Jue Mun 145 - NYANMIƐN NDƐ'N 1998

Nyanmiɛn i sielɛ b'ɔ ti anannganman'n

1 Nyanmiɛn i manmanlɛ jue nga ɔ o David i jue fluwa'n nun.

¹ Nyanmiɛn i manmanlɛ jue nga ɔ o David i jue fluwa'n nun. I waan: Min Nyanmiɛn, min famiɛn, n ´yi wɔ ayɛ. N ´yaci-man wɔ ase lalɛ le nan kɛ ɔ yo-ɔ ɔ'a yo.

² N ´la wɔ ase cɛn kwlakwla. N su yaci-man ɔ dunman kpa bolɛ le nan kɛ ɔ yo-ɔ ɔ'a yo.

³ Anannganman ti dan, ɔ nin manmanlɛ fata lele tra su. Be wun-mɛn i dan b'ɔ ti'n i sin .

⁴ Sa dandan nga a yo be'n, man sran akpasua nga be wu be'n be kan nan akpasua uflɛ nga be jaso su'n be kusu be ti.

⁵ A ti famiɛn, a lɛ nyrun, a yo nyɛnmɛn, min waan n ´kan wafa sɔ bɔ a ti'n i ndɛ. N ´kan abonuan sa bɔ a yo be'n be ndɛ wie.

⁶ Man be kan wɔ kpli bɔ a ti'n bɔ i ti yɛ a yo sro'n i ndɛ. N liɛ'n, ɔ sa dandan bɔ a yo be'n, m ´bobo be kunngunngun.

⁷ Klun-ufue sa dandan nga a yo be'n, man be kan be ndɛ. Nanwlɛ bɔ a di i titi'n, man bé wun kpaja be nan be kɛn i wun ndɛ'n be sin.

⁸ Anannganman yaci sa cɛ, ɔ si aunnvuɛ, ɔ fa-man ya ndɛndɛ, i kpa liɛ'n, be flɛ-man.

⁹ Anannganman ti kpa man sran'm be kwlakwla. Ɔ klo ninnge b'ɔ yili be'n be ngba.

¹⁰ Anannganman, sɛ n ´kwla se'n, ɔ ninnge bɔ a yili be'n, be ngba be ´manman wɔ. Ɔ sufuɛ nanwlɛfuɛ'm be ´la wɔ ase.

¹¹ Be ´kan ɔ sielɛ'n i nyrun b'ɔ lɛ i'n, Ɔ nin kpli bɔ a ti'n be ndɛ.

¹² Be ´kan man sran'm be ti ɔ sa dandan bɔ a yo be'n, nan be `si kɛ ɔ sielɛ'n ɔ yo nyɛnmɛn nan ɔ lɛ nyrun.

¹³ Ɔ sielɛ'n wo lɛ tititi. Ɔ kwlalɛ bɔ a kwla'n wo lɛ blɛ kwlaa. Nda nga a ta'n, a yo i su sa'n. Ɔ kpa bɔ a ti'n ɔ fite su sa nga a yo'n i kwlaa nun.

¹⁴ Be kwlaa nga be tɔ'n, Anannganman suan bé bo. Be kwlaa nga b'a cia'n, ɔ tinngɛ be.

¹⁵ Be kwlaa bé nyin wo ɔ́ su. Be lafi su kɛ sɛ be like dilɛ blɛ'n ju'n, a ´man be aliɛ be ´di.

¹⁶ A trɛ ɔ́ sa'n nun. A man ninnge nga nguan o be nun'n be kwlaa be like ng'ɔ ju be'n.

¹⁷ Ninnge nga Anannganman yo be'n, be kwlaa be kle kɛ ɔ yo sa'n i nuan su nan i klun ti ufue.

¹⁸ Be kwlaa nga be kpan flɛ Anannganman'n, ɔ mantan be. Sɛ be kpan flɛ i bɔ gblɛ nun-man nun'n, ɔ mantan be.

¹⁹ Be nga bé nyin yi i'n, ɔ fa like bɔ be kunndɛ'n man be. Ɔ ti be nɛn'n yɛ ɔ de be.

²⁰ Be nga be klo Anannganman'n, ɔ nian bé su. Yɛ ɔ nunnun klunwifuɛ mun.

²¹ N ´fa min aniɛn'n manman Anannganman. Man ninnge nga nguan o be nun'n be kwlaa be lɛ i ase. Be `lɛ i ase titi, nán be yaci i le!