Jue Mun 148 - NYANMIƐN NDƐ'N 1998

Nyanmiɛn i manmanlɛ nglo lɔ nin asiɛ'n su wa

¹ Amun `manman Anannganman! An bɔ an wo nyanmiɛn su lɔ'n, an `manman Anannganman! An bɔ an wo nglo lɔ'n, an `mɛnmɛn i.

² Anz mun, amun kwlaa an `mɛnmɛn i. Amun bɔ amun o nglo lɔ kpanngbangban'n amun kwlaa sɔ'n, amun `mɛnmɛn i.

³ Wia nin anglo'n, amun `mɛnmɛn i. Nzraama bɔ amun kpaja'n, amun kwlaa an `mɛnmɛn i.

⁴ Nyanmiɛn'n b'ɔ la nglo lɔ plaii'n, i nglo mmua kpa lɔ lika mun, amun `mɛnmɛn i. Nzue bɔ amun o nyanmiɛn'n b'ɔ la nglo lɔ plaii'n, i ti su nglo lɔ'n, an `mɛnmɛn i.

⁵ Man ninnge sɔ'm be manman Anannganman, afin ɔ fɛli i nuan nun ndɛ'n yɛ ɔ fa yili be-ɔ.

⁶ Ɔ sieli be kɛ be tran lɛ tititi. Ɔ mannin be mmla bɔ be to fuɛn i-ɔ ɔ yo-man ye.

⁷ Asiɛ'n su wa fuɛ mun, an `manman Anannganman. Bunman dandan mun nin amun nun ninnge sroesroe mun o,

⁸ sin o, nzraama bɔ kɛ nzue tɔ-ɔ ɔ gua nin o, aunngban dan bɔ i yɛ ɔ sunman be nin o,

⁹ oka mun o, kpɔlɛ mun o, waka nga amun su mma mun o, sɛdri waka mun, amun kwlaa,

¹⁰ blo nnɛn mun o, klɔ nnɛn mun amun kwlaa, nnɛn nga an nanti be ku'n su mun o, yɛ anunman bɔ amun tu sin mun o,

¹¹ asiɛ'n su famiɛn mun o, nvle'm be nunfuɛ mun o, amun kwlaa, famiɛn i awlo lɔ sran dandan mun o, yɛ asiɛ'n su kpɛnngbɛn mun o,

¹² gbanflɛn mun o, talua mun o, sran kpɛnngbɛn mun o, ba kanngan mun o,

¹³ amun `bo flɛ Anannganman, afin i kunngba yɛ i dunman'n ɔ ti fuwa-a. Ɔ sie asiɛ'n nin nyanmiɛn'n b'ɔ la nglo lɔ plaii'n.

¹⁴ Ɔ ukɛli i nvlefuɛ'm be wunmiɛn'n su. I sufuɛ nanwlɛfuɛ mun bɔ be yɛlɛ Izraɛlfuɛ mun bɔ be ti i nvle'n i nunfuɛ bɔ be fa bé wun mɛntɛn i'n, be fɛ i di be nuan . Amun `manman Anannganman!