Jue Mun 22 - NYANMIƐN NDƐ'N 1998

E Defuɛ'n i nyrun wunlɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be `nian jue nga be to i kɛ Flete'n ɔ Fite Njɛnniɛn Su'n i su yɛ be `to-ɔ.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be `nian jue nga be to i kɛ Flete'n ɔ Fite Njɛnniɛn Su'n i su yɛ be `to-ɔ. I waan:

² Min Nyanmiɛn! Min Nyanmiɛn! ?Nguɛ ti yɛ a kaci ɔ sin si min-ɔn? ?Nguɛ ti yɛ a nin min ye afiɛn'n su ti nun bɔ a de-man min-ɔn? Kokolɛ'n ɔ'a kun min kpo. ?Nguɛ ti yɛ n flɛ wɔ bɔ a tɛ-man n su-ɔ ?

³ Min Nyanmiɛn, wia'n nun n kpan flɛ wɔ, a tɛ-man mín su. Kɔnguɛ'n, n nyan-man alaje mlɔnmlɔn.

⁴ Ɔ nzuɛn'n nin klɔ sran liɛ'n ti-man kun. Izraɛlfuɛ'm be manman wɔ tititi.

⁵ Ɔ su yɛ e nannan'm be fa bé wla'n be guali-ɔ. Be fa guali ɔ́ su, yɛ a deli be.

⁶ Be kpan flɛli wɔ, yɛ a deli be. Be fali bé wla'n guali ɔ́ su, yɛ bé nyin a gua-man ase mlɔnmlɔn.

⁷ Min liɛ'n, m'an kaci kɛ srɛ sa, nán sran yɛlɛ min kun. Sran'm be kwlaa be gua mín nyin ase, nvle'n nunfuɛ'm be kwlaa be yo min finfin .

⁸ Be kwlaa nga be wun min'n, be fa min yiyi be nyin su, be keje bé ti'n sɛkɛsɛkɛ .

⁹ Be se kɛ: «B'ɔ fɛli i wla'n guali Anannganman su nin-ɔn, man Anannganman de i e! Anannganman ɔ klo i, man ɔ de i e !»

¹⁰ Blɛ bɔ n wo mín nin klun lɔ'n, wɔ yɛ a yili min fiteli wa-a. Wɔ yɛ a niannin min su blɛ bɔ n tɛ nɔn nyɔnflɛn nin-ɔn.

¹¹ Kɛ n wo min nin klun lɔ'n yɛ a boli min su nianlɛ'n i bo-ɔ. I nun bɔ n wo lɔ sɔ'n, a ti min Nyanmiɛn lele yɛ ɔ'a fa ju yɛ.

¹² Blɛ bɔ nyrɛnnɛn'n ɔ mantan min'n, bɔ sran fi ba-man min ukalɛ'n, nán wanndi min.

¹³ Be nga be klo-man min sa'n, be sin yia min, be ti kɛ nannin tola mun sa. Be kpɛ sin yia min, be ti kɛ Bazan lɔ nannin tola mun sa, be yo sro .

¹⁴ Be trɛ bé nuan'n nun be kpan kɛ asɔmɔli bɔ i waan ɔ ´di nnɛn'n sa. Be waan be ´di min.

¹⁵ Min wunmiɛn'n ɔ wie kɛ nzue b'ɔ sonji kɔ'n sa. N kwla jran-man n ja'n su kun. Yakpa bɔ min waan n ti'n, m'an kaci kɛ nguɛn bɔ ɔ'a klo'n sa.

¹⁶ Min konviabo'n ɔ'a wu kee, min taaman'n ɔ'a mantan min nuan'n klun lɔ kpan. W'a fa min a sie ndia'n i wun koko .

¹⁷ Sran tɛtɛ'm be sin yia min, be sɔnnin kpanngbangban. Be ti kɛ alua sa, be kpɛ sin yia min. Be fitili mín sa nin mín ja mun .

¹⁸ Koklo bɔ m'an yo dan'n ti min owie'n kwlaa gua su nyɛnnglɛɛn, min kpɔfuɛ'm be nian min kleiin .

¹⁹ Be cɛcɛli min tralɛ'm be nun be fali. Be tuli min tralɛ dan'n i wun fɔtɔ .

²⁰ Anannganman, nán wanndi min, wɔ yɛ a man min wunmiɛn-ɔn! Bla ndɛndɛ wa de min!

²¹ Sasa min, nán be fa tokofi be kun min. Sasa min, nán alua sɔ'm be yo min like!

²² De min asɔmɔli'n i nuan nun. De min, nán awɛ sɔ'm be fa be wɛ'n be yo min like.

²³ M ´bo wɔ dunman n ´kle min niaan mun. Kɛ sran'm be yia lɛ'n, m ´manman wɔ lɛ.

²⁴ Amun bɔ amun nyin yi Anannganman'n, amun `mɛnmɛn i! Zakɔb i osu'n nunfuɛ mun, amun kwlakwla amun `yi i ayɛ. Izraɛl i osu'n nunfuɛ mun, kɛ amun wo i nyrun'n, man srɛ kun amun, yɛ amun `usu.

²⁵ Afin ɔ yo-man nyrɛnnɛnfuɛ'n i finfin, ɔ yi-mɛn i ase, ɔ kaci-mɛn i sin si-mɛn i. Sanngɛ kɛ nyrɛnnɛnfuɛ sɔ'n ɔ kpan flɛ i'n, ɔ sie i su ɔ ti.

²⁶ Anannganman, wɔ yɛ man n kwla manman wɔ sran nga be yia kpanngban'n be nyrun-ɔn. Be nga be fa bé wla be gua ɔ su be nyrun'n, like nga n kan kleli wɔ kɛ n ´yo man wɔ'n, n ´yo.

²⁷ Yalɛfuɛ'm be ´di aliɛ be ku ´yi. Be nga be fa bé wun mantan Anannganman'n, be´mɛnmɛn i yɛ be ´nyan nguan tɛnndɛn.

²⁸ Be kwlaa nga be tran asiɛ wunmuan'n su, kannzɛ be o mmua o, man be bu Anannganman i akunndan, yɛ be blɛ i sin. Awlobo-awlobo nga be o nvle-nvle'm be nun'n, man be nunfuɛ'm be kwlaa be koto i bo!

²⁹ Afin sielɛ'n ɔ ti i liɛ. I yɛ ɔ sie nvle-nvle'm be kwlaa-a.

³⁰ Be kwlaa nga be ti kwlafuɛ asiɛ'n su'n, be ´koto i bo. Be kwlaa nga b'a sa bé sin ndutre'n nun bɔ be nguan'n ɔ'a fi bé sa'n, be kusu be ´koto i bo wie.

³¹ Be osu'n nunfuɛ'm be kwlaa be wa su i. Ba nga be wa wu be'n, be ´kɛn i ndɛ'n kle be.

³² Be nga be wa ba kasiɛn'n, be ´kan sa ng'ɔ yo mannin i sran mun'n kle be .