Jue Mun 19 - NYANMIƐN NDƐ'N 1998

Nyanmiɛn i ninnge ng'ɔ yili be'n mun

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Kɛ a nian nyanmiɛn'n b'ɔ la nglo lɔ plaii'n, a wun Nyanmiɛn Kpli'n i nyrun b'ɔ lɛ i'n. Kɛ a nian nyanmiɛn'n b'ɔ la nglo lɔ plaii'n, a wun ninnge nga Nyanmiɛn yili be'n .

³ Cɛn kwlakwla sran'm be wun Nyanmiɛn i nyrun b'ɔ lɛ i'n, yɛ cɛn kwlakwla sran'm be wun Nyanmiɛn i ninnge ng'ɔ yoli be'n.

⁴ Ninnge sɔ'm be lɛ-man nuan nan b'a kan ndɛ kɛ e fa kan ndɛ'n sa. Be ijɔ-man kɛ e ijɔ'n sa. Be ti-man be nɛn'n.

⁵ Sanngɛ be kan ndɛ lika'n kwlaa, yɛ be ti be ndɛ bɔ be kan'n mɛn i tiwa lɔ'n, kan Nyanmiɛn kplannin kpata kun mannin wia'n lɔ'n .

⁶ Nglɛmun kɛ ɔ fin lɔ ɔ ´ba sa'n, i like b'ɔ fɛ i'n, yɛlɛ yasua bɔ ɔ'a ja bla uflɛ bɔ ɔ'a fin i atɔnvlɛ sua'n nun ɔ'a fite'n. Ɔ ti kɛ sran yakpafuɛ bɔ i klun ɔ'a jɔ kpa bɔ ɔ'a fɛ i atin'n sa.

⁷ Ɔ fɛ i nyanmiɛn'n i bue kun lɔ ɔ kɔ lele kpɛn i bue kun lɔ ekun. Like fi nun-man lɛ b'ɔ kpɛjɛ-mɛn i su-ɔ.

*

⁸ Anannganman i mmla'n, fiɛn kaan sa nun-mɛn i wun. Kɛ sran'n i wunmiɛn'n wie'n, ɔ mɛn i uflɛ. Anannganman i like ng'ɔ kle'n be ti nanwlɛ. Be kle sran ng'ɔ si-man sa'n i ngwlɛlɛ.

⁹ Sa nga Anannganman jran su kekle kɛ be yo be'n, be ti i su. Aklunjuɛ cɛ yɛ ɔ o sa sɔ'm be sin-ɔn. Nyanmiɛn i mmla'm be ti weiin, be yo man sran wun sa wlɛ.

¹⁰ Be nyin b'ɔ yi Anannganman'n ɔ ti like kpa. Ɔ sin-man le. Anannganman i jɔlɛ ng'ɔ di be'n, be ti i su. Ɔ lɛ-man kun b'ɔ ti-man nanwlɛ-ɔ.

¹¹ Jɔlɛ ng'ɔ di be sɔ'n be kpa tra sika ɔkwlɛ. Sika ɔkwlɛ nga bɔ b'a tɔn'n, sɛ ɔ sɔnnin kpa bɔbɔ'n, ɔ nin be sɛ-man. Be yo fɛ tra awɛma nzue. Be fɛ'n tra awɛma nzue nga b'a yi i uflɛ-uflɛ'n bɔbɔ.

¹² Anannganman, min bɔ n ti ɔ sufuɛ'n, n nyan bé su ngwlɛlɛ. Sran ng'ɔ fa be su'n, ɔ nyan bé su mmlusuɛ.

¹³ Kɛ sran yo sa'n, nɛ́n i ngba yɛ ɔ wun i kɛ nga ɔ'a yo-man kpa-a. Ɔ man sa nga n yoli bɔ m'an wun-mɛn i'n, yaci cɛ min.

¹⁴ Wun tufuɛ'm be ti, sasa min bɔ n ti ɔ sufuɛ'n. Nán be fu min su! I liɛ'n, sran fi su nyan-man ndɛ tɛ ɔ kɛn-mɛn i min wun, yɛ n su yo-man sa tɛ dan.

¹⁵ Anannganman, wɔ bɔ a ti kɛ yɛbuɛ sa bɔ n talo wɔ'n, wɔ bɔ a ti min defuɛ'n, ndɛ ng'ɔ fin mín nuan fite'n, ɔ nin akunndan nga m bu be min klun lɔ'n, man be jɔ ɔ klun.