Jue Mun 27 - NYANMIƐN NDƐ'N 1998

Anannganman ti min defuɛ, mín wun jɔ min fɔun

1 Jue nga ti David liɛ.

¹ Jue nga ti David liɛ. I waan: Anannganman ti mín kannin nin min defuɛ. ?Wan yɛ n tɛ sro i ekun-ɔn? Anannganman ti min nguan'n i nun trafuɛ. ?Wan li wun yɛ srɛ tɛ kun min-ɔn?

² Sɛ sa tɛ yofuɛ'm be ba kɛ nnɛn wlɛfuɛ mun sa kɛ be wa ´di min nnɛn'n, min kpɔfuɛ sɔ mun, be yɛ srɛ kun be yɛ bé wun usu-usu be, yɛ be tɔ-ɔ.

³ Sɛ alɛ kunfuɛ akpasua dan kun bo sin yia min kɛ be nin min ´kun'n, srɛ bɔ kaan sa su kun-man min. Kɛ be ´fa alɛ wla min sin'n, wuun blɛ li yɛ min wla'n ɔ su gua ase-ɔ.

⁴ Like nga n srɛ i Anannganman sa nun'n, ɔ ti kunngba cɛ. Yɛ kusu ɔ lo min kpa. Like sɔ'n yɛlɛ kɛ n klo kɛ n ´trɛn i sua'n nun cɛn kwlaa lele min nguan'n i awieliɛ, nan n ´kannvun i bɔbɔ Anannganman, afin ɔ yo nyɛnmɛn , yɛ n ´fa min wun m mɛntɛn i.

⁵ I liɛ'n, cɛn nga sa su ba'n, ɔ ´fa min fia i tannin sua'n nun, yɛ ɔ ´man mín su sie i yɛbuɛ kun su nglo mmua kpa.

⁶ Kpɛkuun min yɛ m'an nyan kɔmin min kpɔfuɛ nga be sin yia min'n be nyrun yɛ. N ´yi sraka Anannganman i sua'n nun n ´fa mɛn i. M ´bo awɛ, n ´to jue, m ´mɛnmɛn i.

⁷ Anannganman, n kpan n flɛ wɔ, tie min aniɛn'n, si min aunnvuɛ nan tɛ min su.

⁸ Ndɛ nga a kannin'n, m bu i akunndan kpa. A seli kɛ: «Amun `fa amun wun mantan min!» N kusu nanwlɛ, ee Anannganman, n fa min wun mantan wɔ o!

⁹ Nán kaci ɔ́ sin si min. Nán fa ya fuan min. Wɔ yɛ a ti min ukafuɛ-ɔ, nán yi min ase, nán yi min gua'n su. Wɔ Nyanmiɛn'n, wɔ yɛ a ti min defuɛ-ɔ!

¹⁰ Sɛ bɔ mín si nin mín nin be yi min blo'n, Anannganman ɔ ´fa min sie.

¹¹ Be bɔ be klo-man mín sa'n be ti, Anannganman, kle min wɔ atin'n, yɛ fa min sin atin kpa'n su.

¹² Nán fa min wla min kpɔfuɛ'm bé sa nun. Nian, sran suɛn tɔnfuɛ'm b'a jaso min wun. Be ti wlɛfuɛ ngunmin kokoko yɛ be o lɛ-ɔ.

¹³ ?Kɛ e wo asiɛ nga su'n, sɛ n lafi-man su kɛ Anannganman yi i klun-ufue'n nglo'n, wuun n ´yo i sɛ?

¹⁴ Fa ɔ́ wla'n gua Anannganman su. Jran kekle, yɛ tra wɔ anwlɛn. Fa ɔ́ wla'n gua Anannganman su.