Jue Mun 149 - NYANMIƐN NDƐ'N 1998

Anannganman i sufuɛ nanwlɛfuɛ'm be nyrun bɔ be lɛ i'n

¹ An `manman Anannganman! An `to jue uflɛ-uflɛ kun manman Anannganman! An `mɛnmɛn i i sufuɛ nanwlɛfuɛ mun bɔ be yia'n be anyia'n nun!

² Izraɛlfuɛ mun, man amun klun jɔ i b'ɔ yili amun'n i dunman nun. Man Siɔnfuɛ'm bé wun kpaja be be famiɛn'n ti .

³ Man be si able nan be bo flɛ i. Man be bo klɛn nin jru yɛ be to jue be mɛnmɛn i.

⁴ Afin Anannganman i nvlefuɛ'm bé ti, i klun ti jɔwa. Ɔ bu be nga be kan bé wun ase'n be sran, i ti ɔ de be.

⁵ Man Anannganman i sufuɛ nanwlɛfuɛ'm bé wun nyrɛn be. Man be yi i ayɛ. Sɛ be ´la kɔnguɛ bɔbɔ-ɔ, be `bo be sro be `yi be aklunjuɛ'n i nglo.

⁶ Man Nyanmiɛn i manmanlɛ'n ɔ tran be nuan nun, yɛ man tokofi b'ɔ lɛ i nyrun lɛ i sin'n kusu tran bé sa nun.

⁷ Man be fa tokofi sɔ'n be tu be klunngbɔ nvle-nvlefuɛ'm bé su. Man be fa tu nvle-nvlefuɛ sɔ'm be fɔ.

⁸ Man be fa jrɔkɔ ci famiɛn mun. Man bé bo famiɛn'm be mantanfuɛ'm bé kpaun.

⁹ Man be bu be fɔ ng'ɔ ti klɛwa'n. Sɛ be yo sɔ'n, ɔ ´man Anannganman i sufuɛ nanwlɛfuɛ'm be kɔmin su. An `manman Anannganman!