Jue Mun 24 - NYANMIƐN NDƐ'N 1998

Anannganman su wlu i sua'n nun

1 Jue nga ti David liɛ.

¹ Jue nga ti David liɛ. I waan: Anannganman liɛ yɛlɛ asiɛ'n nin i su ninnge'n kwlaa. I liɛ yɛlɛ mɛn'n nin i nun sran'n kwlaa .

² Ɔ takali asiɛ'n jenvie'n su. Ɔ tɛkɛli i nzue ba'm be su.

³ ?Wan yɛ ɔ ´kwla fu Anannganman i oka'n su lɔ-ɔ? ?Wan yɛ ɔ ´fu ko jran Anannganman i sua'n nun lɔ-ɔ b'ɔ ´yo ye-ɔ?

⁴ ?Nán sran nga ɔ'a yo-man sa tɛ fi, b'ɔ sa tɛ nun-mɛn i anwlɛn'n nun, b'ɔ ti-man ato buafuɛ, b'ɔ ta-man nda ngbɛn-ngbɛn nin-ɔn ?

⁵ I sɔ sran liɛ'n, Anannganman'n ɔ ´yrɛ i nguan. Nyanmiɛn b'ɔ ti i defuɛ'n, ɔ ´si i aunnvuɛ.

⁶ Zakɔb Nyanmiɛn, be bɔ be kpan flɛ wɔ'n, bɔ be mantan wɔ'n, like nga be nyɛn i'n yɛ ɔ o lɛ-ɔ.

⁷ Anuan mun, amun `tike nan amun `la su gbauun! Anuan mun, amun o lɛ anannganman-anannganman, amun `tike man Famiɛn'n bɔ i nyrun'n ti nyannyannyan'n ɔ wlu.

⁸ ?Wan yɛlɛ famiɛn dan sɔ'n? Anannganman b'ɔ ti safunyrɛn dan nin-ɔn, Anannganman b'ɔ ti alɛ nun safunyrɛn nin-ɔn.

⁹ Anuan mun, amun `tike nan amun `la su gbauun. Anuan mun bɔ amun o lɛ anannganman-anannganman'n, amun `tike man Famiɛn'n bɔ i nyrun'n ti nyannyannyan'n ɔ wlu.

¹⁰ ?Wan yɛlɛ famiɛn dan sɔ'n? Famiɛn dan sɔ'n yɛlɛ Anannganman b'ɔ sie like kwlaa'n.