Jue Mun 20 - NYANMIƐN NDƐ'N 1998

Famiɛn ng'ɔ kɔ alɛ kunlɛ'n, i Nyanmiɛn bɔ be srɛ mɛn i'n

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Sɛ nyrɛnnɛn tɔ wɔ su'n, nan a kpan flɛ Anannganman'n, man ɔ tɛ wɔ su. Man Zakɔb i Nyanmiɛn'n ɔ sasa wɔ.

³ Kɛ ɔ wo i sua'n nun lɔ'n, man ɔ fin lɔ bla ɔ wa uka wɔ. Man ɔ fin Siɔn lɔ ɔ wa suan ɔ bo.

⁴ Man i wla kpɛn ɔ sraka nga a yi be'n be su. Man ɔ sɔ tɛ nga be yrɛ i nnɛn'n kɔlikɔli'n bɔ a yi be'n be nun.

⁵ Like nga ɔ konvi o su'n, man ɔ fa man wɔ. Sa kwlaa nga ɔ waan a ´yo'n, man ɔ yo ye i fanngan nun!

⁶ I liɛ'n, e klun ´jɔ ɔ́ ti bɔ a ´nyɛn i'n ti, yɛ e ´man flanga'n su e Nyanmiɛn'n i dunman nun. Man Anannganman yo i kwlaa nga a usɛ i'n man wɔ!

⁷ Siɛn'n m'an wun i kɛ Anannganman de famiɛn b'ɔ sieli i'n. Kɛ ɔ o nyanmiɛn su lɔ kan ɔ tran lɔ'n, ɔ tie i srɛlɛ'n yɛ ɔ tɛ i su. Ɔ tu i klun ukɛ i, ɔ de i.

⁸ Wie'm be lafi be kakaklolo'm be su, wie'm be kusu be lafi nnɛn kpanngɔ'm bé su. E liɛ'n, Anannganman e Nyanmiɛn'n yɛ e fa e wla guɛ i su-ɔ.

⁹ Be sɔfuɛ'm bé ja'n seli kpɛkuun be tɔ. Sanngɛ e liɛ'n e jaso jran, kpɛkuun e jin lɛ cinnjinnjin.

¹⁰ Anannganman, de famiɛn'n! Nan cɛn nga e kusu e flɛ i'n, ɔ'a kwla tɛ e su.