Jue Mun 18 - NYANMIƐN NDƐ'N 1998

I nun bɔ famiɛn'n ɔ kwlali i kpɔfuɛ mun'n, i Nyanmiɛn ase lalɛ jue

1 Jue nga ti David b'ɔ ti Anannganman i sufuɛ'n i liɛ. Ɔ o jue tofuɛ'n be su kpɛn'n i fluwa'm be nun wie. Kɛ Anannganman deli David i kpɔfuɛ'm bé sa nun'n nin Sail i sa nun'n, yɛ ɔ kpɛli jue nga-a. Ɔ fa bo flɛli Anannganman.

¹ Jue nga ti David b'ɔ ti Anannganman i sufuɛ'n i liɛ. Ɔ o jue tofuɛ'n be su kpɛn'n i fluwa'm be nun wie. Kɛ Anannganman deli David i kpɔfuɛ'm bé sa nun'n nin Sail i sa nun'n, yɛ ɔ kpɛli jue nga-a. Ɔ fa bo flɛli Anannganman. I waan:

² Ee! Anannganman, n klo wɔ! Wɔ yɛ a man min wunmiɛn-ɔn.

³ Anannganman, a ti kɛ yɛbuɛ sa, wɔ yɛ n talo wɔ-ɔ. A ti min fiawlɛ kpa sakpa, wɔ yɛ a de min-ɔn! Min Nyanmiɛn, a ti kɛ yɛbuɛ sa, wɔ nun yɛ n nyan fiawlɛ-ɔ! A sasa min kɛ nyrɛn sa .

⁴ Man be manman Anannganman! Kɛ n kpan flɛ i'n, ɔ de min min kpɔfuɛ'm bé sa nun .

⁵ Wie'n ɔ fɛli i nyanman'n cili min. Ɔ ti kɛ nzue ba b'ɔ kpalo ninnge mun kɔ ko saci be'n sa. Ɔ wlali min srɛ.

⁶ Blɔlɔ lɔ nyanman'n blablali mín wun. Wie'n i aya'n ɔ trali min wieli.

⁷ Min nyrɛnnɛn blɛ sɔ nun'n, n kpan flɛli Anannganman'n. N flɛli min Nyanmiɛn'n, kpɛkuun ɔ o i sua'n nun lɔ ɔ tili min aniɛn'n. Ɔ sieli i su tili flɛlɛ bɔ n flɛli i'n.

⁸ Ya dan b'ɔ kunnin Anannganman'n ti, asiɛ'n ɔ kejeli, oka'm be kusu be kejeli wie.

⁹ Sin wɛnsrɛn fin i bue'n nun fiteli, sin b'ɔ di ninnge mun kɔlikɔli'n ɔ fin i nuan'n nun fiteli. Sɛnmlɛn fin sin sɔ'n nun tu kɔ.

¹⁰ Ɔ kannin nyanmiɛn su lɔ'n i ase, yɛ ɔ jrali, ɔ nantili nyanmiɛn ble kpikplikpi kpa kun su.

¹¹ Ɔ fuli anz kun su, ɔ tuli, ɔ o aunngban'n su yɛ ɔ fɛ i kɔ-ɔ.

¹² Ɔ fali aosin tuun'n ɔ kɛtɛli i bɔbɔ su. Nyanmiɛn ble tritri'n sin yiɛ i.

¹³ Lika'n ɔ kpɛjɛ i nyrun kpa weiin, kpɛkuun nyanmiɛn ble nin nzraama bɔ kɛ nzue tɔ'n ɔ gua'n, ɔ nin sɛnmlɛn be fin lika ng'ɔ kpaja sɔ'n nun fite.

¹⁴ Anannganman bɔ like fi nun-mɛn i sin'n ɔ kpannin, i kpanlɛ sɔ'n ɔ tɛli kɛ nyanmiɛn b'ɔ kpla'n sa.

¹⁵ Ɔ toli i cua mun, kpɛkuun min kpɔfuɛ'm be bo sanndili. Nyanmiɛn'n kplali, ɔ kplali. Ɔ man be wanndili.

¹⁶ Ya dan b'ɔ kunnin Anannganman'n ti, kɛ ɔ kpannin sa fiaan'n, kpɛkuun jenvie'n i bo lɔ ninnge'm be fiteli su, kpɛkuun asiɛ'n i takawlɛ'n ɔ'a fite su.

¹⁷ Kɛ ɔ o nglo lɔ'n, ɔ tinngɛli i sa'n nun, ɔ trali min nan ɔ'a yi min sa b'ɔ nyannin min, b'ɔ ti kɛ nzue yɛ ɔ su mɛn min sa'n i nun.

¹⁸ Ɔ deli min min kpɔfuɛ b'ɔ kwla'n i sa nun. Ɔ deli min min kpɔfuɛ bɔ be kekle tra min'n bé sa nun.

¹⁹ Kɛ nyrɛnnɛn'n ɔ tɔli mín su'n, be wa tɔli min su, sanngɛ Anannganman suannin mín bo.

²⁰ Ɔ yili min fiteli, ɔ deli min, afin ɔ klo min.

²¹ Sɛsɛ bɔ n ti'n, i nuan akatua yɛ Anannganman tuali min-ɔn. Sa tɛ bɔ m'an yo-man'n, i nuan like yɛ ɔ mannin min-ɔn.

²² N fali Anannganman i atin'n su kɛ ɔ fata'n sa. M'an fɔn-man min Nyanmiɛn'n i wun.

²³ N wla ɔ'a fi-mɛn i nuan su ndɛ'n. M'an yi-mɛn i mmla'm be ase.

²⁴ N klo-man kɛ ɔ wun sa min wun. I sɔ'n ti, n sasa mín wun sa tɛ'n i lika.

²⁵ Yɛ sɛsɛ bɔ n ti'n, Anannganman kusu mannin min i nuan like. Sa tɛ bɔ m'an yo-man'n, ɔ mannin min i nuan like kusu.

²⁶ Anannganman, sran ng'ɔ ti kpa'n, a nin i be nanti kpa. Sran ng'ɔ yo-man sa'n, ɔ kusu a yo-mɛn i sa.

²⁷ Sran ng'ɔ ti saun'n, a yi ɔ saun bɔ a ti'n i nglo kle i. Sran nga kusu b'ɔ bu i wun ngwlɛlɛfuɛ'n, a yi ɔ ngwlɛlɛ'n i nglo kle i.

²⁸ Sran nga be kan bé wun ase'n, a de be nvle'n. Yɛ be nga be yo bé wun dandan'n, a kan be ase.

²⁹ Anannganman min Nyanmiɛn, a ti kɛ min kannin sa. A kpaja min nyrun aosin'n nun.

³⁰ Min Nyanmiɛn, ɔ fanngan nun, e nin sonja mun e ´kun. Yɛ ɔ fanngan nun e nin klɔ wie sufuɛ mun e kwla kun.

³¹ Nyanmiɛn i atin'm bé su ti weiin. I nuan ndɛ mun'n, fiɛn kaan sa nun-man bé wun. Be nga be fa be wla guɛ i su'n, ɔ ti kɛ be nyrɛn sa.

³² ?Nán Anannganman i kunngba cɛ yɛ ɔ ti Nyanmiɛn nin-ɔn? ?Wan yɛ ɔ ti kɛ yɛbuɛ sa-a, bɔ be talo i-ɔ, sɛ nán e Nyanmiɛn'n?

³³ I yɛ ɔ man min fanngan-an. I yɛ man atin nga n fa su'n, ɔ yo kpa man min-ɔn.

³⁴ I yɛ man mín wun yo mmlɛ kɛ flete'm be liɛ'n sa-a. Ɔ yo man lika kendengleiin'n be su yɛ n nanti-ɔ.

³⁵ I yɛ ɔ kle min alɛ kunlɛ-ɔ. Ɔ man ta'n i kekleke kpafuɛ'n, kɛ n cuɛn i sa'n, ɔ taka.

³⁶ Anannganman, a ti kɛ nyrɛn sa, a sasa min, a de min, a yo min kpa ti n yo dan n kɔ min nyrun tititi.

³⁷ Wɔ man n kwla wanndi kpa yɛ min ja'm be usu-man.

³⁸ N fuan min kpɔfuɛ mun, n to be. N wie be nunkun nan m'an sa min sin.

³⁹ N jɔjɔ be nun. Be kwla-man jaso kun. Be lala asiɛ wun lɛ yɛ n tiatia be su-ɔ.

⁴⁰ A man min alɛ kunlɛ'n i wun fanngan. A yo man be bɔ be ba min kunlɛ'n bé wun glɔ be, kpɛkuun be lala min bo lɛ.

⁴¹ Wɔ man min kpɔfuɛ'm be kaci bé sin be wanndi min bo, ɔ man n nunnun be nga be kpɔ min'n mun.

⁴² Be kpan lele ngbɛn, be nyan-man defuɛ! Be kpan flɛ Anannganman, sanngɛ ɔ tɛ-man be su!

⁴³ N nunnun be, be kaci kɛ ndutre bɔ aunngban'n ɔ fita fa kɔ'n sa. N tiatia be su kɛ be su tiatia nnɔtiɛ nun sa.

⁴⁴ A de min nvlefuɛ bɔ be jaso min wun yengeiin'n bé sa nun. A fa min a sie nvle fanunfanun'm be famiɛn. Sran nga n si-man be laa'n be yɛ be su min-ɔn.

⁴⁵ Mín nuan bɔ n ´uke sa'n, wuun b'a yo like nga min waan be yo'n. Aofuɛ sɔ'm be yɛyɛ-man min ngowa.

⁴⁶ Aofuɛ'm be wun-man like nga be `fa be wla'n gua su kun-ɔn. Kɛ be ´fin bé fiawlɛ'm be nun be fite'n, kɛ bé wun usu-usu be sa.

⁴⁷ Anannganman ti kɛ yɛbuɛ sa, i yɛ n talo i-ɔ. Man ɔ tran lɛ titi o! Man be manman Nyanmiɛn b'ɔ deli min'n.

⁴⁸ Nyanmiɛn'n yɛ ɔ tu min klunngbɔ nin-ɔn. I yɛ man n sie nvle'n nun sran mun-ɔn.

⁴⁹ I yɛ ɔ de min min kpɔfuɛ'm bé sa nun-ɔn. A yo man n nyan kwlalɛ be bɔ be nin min kun'n bé su. A de min sran wlɛfuɛ'm bé sa nun.

⁵⁰ Ɔ man m ´manman wɔ be nga be ti-man Izraɛlfuɛ'n be nyrun, n ´to jue m ´bo flɛ wɔ .

⁵¹ Anannganman de sran ng'ɔ sieli i famiɛn'n, ɔ de i sa sunman nun. Sran ng'ɔ sie i famiɛn'n ɔ yo i kpa. Ɔ yo David nin i osu'n nunfuɛ'm be ye tititi .