Jue Mun 25 - NYANMIƐN NDƐ'N 1998

Kle min wɔ atin nga n `fa su'n, yaci mín tɛ mun cɛ min

1 Jue nga ti David liɛ.

¹ Jue nga ti David liɛ. I waan: Anannganman, n kpɛ mín nyin ɔ́ wun lɔ.

² Min Nyanmiɛn, n fa min wla'n n gua ɔ su, nán man n wun nyannzuɛn. Nán man min kpɔfuɛ'm be kwla min nan be sri min.

³ Sran ng'ɔ lafi ɔ su'n, ɔ wun-man nyannzuɛn le. Be bɔ be yi wɔ blo'n, be yɛ be nin nyannzuɛn'n ɔ fata-a, nán be nyan like fi.

⁴ Anannganman, kle min wɔ atin'n, kle min kan n `sin'n.

⁵ Yo man n fa ɔ nanwlɛ atin'n, kle min ngwlɛlɛ man n si i, afin a ti min Nyanmiɛn, a ti min defuɛ. Ɔ su yɛ n fa min wla'n n gua-a.

⁶ Anannganman, nán wɔ wla fi ɔ klun-ufue nin aunnvuɛ bɔ a si sran mun'n! Afin be o lɛ tititi.

⁷ Man ɔ wla fi fɔnlɛ nga n fɔnnin min gbanflɛn nun'n, nin sa tɛ nga n yoli'n. Ee! Anannganman, ɔ klun-ufue'n nin aunnvuɛ bɔ a si sran mun'n ti, nán ɔ wla fi min.

⁸ Anannganman ti kpa, ɔ ti sɛsɛ. I ti ɔ kle be bɔ b'a fɔn'n be atin.

⁹ Ɔ kle wun ase kanfuɛ mun kɛ be `fa yo sɛsɛ `ju'n. Ɔ fɛ i atin'n kle wun ase kanfuɛ mun.

¹⁰ Be kwlaa nga be nian aenguɛ nga Anannganman nin be tra'n i su'n, bɔ be fɛ i mmla'm be su'n, kɛ b'ɔ di nanwlɛ'n ti'n, ɔ si be aunnvuɛ.

¹¹ Anannganman, kɛ a nian ɔ dunman'n, kpɛkuun kannzɛ mín wun sa'n cɛnnin'n, sanngɛ ɔ li, yaci cɛ min.

¹² Sran nga i nyin yi Anannganman'n, ɔ kle i atin ng'ɔ `fa'n.

¹³ I sɔ sran liɛ'n, i wun jɔ i fɔuun. Mɛn'n ɔ ´yo i osu'n nunfuɛ'm be liɛ.

¹⁴ Anannganman kan i klun ndɛ kle be bɔ bé nyin yi i'n, afin be ti i janvuɛ. Yɛ aenguɛ ng'ɔ nin be tra'n ti, ɔ kle be ngwlɛlɛ be si i.

¹⁵ N kpɛ mín nyin Anannganman su blɛ'n kwlaa. Sɛ n tɔ aya wie nun'n, i yɛ ɔ yi min-ɔn.

¹⁶ Anannganman, kpɛ ɔ́ nyin min su, si min aunnvuɛ, afin n lɛ-man sran, yɛ n ti nyrɛnnɛnfuɛ.

¹⁷ Awlaboɛ ng'ɔ o mín su'n, i nyrun yɛ ɔ kɔ-ɔ. Yi be mín su.

¹⁸ Nian nyrɛnnɛn nin afɛ bɔ n wo nun'n nan yaci mín sa tɛ'n kwlaa cɛ min.

¹⁹ Nian min kpɔfuɛ'm be sɔnlɛ bɔ be sɔnnin-ɔn. Nian kɛ be kpɔ min dan-an.

²⁰ Sasa min, yɛ de min. Sɛ n talo wɔ-ɔ, nán man n wun nyannzuɛn.

²¹ Ɔ su yɛ n lafi-ɔ. Uka min, nán man n yo sa tɛ. Man n nanti kɛ ɔ fata'n sa.

²² Nyanmiɛn, de Izraɛlfuɛ mun nyrɛnnɛn'n kwlaa nun!