Jue Mun 2 - NYANMIƐN NDƐ'N 1998

Anannganman i sran ng'ɔ sieli i famiɛn'n

¹ ?Nguɛ li ti yɛ nvle-nvlefuɛ'm be plan sɔ-ɔ? Be cici sran'm be wun ngbɛn.

² Asiɛ'n su wa famiɛn'm b'a jaso. Bé bo ɔ'a yo kun Anannganman nin i sran ng'ɔ sieli i famiɛn'n bé wun.

³ Be ko se kɛ: «E `nyannji nyanman nga be fa ci ye'n ke. E `yi jrɔkɔ mun e `gua be blo mmua lɔ.»

⁴ Kɛ be kɛn i sɔ'n, ɔ kle Anannganman i srilɛ. Ɔ o nyanmiɛn su lɔ ɔ to be mma.

⁵ Ɔ'a fa ya kpa yɛ ɔ nin be kan-an. Ya dan sɔ'n b'ɔ fali'n ti man srɛ'n kun-man be ngowa.

⁶ I waan: «M bɔbɔ min yɛ n sieli famiɛn'n bɔ n fɛli i Siɔn b'ɔ ti min oka'n i su lɔ nin-ɔn.»

⁷ Nyanmiɛn i sran ng'ɔ sieli i famiɛn'n waan: «Amun `jran man m bo Anannganman i ndɛ b'ɔ fin i nuan fiteli'n i jɔ ke! Ɔ seli min kɛ yo: ‹A ti n wa! Ndɛkɛn yɛ n wuli wɔ-ɔ .

⁸ Sɛ ɔ waan n fa mɛnmɛn mun m `man wɔ'n, sɛ ɔ waan n fa asiɛ'n i lika'n kwlaa n `fa man wɔ'n, kan nan n fa man wɔ, be ´yo ɔ liɛ.

⁹ A ´fa ɔ famiɛn kpɔnman b'ɔ ti blalɛ'n yɛ a ´fa bo mɛn sɔ'm be nunfuɛ mun-ɔn. A ´bubu be nun kɛ be su bo sɛ bɔ be fa ufa be wu'n sa .› »

¹⁰ I ti'n, famiɛn mun, amun `yo ngwlɛlɛfuɛ. Asiɛ'n su jɔlɛ difuɛ mun, amun `jran man be man amun afɔtuɛ.

¹¹ Sɛ amun ´su Anannganman'n, amun `su i nin anyinyiɛ, ɔ nin awunblibliɛ. Man amun klun jɔ.

¹² Amun `koto i bo nan ɔ'a fa-man ya, nan atin nga amun fa su'n, amu'an mlin-man. Afin ɔ fa ya ndɛndɛ kpa. Sran ng'ɔ kunndɛ fiawlɛ i nun'n, i liɛ su ti ye!