sɛdri waka'm be nun. Anannganman bubu Liban lɔ sɛdri waka'm be nun.

⁶ Ɔ keje Liban oka mun. Be yo kɛ nannin wie mun bɔ b'a kpɛ cro, bɔ be su tu kpɛn'n sa. Ɔ keje Ɛrmɔn oka'n. Oka sɔ'n ɔ yo kɛ awɛ wie bɔ ɔ'a kpɛ cro, bɔ ɔ su tu kpɛn'n sa.

⁷ Anannganman i nɛn'n ɔ yo man nyanmiɛn'n kpa sin.

⁸ Anannganman i nɛn'n man aawlɛ flɛnnɛn'n ɔ keje. Anannganman i nɛn'n man Kadɛs aawlɛ flɛnnɛn'n ɔ keje.

⁹ Anannganman i nɛn'n man flete'm be ka lɛ be wu ba. Anannganman i nɛn'n man bo'n nun waka'm be nnya'n ɔ kpɛ gua. Yɛ i sua'n nun lɔ'n, sran'm be kwlaa be kpan kɛ: «Be `manman Nyanmiɛn'n!»

¹⁰ Kɛ anannganman su nzue dan'n ´tɔ'n, Nyanmiɛn yɛ ɔ mɛnnin i atin-ɔn. Ɔ ti famiɛn tititi.

¹¹ Man Anannganman ɔ man i nvle'n nunfuɛ'm be fanngan. Man Anannganman ɔ yrɛ i nuan man i nvle'n nunfuɛ mun, ɔ `yo man bé wun jɔ be fɔuun.