Jue Mun 146 - NYANMIƐN NDƐ'N 1998

Anannganman ti be nga be lɛ-man wunmiɛn'n be sasafuɛ

¹ Amun `manman Anannganman! M `manman Anannganman.

² Blɛ bɔ mín nyin tɛ o su'n, m ´manman Anannganman. Blɛ bɔ n tɛ kpɛ n tɛ di'n, m ´bo flɛ min Nyanmiɛn'n.

³ Nán an fa amún wla guɛ i sran dandan'm bé su. Nán amun fa be wla gua klɔ sran su. Be de be wiengu-ɔ ɔ yo-man ye.

⁴ Kɛ be ko ka nun bɔ be ko sa be sin ko yo fa'n, wuun like kwlaa nga be sunnzunnin kɛ be ´yo'n i kwlaa ɔ'a ka lɛ ɔ'a mlin cɛn kunngba sɔ'n nun.

⁵ Sran nga bɔ Zakɔb i Nyanmiɛn'n yɛ ɔ ti i ukafuɛ'n, b'ɔ fɛ i wla gua Anannganman b'ɔ ti i Nyanmiɛn'n i su'n, i liɛ su ti ye!

⁶ Anannganman yɛ ɔ boli nyanmiɛn'n b'ɔ la nglo lɔ plaii'n nin asiɛ nin-ɔn. Jenvie'n nin i nun ninnge'n kwlaa i yɛ ɔ yili be-ɔ. Ɔ di nanwlɛ tititi.

⁷ Be nga be mianmian be kplɔlɔlɔ'n, ɔ nian be ndɛ'm be nun di be kpa. Be nga awe kun be'n, ɔ man be like be di. Be nga bɔ b'a wla be bisua'n, ɔ de be.

⁸ Anannganman tike anyansifuɛ'm bé nyin. Be nga awlaboɛ'n ɔ'a kun be'n, ɔ wla be nun fanngan. Ɔ klo be b'ɔ bu be sran kpa'n .

⁹ Anannganman nian aofuɛ'm bé su. Ɔ nian aika nin angboti bla'm be lika. Sanngɛ klunwifuɛ'm be like liɛ nga be sunnzun kɛ be ´yo'n, ɔ saci.

¹⁰ Anannganman ɔ ´sie mɛn'n tititi. Siɔnfuɛ mun, amun Nyanmiɛn'n wo lɛ tititi . Amun `manman Anannganman!