Jue Mun 147 - NYANMIƐN NDƐ'N 1998

Nyanmiɛn i kwlalɛ ng'ɔ lɛ i'n

¹ An `manman Anannganman! Sɛ e bo e flɛ e Nyanmiɛn'n, ɔ ti kpa. Ɔ yo fɛ, i yowlɛ su-ɔ.

² Anannganman su kplan Zerizalɛm i uflɛ. Izraɛlfuɛ nga be trali be lomuɛn ɔli'n, i yɛ ɔ yiayia bé nuan-an.

³ Sran nga be anwlɛn'n ɔ'a kpɔtɔ be klun'n, i yɛ ɔ ti be fɔnvɔfuɛ-ɔ. Sɛ like yo be'n, ɔ nian be lika .

⁴ Ɔ ka nzraama mun. Ɔ tɔn be kwlaa be dunman kunngun-kunngun.

⁵ E Min'n ɔ ti dan, i wunmiɛn'n ɔ cɛnnin. I ngwlɛlɛ'n ɔ lɛ-man tiwa.

⁶ Anannganman suan yalɛfuɛ'm bé bo. Ɔ kan klunwifuɛ'm be ase lele be tɔ asiɛ wun bɔ.

⁷ An `to ye silɛ jue be manman Anannganman. An `bo jru be bo flɛ e Nyanmiɛn'n.

⁸ Nzue b'ɔ mlan nyanmiɛn'n b'ɔ la nglo lɔ plaii'n su'n, i yɛ ɔ mlɛn i-ɔ. Nzue ng'ɔ ko tɔ asiɛ'n su'n, i yɛ ɔ siesie yɛ man ɔ tɔ-ɔ. Ijre b'ɔ fifi oka'm bé su'n, i yɛ man ɔ fu-ɔ.

⁹ I yɛ ɔ man nnɛn'm be ijre be di-ɔ. Kɛ kɔkɔkuankuan i mma'm be kpan'n, i yɛ ɔ man be like be di-ɔ.

¹⁰ Sɛ nnɛn kpanngɔ'n ɔ ti kpinndin-kpinndin o, nán i ndɛ-ɔ. Sɛ sran'n ɔ lɛ wunmiɛn nan i ti ɔ kwla wanndi kpa o, ɔ bu-mɛn i sɔ'n i like fi.

¹¹ Be nga be nyin yi Anannganman'n, bɔ be lafi i klun-ufue'n su'n, be yɛ bé wun yo i fɛ-ɔ.

*

¹² Zerizalɛmfuɛ mun, amun `yi Anannganman i ayɛ. Siɔnfuɛ mun, amun `manman amun Nyanmiɛn'n.

¹³ Afin ɔ yo man sa fi kwla nyan-man amun mlɔnmlɔn. Ɔ yo amun mma'm be kpa.

¹⁴ Amun asiɛ liɛ nga amun tran su'n, fɔundi bɔ cɛ yɛ ɔ fa man amun-ɔn. Ble'n i kpakpafuɛ'n, ɔ yo man amun di amun ku yi.

¹⁵ Kɛ ɔ kan ndɛ kle asiɛ'n sufuɛ mun'n, i su sa'n ɔ ju ndɛndɛ kpa.

¹⁶ Ɔ tɔ nzue'n ɔ fa kata lika'n su fuaii kɛ kondro ufue kata like su'n sa. Ɔ gua bɔlɛ ufue'n, ɔ fa sanndi lika'n nun fuaii kɛ nzuɛn sa.

¹⁷ Ɔ gua laglasi'n i ase kpɔlɛkpɔlɛkpɔlɛ. ?Kɛ Anannganman ko fɛ i ayrɛ'n ko ba'n, wan cɛ yɛ ɔ kwla jran ayrɛ sɔ'n i nyrun-ɔn?

¹⁸ Kɛ ɔ ko uke i nuan'n sa'n, b'ɔ ko fitɛ i aunngban'n, wuun laglasi sɔ'n ɔ'a klo lalaa. Kpɛkuun laglasi'n b'ɔ kloli sɔ'n i nzue'n ɔ su sonji.

¹⁹ Ɔ kɛn i nuan su ndɛ mun kle Zakɔb. Ɔ fɛ i mmla fanunfanun'n man Izraɛlfuɛ mun.

²⁰ Ɔ'a yo-man nvle uflɛ fi sɔ. Be wie fi si-mɛn i mmla mun . Amun `manman Anannganman!