Jue Mun 16 - NYANMIƐN NDƐ'N 1998

Sran nga Nyanmiɛn deli i wie'n i nun'n, i aklunjuɛ

1 Jue nga ti David liɛ.

¹ Jue nga ti David liɛ. I waan: Anannganman, nian min su, afin wɔ yɛ n talo wɔ-ɔ.

² N se Anannganman kɛ wɔ yɛ a ti min Min nin-ɔn. N lɛ-man like kpa fi san wɔ.

³ Ɔ sufuɛ kpakpa nga be o mɛn nga nun'n, be cɛ yɛ m bu be sran yɛ n klo be-ɔ.

⁴ Be nga be sɔ amuɛn mun'n, be nyrɛnnɛn i su ɔ uka. Be ko tu amuɛn wie mɛn uflɛ'm be nun. Tɛ mmoja nga be guɛ i ase lɛ'n, n yo-man wie. Dunman nga be ´bo be lɛ'n, m bo-man wie.

⁵ Anannganman, min like liɛ nga n nyɛnnin i'n, yɛlɛ wɔ. Wɔ yɛ a ti min wun nyan-man nun-ɔn. Ɔ sa nun yɛ min nguan'n ɔ wo-ɔ.

⁶ Min aja like liɛ nga n nyɛnnin i'n, ɔ yo nyɛnmɛn dan. Nanwlɛ, ɔ ti klanman o!

⁷ N ´la Anannganman ase, afin ɔ ti min afɔtuɛ manfuɛ. Kɔnguɛ bɔbɔ'n, n wun i sɔ min akunndan'n nun.

⁸ N yi-man min nyin Anannganman su mlɔnmlɔn. Sɛ ɔ nin min wo nun'n, srɛ kun-man min, min wun usu-man min.

⁹ Ɔ man min klun ti jɔwa, yɛ min wun kpaja min.

¹⁰ Afin a su yaci-man min blɔlɔ lɔ. A su yaci-man min bɔ n ti ɔ sran min lɛ kɛ n kplɔ.

¹¹ A ´yo man n ´wun nguan'n i atin'n. Kɛ be nin wɔ tran'n, be klun jɔ lele tra su, aklunjuɛ nga be di'n ɔ lɛ-man awieliɛ .