Jue Mun 17 - NYANMIƐN NDƐ'N 1998

Bé wla bɔ be fa gua Anannganman su'n

1 David i Nyanmiɛn srɛlɛ.

¹ David i Nyanmiɛn srɛlɛ. I waan: Anannganman, min ndɛ'n yo fɛ, sie ɔ́ su tie. Tie kpanlɛ bɔ n kpan'n. Tie min srɛlɛ'n, afin nán gblɛ srɛlɛ-ɔ.

² Man min ndɛ fɛ'n ɔ fite ɔ nyrun weiin. Ɔ fata kɛ a si kɛ n ti nanwlɛfuɛ.

³ Sɛ a nian min anwlɛn'n nun lɔ'n, sɛ kɔnguɛ bɔbɔ a nian min anwlɛn'n nun lɔ sa mun'n, sɛ a sa min nian'n, a su wun-man sa tɛ min nun. N kan-man ndɛ tɛtɛ kɛ sran wie'm be yo'n sa.

⁴ N nian ɔ́ nuan ndɛ'n su yɛ n nanti-ɔ, i sɔ'n ti, kɛ n wun sa tɛtɛ yofuɛ'm be ninnge nga be yo be'n, n fa-man be atin'n su.

⁵ N kali wɔ atin'n su, n trannin cinnjin, m'an yaci-man atin nga a kleli min'n.

⁶ Nyanmiɛn, n kpan n flɛ wɔ, afin kɛ n srɛ wɔ'n, a ti. Sie ɔ́ su tie nga n kan'n.

⁷ Yi ɔ klun-ufue dan'n i nglo kle min, afin sran nga i kpɔfuɛ'm be waan be ´yo i like'n nan ɔ wa talo wɔ'n, san delɛ yɛ a de i-ɔ.

⁸ Sasa min kɛ ɔ nyinma'n sa. Fa ɔ ndɛwa'n kata min su man n trɛn i fɔnvɔ'n bo.

⁹ Man n fia klunwifuɛ nga be kle min yalɛ'n, ɔ nin min kpɔfuɛ nga be kunndɛ kɛ be ´kun min'n, bɔ b'a bo b'a sin b'a yia min'n be wun.

¹⁰ Like nga be flɛ i aunnvuɛ silɛ'n, be si-mɛn i. Bé nuan nun ndɛ'n ti dandan ngunmin.

¹¹ Be su e su, b'a bo b'a sin b'a yia ye. Nga be ko yo nan be ko yi ye ase'n, yɛ ɔ ka-a.

¹² Be ti kɛ asɔmɔli wie b'ɔ su kunndɛ like ɔ ´trɛ i nan ɔ ´titi i nun'n sa. Be ti kɛ nnɛn wlɛfuɛ wie bɔ ɔ'a bu ɔ'a sa i buɛ nuan'n sa.

¹³ Anannganman, jaso, bu be nyrun, yi be ase, fa ɔ tokofi'n de min bé sa nun.

¹⁴ Anannganman, yo man n fin bé sa nun n fite. Bu klunwifuɛ mun nin be mma mun, ɔ nin be anunman mun be fɔ.

¹⁵ N liɛ'n, m'an yo-man sa, ɔ man n nian wɔ-ɔ ɔ yo ye. Kɛ n lafi n tinnge'n b'ɔ n wun wɔ'n, n klun jɔ lele tra su.