Jue Mun 21 - NYANMIƐN NDƐ'N 1998

Anannganman Nyanmiɛn man famiɛn'n ɔ nyan ye

1 Jue nga ti David liɛ. Ɔ o jue tofuɛ'm be su kpɛn'n i fluwa'n be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'n be nun wie. I waan:

² Anannganman, famiɛn'n i klun ti jɔwa, afin a niɛn i su sakpa. Kɛ a de i'n, ɔ yo i fɛ dan.

³ Like nga i konvi o su'n, a fa mɛn i. Like ng'ɔ usa'n, a kpɛ-mɛn i.

⁴ Ɔ klun-ufue'n ti, a yo i ye tititi. A fa famiɛn kle b'ɔ ti sika ɔkwlɛ'n a fa wlɛ i ti.

⁵ Ɔ srɛli wɔ nguan, a mɛnnin i. A mɛnnin i nguan tɛnndɛn, nguan sɔ'n ɔ wie-man le.

⁶ Ɔ ukalɛ bɔ a ukɛ i'n ti, ɔ'a nyan nyrun dan. Ɔ dunman nun ti i nyin a uke, yɛ i nyrun a ba nyan.

⁷ Wɔ man kɛ be se kɛ sran ɔ'a nyan muae'n yɛ ɔ nyɛnnin i-ɔ. Kɛ a nin i be tran'n ti ɔ man i klun jɔ.

⁸ Famiɛn'n ɔ fɛ i wla'n gua Anannganman su. Nyanmiɛn'n bɔ like fi nun-mɛn i sin'n, i kpa b'ɔ yo famiɛn sɔ'n ti, sa fi su nyɛn-mɛn i.

⁹ Famiɛn, ɔ sa'n ɔ ´kan ɔ kpɔfuɛ'm be kwlaa, a ´nyan be bɔ be kpɔ wɔ'n mun, a ´tra be.

¹⁰ Sɛ ɔ́ nyin gua bé wun'n, a ´fa be trɔ sin dan kpa. Anannganman kusu ɔ ´fa ya, ɔ ´nunnun be, sin'n ɔ ´di be.

¹¹ A ´yo man be osufuɛ'm be ´nunnun asiɛ'n su. Be osu'n ɔ ´tu sran'm be afiɛn.

¹² Sa tɛ nga be guguli kɛ be ´yo wɔ'n, akunndan tɛ nga be buli i ɔ́ wun'n, be su kwla yo-man wɔ wie fi.

¹³ Afin a ´yo man be ´wanndi, kpɛkuun a ´to bé wun ta.

¹⁴ Anannganman, jaso, yi ɔ fanngan'n i nglo! E wa to jue e ´bo flɛ wɔ, yɛ e ´manman wɔ, ɔ tinmin'n ti.